Kgawasa o tsumat, ¿la lakaskina nakitaxtuniyan?

1. ¿Tuku titaxtukgolh Jehoás, Uzías chu Josías?

KALILAKPUWANTI pi wix tiku nina lhuwa kata kgalhiya laksakkana mapakgsina nawana kxkachikin Dios. ¿La xlimaklakaskinti militliwakga chu milimapakgsin? Biblia kalichuwinan makgapitsi mapakgsinanin xalak Judá tiku tsukukgolh mapakgsinankgo akxni laktsujku xwankgonit. Akgtum li’akxilhtit, Jehoás kajku 7 kata xkgalhi, Uzías 16 kata chu Josías 8 kata. ¡Lanka talakgatay kamaxkika! Maski tuwa tuku x’amakgo titaxtukgo, putum xkgalhikgo tamakgtay nema max xtalakaskin xlakata tlan xtayanikgolh tuku tuwa chu tlan xlimaklakaskinkgolh xlatamatkan.

2. ¿Tuku tlan nakitaxtu komo nalikgalhtawakgayaw tuku titaxtukgolh Jehoás, Uzías chu Josías?

² Xlikana pi akinin ni mapakgsinanin litaxtuyaw, pero umakgolh kgalhtutu lakgkgawasan tiku kalichuwinan Biblia lhuwa tuku xlakaskinka kinkamasiyaniyan. Lhuwa tuku tlan nakatsiniyaw xlakata tuku tlan chu tuku nitlan laksakkgolh. Tuku titaxtukgolh kinkamasiyaniyan pi lu xlakaskinka liwana nalaksakaw tiku nakatalalinaw, ankgalhin nataktujuyaw chu putum kilhtamaku naputsayaw xtamakgtay Jehová.

LIWANA KAKALAKSAKTI TIKU NAKATALALIPINA

3. ¿Tuku tlawalh Jehoás xlakata Jehoiadá makgtayalh?

³ Kalaksakti tuku tlan chuna la Jehoás. Akxni Jehoás aktsujku xwanit, nilh xtlat. Sacerdote tiku tlakg xkgalhi limapakgsin, Jehoiadá, wa tiku makgastakli chu lhuwa tuku masiyanilh xlakata Jehová. Jehoás skgalala wa xlakata kgaxmatli xtastakyaw Jehoiadá, chu xlakata tuku masiyanilh laksakli naskujnani Jehová chu makgtayalh kachikin nachuna natlawakgo. Na lakkaxwililh tuku x’amaka maklakaskinkan xlakata xkaxtlawaka templo (2 Crón. 24:1, 2, 4, 13, 14).

4. ¿La nalitamakgtayaya komo nakgalhakgaxpata xlimapakgsin Jehová? (Proverbios 2:1, 10-12).

⁴ Akgtum lanka tamaskiwin tlawanimakgon minatlatni o atanu tiku masiyaniman napaxkiya Jehová chu nakgalhakgaxpata xlimapakgsin (kalikgalhtawakga Proverbios 2:1, 10-12). Natlatni pulaklhuwa la tlan nakamasiyanikgo xkamanankan. Chuna tlawalh xtlat chatum tala tiku wanikan Katia xlakata xmakgtayalh nalaksaka tuku tlan kxlatamat. Xla chali chali akxtum xtalikgalhtawakga xtsumat texto xala chali chali akxni xlin k’escuela. Katia wan: «Uma kimakgtayalh tlan xaktayanilh tuku tuwa xaktitaxtu chali chali». Max minatlatni na nawanikgoyan pi wi tuku ni natlawaya xlakata chuna wan Biblia, pero max wix nalakpuwana pi xlakan ni lakaskinkgo kalipaxuwa milatamat. ¿Tuku namakgtayayan nakakgalhakgaxpata? Chatum tala puskat tiku wanikan Anastasia, lichuwinan pi xnatlatni ni kajwatiya xwanikgo tuku ni xlitlawat xwanit, wata na xlimaxtukgo kilhtamaku xlakata xwanikgolh tuku xlakata wi tuku xlitlawat xwanit. Xla wan: «Uma kimakgtayalh nakʼakgatekgsa pi chuna xkiwanikgo xlakata xkimpaxkikgo chu ni xlakaskinkgo pi wi tuku nitlan xkiʼakgspulalh».

