ARTÍCULO NEMA NATALIKGALHTAWAKGA 10
¿Tuku xlakata natamunuya?
«Katamunutit minchatunukan» (HECH. 2:38).
TAKILHTLIN 34 Ni kmakgxtakgan, nakkgalhakgaxmatan
TUKU NATALICHUWINANa
1, 2. 1) ¿Tuku la akxni chatum lataman tamunu? 2) ¿Tuku naʼakxilhaw kʼuma artículo?
¿AKXILHNITA akxni makgapitsi natalan amakgo tamunukgo? Akxni kgalhtinankgo akgtiy takgalhskinin nema katlawani tiku akgchuwinama, xtakgalhtinkan limasiya pi liwana katsikgo tuku kgalhtinamakgo. Xfamiliajkan chu xʼamigoskan lu paxuwakgo. Chu akxni tiku tamunukgolh kamakutukan kchuchut, kxlakankan litasiya pi lu paxuwamakgo, chu takgaxmata la makgapakgxnankgo putum tiku anta wilakgo. Akgatunu semana, lhuwa mil latamanin tamunukgo. Chuna limasiyakgo pi tamakamastanikgonit Jehová chu xtatayananin litaxtukgo.
2 Komo wix lakpuwampat pi natamunuya, uma kilhchanima pi “putsapat Jehová”, chu uma tlawa pi la akgtum xkgakganat nalitaxtuya kʼuma xakapukswa kakilhtamaku (Sal. 14:1, 2). Uma artículo tlawakanit mimpalakata, maski lankata o aktsujku wix. Anan pulaklhuwa tuku xlitlawat pi naskujnaniputunaw Jehová chu uma artículo lichuwinan pulaktutu. Chu akinin tiku tamununitawa, ¿la nakinkamakgtayayan uma artículo? Nakinkamakgtayayan tlakg naskujnaniputunaw kiDioskan putum kilhtamaku.
TAPAXKIT NEMA KGALHINIYA TUKU XAXLIKANA CHU XAʼAKGSTITUM
Akglhuwa mil kata lata Satanás maxkajwima xtukuwani Jehová (Kaʼakxilhti párrafos 3 chu 4).
3. ¿Tuku xlakata kskujnin Jehová paxkiyaw xaxlikana chu tuku xaʼakgstitum? (Salmo 119:128, 163).
3 Jehová kamaxkilh uma limapakgsin kskujnin: «Kapaxkitit xaxlikana» (Zac. 8:19). Nachuna, Jesús masiyalh la xlilakaskinka naputsayaw tuku xaʼakgstitum (Mat. 5:6). Uma wamputun pi xliputum kinakujkan natlawaputunaw tuku xlilat, tuku tlan chu tuku xaskulunku kxlakatin Dios. ¿Paxkiya tuku xaxlikana chu tuku xaʼakgstitum? Xlikana pi chuna. Wa xlakata xkajniya taʼakgsanin chu putum tuku ni xaxlikana chu tuku nitlan (kalikgalhtawakga Salmo 119:128, 163). Tiku akgsaninankgo likatsikgo chuna la Satanás, xmapakgsina uma kakilhtamaku (Juan 8:44; 12:31). Akgskgawini maxkajwiputun xasanto xtukuwani Jehová. Xla wanit taʼakgsanin xlakata Dios lata akxni talalakatawakalh kjardín xaʼEdén, niku limawakalh Jehová pi chatum nixatlan mapakgsina chu xaʼakgsanina, tiku ni lakaskin pi latamanin kalipaxuwakgolh tuku tlan (Gén. 3:1, 4, 5). Xlakata xtaʼakgsanin, lhuwa latamanin nitlan tuku lakpuwankgo xpalakata Jehová. Akxni latamanin ni paxkiputunkgo tuku xaxlikana, Satanás kamatlawi kaxatukawa tuku ni xaʼakgstitum chu xalixkajni (Rom. 1:25-31).
4. ¿La limasiyanit Jehová pi wa «Dios tiku wan tuku xaxlikana»? (Na kaʼakxilhti dibujo).
