Jesús malankikan akxni tanumacha kJerusalén chu kgewi tantum burro

¿Limasiya tuku xlichuwinanit Biblia pi xʼama la pi Jesús wa Mesías xwanit?

Biblia kinkamaxkiyan xatakgalhtin

Chuna. Akxni Jesús xlama kKatiyatni, makgantaxtilh lhuwa tuku xlichuwinankanit xpalakata «Mesías Pulalina», tiku xʼama litaxtu «xLakgmaxtuna kakilhtamaku» (Daniel 9:25; 1 Juan 4:14). Asta akxni xninita, Jesús chuntiya makgantaxtilh tuku xlichuwinankanit xpalakata Mesías (Salmo 110:1; Hechos 2:34-36).

**¿Tuku kilhchanima Mesías?**

Tachuwin xahebreo Maschíaj (Mesías) chu tachuwin xagriego Kjristós (Cristo) kilhchanima «Talaksakni». Wa xlakata, Jesucristo kilhchanima «Jesús xaTalaksakni» o «Jesús Mesías».

Makgasata, akxni wi tiku xlaksakkan xlakata wi tuku lu xlakaskinka nalakgayawakan, xʼakmawakakan aceite (Levítico 8:12; 1 Samuel 16:13). Dios laksakli Jesús xlakata Mesías xlitaxtulh, tiku kgalhi akgtum lu xlakaskinka talakgatay (Hechos 2:36). Pero Dios ni aceite lilaksakli Jesús, wata lilaksakli espíritu santo (Mateo 3:16).

¿Chalhuwa latamanin xʼamakgo makgantaxtikgo tuku xlichuwinankanit xpalakata Mesías?

Ni. Xtachuna la akgtum huella litalakgapasa kaj chatum lataman, tuku xlichuwinankanit kBiblia pi xʼama la, kaj chatum Mesías o Cristo xkilhchanima. Pero Biblia na kinkawaniyan uma: «Naʼanankgo ni xaxlikana cristos chu ni xaxlikana palakachuwinanin chu natlawakgo tipalhuwa laklanka milagros xlakata nakaʼakgskgawiputunkgo asta tiku xatalaksakni» (Mateo 24:24).

¿Aku namin Mesías?

Ni. Biblia lichuwinalh pi Mesías xʼama min kxfamilia David, tiku mapakgsina xlitaxtu kʼIsrael (Salmo 89:3, 4). Pero niku xtsokgwilikanit tiku xalak xfamilia mapakgsina David xwanit tsankgakgolh. Lakpuwankan pi umakgolh tatsokgni kamasputuka akxni romanos akgchipakgolh Jerusalén kkata 70.a Lata uma kilhtamaku, niti la limasiya pi minitancha kxfamilia mapakgsina David. Pero umakgolh tatsokgni xwilakgojku kxkilhtamaku Jesús, chu nipara xtalamakgasitsin tlan xwankgo pi Jesús ni xalak xfamilia mapakgsina David xwanit (Mateo 22:41-46).

¿La xlilhuwa tuku xlichuwinankanit xlakata Mesías min kBiblia?

Nila liwana putlekgekan la xlilhuwa putum tuku xlichuwinankanit xlakata Mesías. Tanu tanu la putlekgekan tuku xlichuwinankanit, asta niku liwana tasiya pi wa Mesías lichuwinamaka. Akgtum liʼakxilhtit, Isaías 53:2-7 lichuwinan tipalhuwa tuku xʼama la xpalakata Mesías. Makgapitsi latamanin wankgo pi uma kaj akgtum tuku xwankanit pi xʼama la, pero amakgapitsin wankgo pi tipalhuwa.

Makgapitsi tuku xlichuwinankanit xpalakata Mesías nema kgantaxtulh kxlatamat Jesús