5. ¿La nalimakgkatsikgo minatlatni chu Jehová tuku nalaksaka? (Proverbios 22:6; 23:15, 24, 25).

⁵ Lu nakamakgapaxuwaya minatlatni komo namakgantaxtiya xtastakyaw Biblia nema xlakan masiyanikgoyan. Chu tuku tlakg xlakaskinka wa pi namakgapaxuwaya Jehová, chu putum kilhtamaku tlan natalalipina (kalikgalhtawakga Proverbios 22:6; 23:15, 24, 25). Uma tuku tlan nakitaxtu kinkamakgpuwantiniyan nastalaniyaw xliʼakxilhtit Jehoás.

6. ¿Tiku kakgalhakgaxmatli Jehoás, chu tuku kitaxtunilh? (2 Crónicas 24:17, 18).

⁶ Kalilakpuwanti tuku nitlan tlawalh Jehoás chu nichuna katlawa. Akxni xninita Jehoiadá, Jehoás laksakli nakatalalin tiku nitlan xlikatsikgo (kalikgalhtawakga 2 Crónicas 24:17, 18). Wa kgalhakgaxmatli xtastakyawkan príncipes xalak Judá tiku ni xpaxkikgo Jehová. Nichuna xlitlawat xwanit, ¿ni xlikana? (Prov. 1:10). Lu nitlan tuku laksakli, mastalh talakaskin pi nixatlan xʼamigos xmatlawikgolh tuku nitlan. Chu akxni xtapuxnimat, Zacarías, stakyawaputulh, Jehoás mamakgnininalh (2 Crón. 24:20, 21; Mat. 23:35). ¡Lu nitlan, Jehoás xatonto wa! Tlan tuku xtlawanit xapulana, pero alistalh chatum apóstata chu makgnina litaxtulh. Titaxtulh kilhtamaku, xlakskujnin makgnikgolh (2 Crón. 24:22-25). ¡Nichuna xtiʼakgspulalh komo chuntiya xtikgalhakgaxmatli Jehová chu tiku xpaxkikgo Dios! ¿Tuku masiyaniyan tuku titaxtulh?

7. ¿Tiku miʼamigos nakalimaxtuya? (Na kaʼakxilhti dibujo).

⁷ Tuku nitlan laksakli Jehoás wi tuku lu xlakaskinka kinkamasiyaniyan: nakalaksakaw amigos tiku nakinkamakgtayakgoyan natlawayaw tuku tlan, amigos tiku paxkikgo Jehová chu makgapaxuwaputunkgo. Xlikana, tlan nakakgalhiyaw amigos tiku tanu tanu kata kgalhikgo. Kalakapastakti pi Jehoás lu kgawasaku xwanit nixawa Jehoiadá. Kakalilakpuwanti amigos nema kgalhiya chu kalakpuwanti: «¿Kimakgtayakgo tlakg nakkanajlani Jehová? ¿Kimakgpuwantinikgo nakkgalhakgaxmata xlimapakgsin? ¿Lakgatikgo lichuwinankgo Jehová chu tuku katsinikgo kBiblia? ¿Kgalhakgaxmatkgo xlimapakgsin Jehová? ¿Kistakyawakgo akxni wi tuku nitlan ktlawama o kajwatiya kiwanikgo tuku akit kkgaxmatputun?» (Prov. 27:5, 6, 17). Komo miʼamigos ni paxkikgo Jehová, ni katimakgtayakgon kmilatamat. Pero komo miʼamigos paxkikgo Jehová, kaliskujti xlakata chuntiya natalalinkgoyan. Xlakan lu namakgtayakgoyan (Prov. 13:20).

8. ¿Tuku kuenta militlawat komo maklakaskina redes sociales?

⁸ Redes sociales kinkamakgtayayan xlakata nakatachuwinanaw kifamiliajkan chu kiʼamigoskan. Pero lhuwa tiku maklakaskinkgo redes sociales wilikgo fotos chu videos niku tasiya tuku tamawakgonit o tuku tlawakgonit kaj xlakata kaks nakamalakawanikgo amakgapitsin. Komo wix maklakaskina redes sociales, tlan nalilakpuwana: «¿Kaj kaks kkamalakawaniputun amakgapitsin? ¿Tuku xlakata kmawaka fotos chu videos? ¿Kkalimakgpuwantiniputun amakgapitsin o kaj klakaskin kakimalankika? ¿Kmastama talakaskin pi amakgapitsin latamanin nakimalakpuwanikgo chu nakimatlawikgo tuku nitlan?». Makgtum, tala Nathan Knorr, tiku xkatatapakgsi Lakgkgolotsin tiku Pulalinankgo, mastalh uma tastakyaw: «Ni kaliskujtit xlakata nakamakgapaxuwayatit latamanin, xlakata nila putum katikamakgapaxuwatit. Kaliskujtit namakgapaxuwayatit Jehová, chu putum tiku paxkikgo nakatalalimputunkgoyan».

