Pulaktum tuku nakamakgtaya lakpuskatin tiku nitlan kalikatsinikanit

Wa uma tuku litsuku artículo «Tuku nitlan katlawanikan lakpuskatin: ¿Tuku wan Biblia?», nema min ksitio jw.org. Niku sputa uma artículo wan pi tlan namaktiya chu naʼimprimirliya. Chatum tala puskat xalak Estados Unidos tiku wanikan Stacy, wan: «Kʼimprimirlilh makgapitsi copias, chu alistalh akit chu atanu tala kliw niku kamakgtayakan lakpuskatin tiku nitlan kalikatsinikanit».

Chatum puskat tiku skuja anta, skilh pi xlinika tlakg lhuwa copias xlakata xkamaʼakgapitsinilh lakpuskatin tiku wilakgo anta. Uma kilhtamaku mastaka 40 folletos chu 30 tarjetas de contacto xla jw.org. Atanu kilhtamaku, tiku pulalinan niku wilakgo umakgolh lakpuskatin wa pi xlakaskin pi xkamasiyanika lakpuskatin la limakgalhtawakgenanaw Biblia. ok

Stacy chu achatiy natalan ankgolh alakatanu niku na wilakgo lakpuskatin tiku nitlan kalikatsinikanit chu na lu tlan kamakgamakglhtinanka. Anta makgxtakgkgolh makkitsis folleto chu kaskinika pi tlakg xlinkgolh. Chatum puskat tiku skuja anta, wa: «Uma folleto lu nakamakgtaya lakpuskatin tiku wilakgo unu. Lu xakmaklakaskimaw uma tamakgtay». Atanu kilhtamaku akxni kilaparakgolh, lhuwa lakpuskatin talakatsuwikgolh xlakata xʼakxilhputunkgo la limakgalhtawakgenanaw Biblia, chu chatiy wankgolh pi xʼamputunkgo kPukgalhtawakga ksputat semana.

Stacy wan: «Lu kaks klilakawanaw pi latamanin lu lakgatikgo uma artículo. Komo naʼimprimirliya chu nakgapsa, lu tlan tasiya, chu tlakg ni tuwa katimakgkatsi nakalitachuwinana xatlan tamakatsinin lakpuskatin tiku nitlan kalikatsinikanit. Lu tlan klimakgkatsiyaw xlakata latamanin lakgatikgolh uma likgalhtawakga, chu lu kpaxuwayaw akxni klilakpuwanaw la nasikulunatlawa Jehová kintaskujutkan xlakata lakputsamaw la nakalitachuwinanaw xatlan tamakatsinin umakgolh lakpuskatin».