4 Jehová wa «Dios tiku wan tuku xaxlikana», chu kamasiyani tuku xaxlikana latamanin tiku paxkikgo (Sal. 31:5). Chuna kamakgtaya xlakata Satanás ni nakaʼakgskgawi. Nachuna, Jehová kamasiyani kskujnin pi ni naʼakgskgawinankgo chu natlawakgo tuku xaʼakgstitum, chu uma kamaxki kakni chu kalimini takaksni (Prov. 13:5, 6). ¿Akxilhnita pi chuna kgantaxtunit mimpalakata lata akxni tsuku likgalhtawakgaya Biblia? Katsininita pi ni anan atanu tiku tlakg tlan nakinkapulalinan nixawa Jehová (Sal. 77:13). Wa xlakata wix lilatapaputuna xaʼakgstitum xlimapakgsin (Mat. 6:33). Na tatayaputuna tuku xaxlikana chu limasiyaputuna pi putum tuku wanit Satanás xpalakata Dios kaj taʼakgsanin. ¿La tlan chuna natlawaya?
5. ¿La nalimasiyaya pi tatayaya xaxlikana chu tlawaputuna tuku xaʼakgstitum?
5 Tuku wix natlawaya kmilatamat nakalimasiyani amakgapitsin pi lakgmakgana xtaʼakgsanin Satanás, tatayaya tuku xaxlikana, lakaskina pi Jehová miMapakgsina nalitaxtu chu pi kgalhakgaxmatputuna xaʼakgstitum xlimapakgsin. Xlakata kmilatamat nalitasiya putum uma, talakaskin natlawaniya akgtum oración Jehová niku namalaknuniya pi naskujniya putum kilhtamaku. Alistalh talakaskin natamunuya xlakata nalimasiyaya kxlakatinkan amakgapitsin pi tamakamastaninita Dios. Tapaxkit nema kgalhiniya xaxlikana chu tuku xaʼakgstitum wa tuku xlitlawat pi natamunuputuna.
TAPAXKIT NEMA KGALHINIYA JESUCRISTO
6. Chuna la wan Salmo 45:4, ¿tuku xlakata paxkiyaw Jesucristo?
6 ¿Tuku xlakata wix paxkiya Jesucristo? Tekgsaw makgapitsi tuku xlakata paxkiyaw anta kSalmo 45:4 (kalikgalhtawakga). Jesús tataya chu masiya xaxlikana chu tuku xaʼakgstitum, nachuna limasiya tataktujut. Wa xlakata, komo wix paxkiya xaxlikana chu tuku xaʼakgstitum, na paxkiya Jesús. Akgtum liʼakxilhtit, kalilakpuwanti la limasiyalh Jesús pi xtataya xaxlikana chu tuku xaʼakgstitum (Juan 18:37). Pero ¿la limasiya Jesús tataktujut?
7. ¿Tuku tlakg lakgatiya xlakata la limasiya Jesús pi taktuju?
7 Xtachuwin chu tuku tlawa Jesús limasiya pi taktuju. Akgtum liʼakxilhtit, xla ankgalhin malanki xTlat; nikxni putsa pi amakgapitsin wa namalankikgo (Mar. 10:17, 18; Juan 5:19). ¿Tuku lakpuwana wix xlakata tataktujut nema limasiya Jesús? ¿Ni makgpuwantiniyan napaxkiya Jesús chu natlawaya chuna la xla? Xlikana pi chuna. ¿Tuku xlakata Jesús lu taktuju? Xlakata Jehová taktuju, chu Jesús paxki xTlat chu stalani xliʼakxilhtit (Sal. 18:35; Heb. 1:3). ¿Ni xlikana pi uma tlawa natalakatsuwiniya Jesús?
8. ¿Tuku xlakata lu tlan makgkatsiyaw pi Jesús kiMapakgsinakan litaxtu?
8 Lu tlan limakgkatsiyaw pi Jesús wa kiMapakgsinakan xlakata wa tlakg xatlan Mapakgsina. Wa Jehová tiku masiyanilh la natlawa xtaskujut chu Mapakgsina limaxtulh (Is. 50:4, 5). Nachuna, kalilakpuwanti tapaxkit nema Jesús kinkalimasiyanin (Juan 13:1). Xlakata Jesús wa kiMapakgsinakan, lakgchan napaxkiyaw. Xla liwana lichuwinalh pi latamanin tiku xlikana paxkikgo, tiku xla xʼamigos kaliʼakxilha, limasiyakgo pi paxkikgo akxni kgalhakgaxmatkgo xlimapakgsin (Juan 14:15; 15:14, 15). ¡Akgtum lanka talakgalhaman pi xʼamigos nalitaxtuyaw xKgawasa Jehová!