LU XLAKASKINKA ANKGALHIN NATAKTUJUYAW

9. ¿Tuku tlawalh Uzías xlakata Jehová xmakgtayama? (2 Crónicas 26:1-5).

⁹ Kalaksakti tuku tlan chuna la Uzías. Akxni mapakgsina Uzías kgawasaku xwanit, taktujulh chu limasiyalh pi xpekuani «xaxlikana Dios». Latamalh 68 kata, chu akglhuwa kata Jehová sikulunatlawalh (kalikgalhtawakga 2 Crónicas 26:1-5). Uzías kamakgatlajalh lhuwa kachikinin nema xtalamakgasitsin xwankgonit chu kuentajtlawalh kachikin Jerusalén (2 Crón. 26:6-15). Max Uzías lu tlan xlimakgkatsi putum tuku tlan xkitaxtunima xlakata Jehová xmakgtayama (Ecl. 3:12, 13).

10. ¿Tuku akgspulalh Uzías?

¹⁰ Kalilakpuwanti tuku nitlan tlawalh Uzías chu nichuna katlawa. Mapakgsina Uzías xlismaninit namasta limapakgsin. Chu max uma malakpuwanilh pi tlan xtlawalh tuku xlakaskin. Akgtum kilhtamaku, tanulh kxtemplo Jehová chu xmakamastaputun incienso anta kpumakamastan, pero uma ni wa xkalakgchan mapakgsinanin chuna natlawakgo (2 Crón. 26:16-18). Azarías, sacerdote tiku tlakg xkgalhi limapakgsin, stakyawalh Uzías chu xla lu sitsilh. Uzías laktlawalh chuna la tlan kskujnanima Jehová chu xla limalakgaxokgelh lepra (2 Crón. 26:19-21). ¡Nichuna xtikitaxtunilh komo chuntiya xtitaktujulh!

11. ¿Tuku tlawa tiku taktuju? (Na kaʼakxilhti dibujos).

¹¹ Akxni Uzías chatum tliwakga mapakgsina litaxtulh, patsankgalh pi putum tuku tlan xtlawanit wa Jehová xmakgtayanit. ¿Tuku kinkamasiyaniyan uma? Pi ni kilipatsankgatkan pi tuku tlan kinkakitaxtuniyan kkilatamatkan chu chuna la skujnanimaw Jehová ni kiʼakstukan chuna tlawanitaw, wa Jehová kinkamakgtayanitan. Ni kiʼakstukan kakinkalimalankikan tuku tlan kinkakitaxtuniyan, wata kalimalankiw Jehová (1 Cor. 4:7).b Talakaskin nataktujuyaw chu nalitayayaw pi akinin makglakgalhinanin chu maklakaskinaw pi amakgapitsin nakinkastakyawakgoyan. Chatum tala tiku kgalhi liwakaya 60 kata, tsokgwililh: «Kkilatamat kkatsininit pi ni lu xlakaskinka nakiliʼakxilhkan. Akxni wi tiku kistakyawa xlakata wi tuku nitlan ktlawanit, kliskuja xlakata naklakgpali tuku nitlan ktlawalh». Komo ankgalhin nataktujuyaw chu napekuaniyaw Jehová, tlan nakinkakitaxtuniyan (Prov. 22:4).

