Jesucristo, Mesías tiku xwankanit pi namin

JEHOVÁ DIOS lhuwa tuku kamakatsinilh xlakata Mesías xpalakachuwinanin tiku tsokgkgolh Biblia, Lakgmaxtuna wantiku xwankanit pi namin. Lakapala takatsi tiku Mesías xʼama wan xlakata wankgolh la xʼama lakachin, la xʼama skujnani Dios chu la xʼama niy. Kaks malakawaninan chuna la Jesucristo putum makgantaxtilh tuku pulana xwankanit nala. Komo naʼakxilhaw makgapitsi tuku xwankanit xlakata la xʼama lakachin chu xlakata akxni aktsinajku xwanit, nakatsiyaw pi putum kgantaxtulh tuku xwankanit.

Palakachuwina Isaías pulanaja xwanit pi anta xʼama min kxfamilia David (Isaías 9:7). Chu chuna lalh: Jesús xalak xfamilia David xwanit (Mateo 1:1, 6-17).

Miqueas, atanu xpalakachuwina Dios, tiwa pi anta xʼama lakachin «kBelén Efrata» chu mapakgsina xʼama wan (Miqueas 5:2). Akxni Jesús kichilh Katiyatni, pulaktiy kachikin xwi kʼIsrael nema xkawanikan Belén. Pulaktum xwi kpakxtu, lakatsu kNazaret, chu atanu xwi kJudá lakatsu kJerusalén. Wa nema xwi lakatsu kJerusalén xwanikan makgasa Efrata. Chu kgantaxtulh chuna la xwankanit, xlakata anta kʼama kachikin lakachilh Jesús (Mateo 2:1).

Atanu tuku na xwankanit kBiblia, xwan pi Dios xʼama tasani xKgawasa xlakata kamincha «kʼEgipto». Chuna lalh, xlakata aktsu kgawasa Jesús linka kʼEgipto, titaxtulh kilhtamaku, chu akxni xninitta mapakgsina Herodes, limparaka kxkachikin. Chuna kgantaxtulh la xwankanit (Oseas 11:1; Mateo 2:15).

Krecuadro: «Tuku xwankanita xlakata Mesías», textos xalak Biblia nema wilakgolh niku wan: «Tuku wanka pi xʼama la» tatsokgnit wantuku pulanaja xwankanit xlakata Mesías. Kkamakgpuwantiniman pi katamalakxtupi textos nema wi, xlakata la «Kgantaxtulh». Chuna tlakg nakanajlaya pi xTachuwin Dios xaxlikana.

Akxni nalikgalhtawakgaya textos, kalakapastakti pi wantuku kgantaxtulh, akglhuwa ciento kata pulanaja xwankanit akxni Jesús nina xlakachin. Jesús tiwa: «Xlikgantaxtut xwanit putum tuku tatsokgnit kimpalakata kLimapakgsin nema maxkika Moisés chu tuku tsokgkgolh Palakachuwinanin chu kSalmos» (Lucas 24:44, TNM). Wix tlan naʼakxilha kmiBiblia, pi lu xaxlikana kgantaxtulh putum chuna la xwankanit.