LA NAMACHOKGOYAW TASITSI

2 | Ni Katamakgapuspitnanti

Biblia wan:

“Ni katamakgapuspittit […]. Komo tlan chuna tlawayatit, asta niku tlan chuna makgantaxtiyatit, tlan kakatalalipitit putum latamanin. Wixin tiku lu kkapaxkiyan, niti katamakgapuspitnitit […]. Xlakata tatsokgnit: «Jehová wan: “Akit nakkamalakgaxokge xlakata tuku nitlan tlawakgolh”»” (ROMANOS 12:17-19).

¿Tuku wamputun?

Xlikana pi akxni kinkatlawanikanan tuku nitlan, lu sitsiyaw, pero Dios ni lakaskin natamakgapuspitnanaw. Wata kinkamakgpuwantiniyan nakgalhkgalhiyaw asta akxni xla wi tuku natlawa, xlakata malaknunit pi nialh makgas namasputu tuku ni xaʼakgstitum (Salmo 37:7, 10).

Kalitsakgsa uma:

Akxni tamakgapuspitnanaw tlawayaw pi chuntiya naʼanan tasitsi. Wa xlakata, komo wi tiku wanin tuku nitlan mamakgkatsinin, ni katamakgapuspitti. Kamachokgo mintasitsi chu katakaksti. Min kilhtamaku, tlakg tlan kitaxtu nialh lakapastakkan (Proverbios 19:11). Atanu kilhtamaku, max tlakg tlan nakitaxtu nalakkaxtlawaputunkan taʼakglhuwit. Akgtum liʼakxilhtit, komo tlawanikanti tuku nitlan, max nalaksaka natalakgsiyaya chu napina kxlakatin mapakgsinanin.

Akxni tamakgapuspitnankan nitlan kitaxtu

¿Chu komo naʼakxilha pi nila lakatitum lakkaxtlawakan taʼakglhuwit? ¿O komo tlawanita putum tuku talakaskin xlakata lakatitum nalakkaxtlawaya taʼakglhuwit? Maski chuna, ni katamakgapuspitti, komo chuna natlawaya max namaliwakiya taʼakglhuwit. Kamachokgo tasitsi. Kakatsini nalipawana pi Dios nalakkaxtlawa taʼakglhuwit. Anta kSalmo 37:3-5 wan: «Kalipawanti chu xla namakgtayayan».

Liʼakxilhtit xalak kinkilhtamakujkan (ADRIÁN)

Machokgolh la xtamakgapuspitnamputun

Akxni kgawasaku xwanit, Adrián xmakgtapakgsi kʼakgtum pandilla, lu ksitsi chu lu xtamakgapuspitnamputun. Xla wan: «Makglhuwa, xaklatalayaw, chu xmin kilhtamaku xkintekgskan ktiji, xlakpuwankan pi xakninit xlakata lu xaklipaxnit kgalhni».

Akxni xkgalhi 16 kata, Adrián tsukuka limakgalhtawakgekan Biblia. Xla lakapastaka: «Chuna la xaklikgalhtawakgatilha Biblia, xakkakxilha pi xtalakaskin naklakgpali chuna la xaklikatsi». Xtalakaskin pi Adrián xmakgxtakgli tasitsi chu tatalatlaw. Akgtum texto nema lu kaks malakawanilh wa Romanos 12:17-19, nema lichuwinan pi ni natamakgapuspitnanaw. Xla wan: «Kimakgtayalh nakkakxilha pi wa Jehová nalakkaxtlawa tuku ni xaʼakgstitum kilhtamaku akxni chuna nalakgchan. Chuna la titaxtutilhalh kilhtamaku kmakgxtakgli nixatlan kintayat».

Akgtum katsisni akgtum pandilla nema xmakgtapakgsinit xapulana xtalatlawaputun. Xapuxku uma pandilla pixlanka wanilh: «¡Katalatlawananti!». Adrián wan pi lu xtalatlawanamputun. Pero, ni chuna tlawalh, wata tlawanilh akgtum oración Jehová chu tsalalh.

Adrián wampara: «Lichali, ktatanokglhli xapuxku uma pandilla, pero uma kilhtamaku xʼakstu xʼan. Lu xaksitsima chu xaktamakgapuspitnamputun. Pero, ktlawanipa oración Jehová chu kskinilh pi xkimakgtayalh naktakaksa. Lu kaks klilakawa akxni uma kgawasa kiwanilh: “Kakintapati xlakata tuku lalh katsisni. Nachuna klikatsiputun la wix. Klikgalhtawakgaputun Biblia”. ¡Lu tlan pi uma kilhtamaku kmachokgolh kintasitsi! Xlakata uma, xla na tsukulh likgalhtawakga Biblia».