CHUNTIYA KAPUTSA XTAMAKGTAY JEHOVÁ

12. Akxni Josías kgawasaku xwanit, ¿tuku tlawalh xlakata naputsa xtamakgtay Jehová? (2 Crónicas 34:1-3).

¹² Kalaksakti tuku tlan chuna la Josías. Josías tsukulh putsa xtamakgtay Jehová akxni aku kstakma. Tlakg xlakgapasputun xDios chu xtlawaputun xtalakaskin. Pero lu tuwa kitaxtunilh Josías mapakgsina nalitaxtu. Uma kilhtamaku lhuwa latamanin xkakninanikgo ni xaxlikana dioses. Wa xlakata xtalakaskin pi ni xpekualh xlakata xtatayalh xaxlikana takaknin. ¡Chu chuna tlawalh! Ninapara xmakgatsi 20 kata akxni tsukulh mapanu kkachikin putum tuku xmaklakaskinkan xlakata nakakakninanikan ni xaxlikana dioses (kalikgalhtawakga 2 Crónicas 34:1-3).

13. ¿La nakitaxtuniyan komo namakamaxkiya Jehová milatamat?

¹³ Maski wix aku stakpat, tlan nastalaniya xliʼakxilhtit Josías. ¿La natlawaya? Kaputsa Jehová chu tlakg kalakgapasti. Uma namakgpuwantiniyan namakamaxkiya milatamat. ¿Chu la nakitaxtuniyan komo namakamaxkiya milatamat? Luke, tiku tamunulh akxni xkgalhi 14 kata, wa: «Lata uma kilhtamaku, tuku tlakg xlakaskinka nawan kkilatamat wa pi nakskujnani Jehová chu nakliskuja nakmakgapaxuwa» (Mar. 12:30). Komo nachuna natlawaya, Jehová namaxkiyan lhuwa tasikulunalin.

14. ¿Tuku tlawakgo makgapitsi lakgkgawasan chu laktsuman xlakata nastalanikgo xliʼakxilhtit mapakgsina Josías?

¹⁴ ¿Tuku tuwa titaxtukgo lakgkgawasan o laktsuman tiku skujnanikgo Jehová? Johan, tiku tamunulh akxni xkgalhi 12 kata, wan pi xcompañeros xalak escuela mafuerzajliniputunkgo xlakata naxkuli. ¿Tuku tlawa xlakata ni namatlawikan tuku nitlan? Lilakpuwan la namakgatatatla komo naxkuli chu la nalaktlawa chuna la talalin Jehová. Chatum tsumat tiku wanikan Rachel chu tamunulh akxni xkgalhi 14 kata, kinkalitachuwinanan tuku tlawa xlakata natayani tuku tuwa titaxtu k’escuela. Xla wan: «Ankgalhin ktamalakxtumi tuku kimasiyanikan k’escuela chu tuku kkatsininit xlakata Jehová. Min kilhtamaku, akxni k’escuela kinkalitachuwinankanan tuku lanit makgasa kimalakapastaka pulaktum tuku xwanit Biblia pi x’ama la. Chu akxni wi tiku ktachuwinama, klakapastaka akgtum texto xalak Biblia nema tlan naklimakgtaya». Max taʼakglhuwit nema kgalhiya ni xtachuna tuku xkgalhi mapakgsina Josías, pero na tlan nalimasiyaya pi wix skgalala chu ni makgxtakgnana chuna la Josías. Komo la uku naliskuja natayaniya tuku tuwa titaxtuya, tlakg ni tuwa katimakgkatsi natayaniya tuku natitaxtuya alistalh.

15. ¿Tuku makgtayalh Josías ni namakgxtakga Jehová? (2 Crónicas 34:14, 18-21).

¹⁵ Akxni mapakgsina Josías xkgalhi 26 kata, matsukilh taskujut xlakata nalakkaxtlawakan templo. Akxni xkaxtlawamaka templo, tekgska «libro xla xlimapakgsin Jehová nema xtsokgnit Moisés». Akxni mapakgsina kgaxmatli tuku xwan libro, tunkun tlawalh talakgpalit xlakata nakgalhakgaxmata xLimapakgsin Jehová (kalikgalhtawakga 2 Crónicas 34:14, 18-21). ¿Na likgalhtawakgaputuna Biblia chali chali? Komo liskujpat nalikgalhtawakgaya, ¿lakgatiya? ¿Wi tuku tlawaya xlakata ni napatsankgaya textos nema namakgtayayan? Luke, tiku lichuwinaw kpárrafo 13, tsokgwili kmaktum cuaderno tuku tekgsa kBiblia nema lakgati. ¿Na tlan chuna xtlawa xlakata nalakapastaka textos nema lakgati? Komo tlakg nalakgapasa Biblia chu tlakg nalakgatiya nalikgalhtawakgaya, tlakg naskujnaniputuna Jehová. Chu nachuna nakitaxtuniyan la mapakgsina Josías: xTachuwin Dios namakgtayayan natlawaputuna tuku tlan.