9. ¿Tuku limasiyalh Jesús akxni tamunulh chu tuku limasiyakgo kstalaninanin akxni tamunukgo?
9 Pulaktum limapakgsin nema Jesús kamaxkilh kstalaninanin wa pi xtamunukgolh (Mat. 28:19, 20). Xla kawilinilh xaliʼakxilhtit. Maski wi tuku litalakgpali tuku xlakata tamunulh Jesús chu tuku xlakata tamunukgo xtamakgalhtawakgen, na wi tuku lakxtum katlawa (kaʼakxilhti recuadro «Tuku litalakgpali tuku xlakata tamunulh Jesús chu tuku xlakata tamunukgo kstalaninanin»). Akgtum liʼakxilhtit, akxni Jesús tamunulh, limasiyalh pi xtlawaputun xtalakaskin xTlat (Heb. 10:7). Nachuna tlawakgo xtamakgalhtawakgen. Akxni tamunukgo, limasiyakgo kxlakatinkan amakgapitsin pi tamakamastanikgonit Jehová chu lata uma kilhtamaku tuku tlakg xlakaskinka kxlatamatkan wa pi natlawakgo xtalakaskin Dios, chu ni wa tuku xlakan tlawaputunkgo. Akxni chuna tlawakgo stalanikgo xliʼakxilhtit xMakgalhtawakgenakan.
10. ¿Tuku tlawa pi napaxkiya Jesús, chu tuku namakgpuwantiniyan natlawaya?
10 Wix kanajlaya pi Jesús wa xachastum xKgawasa Jehová chu wa Mapakgsina tiku laksakli xlakata nakinkamapakgsiyan. Katsiya pi Jesús taktuju chu liwana stalani xliʼakxilhtit xTlat. Katsininita pi xla kamawilh tiku xtsinksmakgo, tlan kamamakgkatsinilh tiku xtaxlajwanikgonit chu asta kamapaksalh tiku xtatatlakgo (Mat. 14:14-21). Wix akxilhnita pi wa pulalima xkachikin Jehová xala uku (Mat. 23:10). Chu katsiya pi xlakata Mapakgsina nalitaxtu kxTamapakgsin Dios, nalimin lhuwa tasikulunalin kkilhtamaku nema aku mima. ¿La tlan nalimasiyaniya pi paxkiya? Nastalaniya xliʼakxilhtit (Juan 14:21). Wa xlakata, pulaktum tuku militlawat wa pi natamakamastaniya Jehová chu natamunuya.
TAPAXKIT NEMA KGALHINIYA JEHOVÁ
11. ¿Tuku nakinkamakgpuwantiniyan natamunuyaw, chu tuku xlakata?
11 ¿Tuku namakgpuwantiniyan natamunuya? Jesús lichuwinalh tuku nakinkamakgpuwantiniyan akxni lichuwinalh tlakg xlakaskinka limapakgsin nema Dios mastanit. Xla wa: «Milipaxkit Jehová miDios xliputum minaku chu xliputum milatamat chu xliputum mintalakapastakni chu xliputum militliwakga» (Mar. 12:30). ¿Wa uma tapaxkit nema wix kgalhiniya Dios?
Putum tuku tlan kgalhiya chu nema nakgalhiya kkilhtamaku nema aku mima, akgtum xtamaskiwin Jehová (Kaʼakxilhti párrafos 12 chu 13).
12. ¿Tuku xlakata wix paxkiya Jehová? (Na kaʼakxilhti dibujos).
12 Lhuwa tuku tlawa pi napaxkiyaw Jehová. Akgtum liʼakxilhtit, wix katsininita pi xla wa “tiku malakatsukinit latamat” chu kinkamaxkiyan «putum [...] xalaktlan tamaskiwin» (Sal. 36:9; Sant. 1:17). Putum tuku tlan kgalhiya wa Jehová maxkinitan, Dios tiku lu xalakgalhamana chu lu xapaxkina.