Tuku lalh	Tuku wanka pi xʼama la	La kgantaxtulh
Xalak xfamilia Abrahán	Génesis 22:17, 18	Mateo 1:1
Xalak xfamilia Isaac, xkgawasa Abrahán	Génesis 17:19	Mateo 1:2
Xalak xtribu Judá	Génesis 49:10	Mateo 1:1, 3
Xalak xfamilia mapakgsina David	Isaías 9:7	Mateo 1:1
Xkgawasa chatum tsumat	Isaías 7:14	Mateo 1:18, 22, 23
Lakachilh kBelén	Miqueas 5:2	Mateo 2:1, 5, 6
Limapakuwika Emmanuelb	Isaías 7:14	Mateo 1:21-23
Ni xlakaskinka liʼakxilhka	Isaías 53:2	Lucas 2:7
Kamakgnika laktsu kamanan akxni xla xlakachinita	Jeremías 31:15	Mateo 2:16-18
Taxtucha kʼEgipto	Oseas 11:1	Mateo 2:13-15
Limapakuwika Nazarenoc	Isaías 11:1	Mateo 2:23
Chatum makatsinina lakkaxtlawanilh xtiji	Malaquías 3:1	Mateo 11:7-10
Mesías litaxtulh kkata 29d	Daniel 9:25	Mateo 3:13-17
Dios wa pi xKgawasa	Salmo 2:7	Hechos 13:33, 34
Paxkilh xchik Dios	Salmo 69:9	Juan 2:13-17
Lichuwinalh xatlan tamakatsinin	Isaías 61:1	Lucas 4:16-21
Tuku tlawalh kʼGalilea litaxtulh akgtum lanka xkgakganat	Isaías 9:1, 2	Mateo 4:13-16
Tlawalh milagros chuna la Moisés	Deuteronomio 18:15	Hechos 2:22
Palakachuwinalh Dios chuna la Moisés	Deuteronomio 18:18, 19	Juan 12:49
Kamapaksalh tatatlanin	Isaías 53:4	Mateo 8:16, 17
Ni xlakaskin pi lu xlakaskinka xliʼakxilhka	Isaías 42:2	Mateo 12:17, 19
Kalakgalhamalh tiku xpatinamakgo	Isaías 42:3	Mateo 12:9-20; Marcos 6:34
Masiyalh tuku xa’akgstitum	Isaías 42:1, 4	Mateo 12:17-20
XaTlan Stakyawana	Isaías 9:6, 7	Juan 6:68
Masiyalh xtukuwani Jehová	Salmo 22:22	Juan 17:6
Maklakaskilh liʼakxilhtit akxni xmasiya	Salmo 78:2	Mateo 13:34, 35
Pulalina litaxtulh	Daniel 9:25	Mateo 23:10
Lhuwa tiku ni kanajlanikgolh	Isaías 53:1	Juan 12:37, 38
Chiwix nema makgchakgxninan	Isaías 8:14, 15	Mateo 21:42-44
Lakgmakganka	Salmo 118:22, 23	Hechos 4:10, 11
Ni akxilhputunkgolh maski ni xʼanan tuku xlakata chuna xlikatsinikgolh	Salmo 69:4	Juan 15:24, 25
Xkgewi xaskgata burro akxni tanulh kJerusalén chu malankika	Zacarías 9:9	Mateo 21:4-9
Kamanan malankikgolh	Salmo 8:2	Mateo 21:15, 16
Milh palakachuwinan Jehová	Salmo 118:26	Juan 12:12, 13
Chatum xʼamigo stamakgalh	Salmo 41:9	Juan 13:18
Listamakganka 30 tumin xaplatae	Zacarías 11:12, 13	Mateo 26:14-16; 27:3-10
Xʼamigos akgxtakgmakgankgolh	Zacarías 13:7	Mateo 26:31, 56
Chalhuwa tiku liyawakgolh tuku nixaxlikana	Salmo 35:11	Mateo 26:59-61
Ni kgalhtinalh akxni xliyawamaka tuku nitlan	Isaías 53:7	Mateo 27:12-14
Lakachujmanika	Isaías 50:6	Mateo 26:67; 27:27, 30
Akgsnokgka	Miqueas 5:1	Marcos 15:19
Kgeskgokgka	Isaías 50:6	Juan 19:1
Ni tamakgapuspitli akxni kgaxika	Isaías 50:6	Juan 18:22, 23
Mapakgsinanin limawakakgolh tuku nitlan	Salmo 2:2	Lucas 23:10-12
Lakgxtokgonika xmakan chu xtantun kkgantum kiwi	Salmo 22:16	Mateo 27:35; Juan 20:25
Limakankgolh suerte klhakgat	Salmo 22:18	Juan 19:23, 24
Liʼakxilhka la chatum makglakgalhina	Isaías 53:12	Mateo 27:38
Lixkajni wanika chu lakgmakganka	Salmo 22:7, 8	Mateo 27:39-43
Xatapaxuwan patinalh xpalakata makglakgalhinanin	Isaías 53:5, 6	1 Pedro 2:23-25
Xtasiya pi Dios xʼakgxtakgmakganit	Salmo 22:1	Marcos 15:34
Limakgotniputunka vino nema xtalakwilhakanit xaxun tuwan	Salmo 69:21	Mateo 27:34
Kkgalhputilh akxni nina xniy	Salmo 22:15	Juan 19:28, 29
Kxmakan Dios makgxtakglhli xʼespíritu	Salmo 31:5	Lucas 23:46
Makamastalh xlatamat	Isaías 53:12	Marcos 15:37
Makamastalh talakgmaxtut xlakata namapanukan talakgalhin	Isaías 53:12	Mateo 20:28
Nipara kgantum xlukut laktukxnika	Salmo 34:20	Juan 19:31-33, 36
Tapalhtukuka	Zacarías 12:10	Juan 19:33-35, 37
Maknuka la tiku kgalhi lhuwa tumin	Isaías 53:9	Mateo 27:57-60
Malakastakwanika	Salmo 16:10	Hechos 2:29-31
Putsaka xlakgxokgo tiku stamakgalh	Salmo 109:8	Hechos 1:15-20
Wi kxpakgastakat Dios	Salmo 110:1	Hechos 2:34-36

a Cyclopedia xla McClintock chu Strong wan: «Tlan nawanaw pi niku xtsokgwilikanit tiku xtapakgsikgo ktribus chu kfamilias xalak Judá masputuka akxni akgchipaka Jerusalén».

b Tukuwani xahebreo Emmanuel, nema wamputun «Kinkatawilan Dios», liwana masiya pi Jesús wa Mesías. Tuku Jesús tlawalh akxni kilatamachi kKatiyatni, limasiyalh pi Dios katawi tiku kakninanikgo (Lucas 2:27-32; 7:12-16).

c Tachuwin Nazareno max anta takilhtinit ktachuwin xahebreo nétser, nema wamputun «kgalhapu».

d Komo katsiputuna la xlichuwinanit Biblia pi Mesías xʼama chin kkata 29, kaʼakxilhti artículo «Palakachuwina Daniel wa tuku kilhtamaku xʼama chin Mesías».

e Uma tuku xwankanit pi xʼama la tatsokgtawilanit kxlibro Zacarías, pero tiku tsokgli Evangelio xla Mateo wan pi wa «tilichuwinalh palakachuwina Jeremías» (Mateo 27:9). Xmin kilhtamaku pulana xwilikan xlibro Jeremías ktasokgni nema xlilakgapaskan «kxtatsokgnikan Palakachuwinanin» (Lucas 24:44). Max Mateo maklakaskilh tukuwani “Jeremías” akxni xlichuwinama putum uma tatsokgni, nema na anta xmakgtanuma xlibro Zacarías.