16. ¿Tuku xlakata Josías tlawalh tuku nitlan, chu tuku kinkamasiyaniyan?

¹⁶ Kalilakpuwanti tuku nitlan tlawalh Josías chu nichuna katlawa. Akxni Josías xkgalhi 39 kata, wi tuku nitlan tlawalh nema limakgatsankgalh xlatamat. Ni skinilh Jehová pi xpulalilh, wata xʼakstu lipawanka (2 Crón. 35:20-25). ¿Tuku kinkamasiyaniyan? Pi maski linawa kata o laktsujku akinin o akglhuwata kata likgalhtawakgamaw Biblia, chuntiya kiliputsatkan Jehová. Chu xlakata naputsayaw Jehová, talakaskin naskiniyaw pi kakinkapulalin, nalikgalhtawakgayaw xTachuwin chu nakgaxmataw xtastakyawkan natalan tiku tliwakga kgalhikgo xtakanajlakan. Komo chuna natlawayaw, nakinkamakgtayayan ni natlawayaw tuku nitlan chu tlakg napaxuwayaw kkilatamatkan (Sant. 1:25).

KGAWASA O TSUMAT, TLAN NAPAXUWAYA KMILATAMAT

17. ¿Tuku kinkamasiyaniyan xliʼakxilhtitkan kgalhtutu mapakgsinanin xalak Judá?

¹⁷ Kgawasa o tsumat, lhuwa tuku tlan natlawaya kmilatamat. Xliʼakxilhtitkan Jehoás, Uzías chu Josías limasiya pi wix tlan nalaksaka tuku tlan chu nalipina milatamat chuna la makgapaxuwa Jehová, maski aktsujku wix o aku stakpat. Xlikana pi xlakan tlawakgolh tuku nitlan chu lipatinankgolh. Pero komo wix natlawaya tuku tlan tlawakgolh chu lu naliskuja ni natlawaya tuku nitlan tlawakgolh, tlan nakitaxtuniyan kmilatamat.

18. ¿Tuku li’akxilhtit limasiya pi tlan nakitaxtuniyan kmilatamat? (Na kaʼakxilhti dibujo).

¹⁸ Biblia kalichuwinan amakgapitsin lakgkgawasan, chuna la David, tiku lakgtalakatsuwikgolh Jehová, lu liskujkgolh xlakata xla tlan xkaʼakxilhli chu tlan kakitaxtunilh kxlatamatkan. Akxni David kgawasaku xwanit, laksakli naskujnani Jehová chu titaxtulh kilhtamaku, chatum mapakgsina litaxtulh chu ni makgxtakgli Jehová. Xlikana pi wi tuku nitlan tlawalh, pero Dios liʼakxilhli la kskujni tiku ni xmakgxtakga (1 Rey. 3:6; 9:4, 5; 14:8). Komo nalikgalhtawakgaya xlatamat David, xliʼakxilhtit namakgtayayan naskujnaniya Jehová chu ni namakgxtakga. Atanu tuku tlan natlawaya wa pi nalakputsananiya xlatamat Marcos o Timoteo. Xchatiykan laksakkgolh naskujnanikgo Jehová akxni lakgkgawasanku xwankgonit chu putuminika kxlatamatkan ni makgxtakgkgolh. Tuku tlawakgolh makgapaxuwalh Jehová chu tlan kakitaxtunilh kxlatamatkan.

19. ¿La nawan milatamat komo nalipawana Jehová?

¹⁹ ¿La lakaskina pi xwa milatamat kkilhtamaku nema aku mima? Tuku natlawaya la uku natlawa pi tlan o nitlan nakitaxtuniyan kkilhtamaku nema aku mima. Komo nalipawana Jehová chu ni mi’akstu nalipawankana, xla namakgtayayan nalaksaka tuku tlan (Prov. 20:24). Wix tlan napaxuwaya kmilatamat. Chu ni kapatsankga pi Jehová lu xtapalh li’akxilha putum tuku tlawaya xpalakata. Lu tlan kinkakitaxtuniyan akxni skujnaniyaw kinTlatkan xalak akgapun, tiku lu kinkapaxkiyan. ¡Ni anan atanu tuku tlakg tlan!