13. ¿Tuku xlakata talakgmaxtut akgtum lu tlan tamaskiwin?
13 Talakgmaxtut akgtum lu xatlan xtamaskiwin Jehová. ¿Tuku xlakata chuna wanaw? Kalilakpuwaw la xlilhuwa lapaxki Jehová chu xKgawasa. Jesús wa: «XaTlat kimpaxki» chu «Kpaxki xaTlat» (Juan 10:17; 14:31). Chuna la titaxtunit lhuwa millones kata, Jehová chu Jesús tlakg tlan latalalinkgonit (Prov. 8:22, 23, 30). Kalilakpuwanti takatsanajwat nema makgkatsilh Jehová akxni mastalh talakaskin pi xKgawasa xpatinalh chu xnilh. Pero xlakata Jehová lu kapaxkilh latamanin, makamastalh xKgawasa tiku lu xpaxki xlakata wix chu amakgapitsi latamanin tlan nalatamakgo putum kilhtamaku (Juan 3:16; Gál. 2:20). Wa uma tuku tlakg kinkamakgpuwantiniyan napaxkiyaw Dios.
14. ¿Tuku tlakg tlan natlawaya kmilatamat?
14 Akxni tlakg lakgapasa Jehová, tlakg paxkiya. Max lakaskina pi chuna la talalipina Jehová tlakg katatliwakglhtilhalh la uku chu putum kilhtamaku, chu uma tlan chuna nala. Mintachuwin chu tuku tlawaya tlan namakgapaxuwa Jehová. Xla makgpuwantiniyan pi chuna katlawa (Prov. 23:15, 16). Tuku natlawaya kmilatamat nalimasiya komo xlikana paxkiya Jehová (1 Juan 5:3). Komo nalatapaya chuna la Jehová lakgati, wa tuku tlakg tlan natlawaya.
15. ¿La tlan nalimasiyaniya Jehová pi paxkiya?
15 ¿La nalimasiyaya pi paxkiya Jehová? Pulana talakaskin natlawaniya akgtum oración niku nawaniya pi makamaxkipat milatamat (Sal. 40:8). Alistalh, talakaskin natamunuya xlakata nakalimasiyaniya amakgapitsin pi tamakamastaninita xaxlikana Dios. Chuna la lichuwinaw kʼartículo nema titaxtulh, akxni natamunuya lu napaxuwaya, chu uma nalakgpali milatamat. Lata ama kilhtamaku nialh katitlawa tuku wix lakaskina, wata natlawaya tuku Jehová lakaskin (Rom. 14:8; 1 Ped. 4:1, 2). Xlikana pi uma nalakgpali milatamat, pero namaxkiyan talakaskin nalipaxuwaya tlakg xatlan latamat nema anan. Kaʼakxilhwi tuku xlakata.
16. Chuna la wan Salmo 41:12, ¿tuku tasikulunalin nakamaxki Jehová tiku makamaxkikgo xlatamatkan?
16 Jehová wa tiku tlakg lakgalhamanan. Kaxatukawa tuku wix namaxkiya, xla ankgalhin tlakg lhuwa namaspitniyan (Mar. 10:29, 30). Maski la uku talakatsuwima xlisputni uma kakilhtamaku, Jehová namaxkiyan tlakg xatlan latamat nema nalipaxuwaya la uku. Chu ni kajwatiya uma. Lata akxni natamunuya tlan naskujnaniya minTlat xalak akgapun xliputum kilhtamaku. Tapaxkit nema kgalhiniya Jehová chuntiya nastaka, chu wix tlan nalatapaya putum kilhtamaku chuna la xla (kalikgalhtawakga Salmo 41:12).
17. ¿Tuku ni kgalhi Jehová nema wix tlan namaxkiya?
17 Akxni natamakamastaniya Jehová chu natamunuya, wix namaxkiya minTlat xalak akgapun tuku lu lhuwa xtapalh. Putum tuku tlan kgalhiya chu putum tuku lipaxuwanita kmilatamat, wa Jehová maxkinitan. Chu wix tlan namaxkiya tiku malakatsukilh akgapun chu Katiyatni pulaktum tuku xla ni kgalhi: mintakaknin (Job 1:8; 41:11; Prov. 27:11). Ni anan atanu tuku tlakg tlan natlawaya kmilatamat. Tapaxkit nema kgalhiniya Jehová wa tuku xlitlawat pi natamunuya.
¿TLANTIYA NATAMUNUYA?
18. ¿Tuku takgalhskinin tlan nalilakpuwana?
18 Xlakata putum tuku akxilhnitaw, ¿tlantiya natamunuya? Kajwatiya wix tlan nakgalhtiya uma takgalhskinin. Pulaktum tuku namakgtayayan wa pi nalilakpuwana: «¿Tlantiya naktamunu?» (Hech. 8:36). Kalakapastakti pulaktutu tuku namakgpuwantiniyan natamunuya nema akxilhnitaw. Pulaktum, tapaxkit nema kgalhiniya xaxlikana chu tuku xaʼakgstitum. Kalilakpuwanti: «¿Lu kakxilhputun akxni latamanin kajwatiya nawankgo tuku xaxlikana chu kajwatiya natlawakgo tuku xatlan?». Xlipulaktiy, tapaxkit nema kgalhiniya Jesucristo. Kalilakpuwanti: «¿Klakaskin pi xKgawasa Dios kiMapakgsina kalitaxtulh chu kstalaniputun xliʼakxilhtit?». Chu xlipulaktutu, nema wa tuku tlakg xlakaskinka, tapaxkit nema kgalhiniya Jehová. Kalilakpuwanti: «¿Lu kskujnaniputun Jehová chu kmakgapaxuwaputun xnaku?». Komo wix kgalhtinanti pi chuna, ¿tuku xlakata nina tamunuya? ¿Tuku malakgachokgoman? (Hech. 16:33).
19. ¿Tuku xlakata ni xlilat nalakpuwana pi ninala natamunuya? Kalichuwinanti akgtum liʼakxilhtit (Juan 4:34).
19 Komo nina lakpuwanita natamunuya, kalilakpuwanti akgtum liʼakxilhtit nema lichuwinalh Jesús (kalikgalhtawakga Juan 4:34). Jesús wa pi chuna la xliwat xliʼakxilha natlawa xtalakaskin xTlat. ¿Tuku xlakata? Xlakata liwat kinkamakgtayayan. Jesús xkatsi pi putum tuku Jehová kinkaskiniyan katlawaw kinkamakgtayayan. Jehová nikxni kintikaskinin pi katlawaw tuku nitlan nakinkakitaxtuniyan. Xla lakaskin pi wix katamunu (Hech. 2:38). Wa xlakata tlan nalipawana pi komo nakgalhakgaxpata uma limapakgsin lu tlan nakitaxtuniyan. Komo xlakgawilika akgtum lu kgama liwat, ¿ni tunkun xwat? Nachuna kitaxtu xlakata tamunut. Ni kalakpuwanti pi ninala natamunuya.
20. ¿Tuku nalichuwinanaw kʼatanu artículo?
20 ¿Tuku xlakata makgapitsin ni tamunukgo? Max lakpuwankgo pi nila katimakgantaxtikgolh tuku litayamakgo. Xlikana pi natamakamastaniya Jehová chu natamunuya wa tuku tlakg xlakaskinka nalaksaka kmilatamat. Wa xlakata, liwana kalilakpuwanti, kalimaxtu kilhtamaku chu lu kaliskujti xlakata tlan natamunuya. Komo wix tamunuputuna, ¿tuku namakgtayayan chuna natlawaya? Nalichuwinanaw kʼatanu artículo.
TAKILHTLIN 28 La tlan xʼamigo Jehová nawanaw
a Lu xlakaskinka pi tiku kalimakgalhtawakgemaka Biblia natamunukgo. ¿Tuku nakamakgpuwantini chuna natlawakgo? Tapaxkit. Kʼuma artículo nalichuwinanaw tuku xlipaxkitkan chu tiku xlipaxkitkan. Na naʼakxilhaw tuku xlitlawat chatum kstalanina Cristo tiku tamununita.