Kamakgtayakan amakgapitsin na likakninanikan Dios

1, 2. 1) ¿Tuku nitlan xtitaxtumakgolh natalan xalak Judea? 2) ¿La kalimasiyanika tapaxkit?

LAKATSU kata 46 akxni xminita Jesús, xʼanan tatsinksni kJudea. Kstalaninanin Cristo tiku lamakgolh anta ni kgalhikgo tuku nalitamawakgo liwat nema lu laktapalaxla chu kaj tsinu kamaxkikan, wa xlakata makgkatsikgo pi nanikgo. Pero, umakgolh xlakskujnin Jehová nakamakgtayakan chuna la niti makgtayakan. ¿Tuku nala?

² Xlakata xkalakgalhamankgo xnatalankan xalak Jerusalén chu Judea, kstalaninanin Cristo tiku judíos chu tiku ni judíos xalak Antioquía (Siria), mastokgkgolh tuku nakalimakgtayakgo. Alistalh laksakkgolh chatiy tiku xkalipawankgo, Bernabé chu Saulo, xlakata xkalinikgolh tuku xmastokgkgonit lakgkgolotsin xalak congregación tiku xwilakgolh kJerusalén (kalikgalhtawakga Hechos 11:27-30 chu 12:25). ¡Max lu tlan limakgkatsikgolh kstalaninanin Cristo xalak Judea pi xnatalan xalak Antioquía kalimasiyanikgolh tapaxkit!

3. 1) ¿La xkachikin Dios la uku chuntiyaku tlawakgo la tlawakgolh kstalaninanin Cristo xalak Antioquía? Kalichuwinanti akgtum liʼakxilhtit (na kaʼakxilhti recuadro «Xapulana lanka tamakgtay xala uku»). 2) ¿Tuku takgalhskinin naʼakxilhaw kʼuma capítulo?

³ Tuku lalh kxapulana siglo, wa tuku pulana tatsokgtawilanit niku kstalaninanin Cristo xala alakatanu kamalakgachanikgolh tamakgtay xnatalan xalak atanu kachikin. La uku nachuna tlawayaw la natalan xalak Antioquía: Anaw kamakgtayayaw kinatalankan tiku wilakgolh atanu país akxni katsiyaw pi wi tuku masputunalh chu nitlan tuku katlawanilh.a Xlakata nakatsiyaw la makgtanuma taskujut xla tamakgtay chu atanu taskujut nema tlawayaw kxkachikin Dios, kaʼakxilhwi akgtutu takgalhskinin: ¿Tuku xlakata akxilhaw la xtaskujut Dios akxni makgtayananaw? ¿Tuku xlakata chuna tlawayaw? ¿La kinkamakgtayayan?

Tuku xlakata akxni makgtayanankan “talimasta nkakni”

4. ¿Tuku kawanilh Pablo corintios xlakata taskujut xla kstalanina Cristo?

⁴ Xlimaktiy carta nema kamalakgachanilh Corintios, Pablo lichuwinan xlakata xtaskujut kstalanina Cristo, chu maski xkatsokgnanima tiku kalaksakkanit naʼankgo kʼakgapun, tuku wa na kakilhchanima “amakgapitsi kalhniluj” (Juan 10:16). Wa xlakata chuna la wa Pablo kilitlawatkan pulaktiy taskujut. Pulaktum wa «ntaskujut lantla nalimalakatsuwikgoyaw», uma wamputun nalichuwinanaw Dios chu nakamasiyaniyaw amakgapitsin (2 Cor. 5:18-20; 1 Tim. 2:3-6). Chu apulaktu wa tuku «kalimakgtayakan xasantos», taskujut xlakata nakamakgtayayaw kinatalankan (2 Cor. 8:4, TNM). Uma tachuwin nema maklakaskinka xlakata taskujut tamatitaxti kxagriego diakonía. ¿Tuku xlakata lu xlakaskinka uma?

5. ¿Tuku xlakata Pablo wa pi akxni makgtayananaw na liskujnaniyaw Dios?

⁵ Xlakata limaklakaskilh watiya tachuwin xagriego xlakata uma pulaktiy taskujut, Pablo makgtamaknulh tamakgtay nema xtamasta akxni min tuku nitlan ktaskujut nema xtlawakgo congregación xla kstalaninanin Cristo. Pulanaja xlichuwinanita pi «tipalhuwa kgalhiyaw kintaskujutkan, wampi paks xmana watiya chatum kimpuchinakan wanti lakskujnimaw. Na chuna litum lantla chatunu tanuj tanu kinkamaxkikanitan litliwakga lakimpi lhuwa wantu tlan natlawayaw wampi [...] watiya yuma chatum espíritu» (1 Cor. 12:4-6, 11, Hua Xasasti Talaccaxlan, 1999). Wa xlakata, Pablo wa pi uma pulaktiy taskujut nema tatlawa kcongregación “litamasta nkakni” (Rom. 12:1, 6-8).b ¡Wa xlakata, tlan xakxilha nalimaklakaskin xkilhtamaku «na[...]makgtayakgoy ksantujlanin Dios»! (Rom. 15:25, 26.)

6. 1) Chuna la wa Pablo, ¿tuku xlakata akxni makgtayananaw na likakninaniyaw Dios? 2) Kawanti la makgtayanankan xlikalanka katiyatni akxni wi tuku masputunan (kaʼakxilhti recuadro «Akxni wi tuku masputunan», kpágina 214).

⁶ Xlakata xkamakgtayalh corintios nakatsikgo pi akxni xmakgtayanankgo na xlitaxtu naskujnikgo Dios chu nakakninankgo, Pablo kawanilh pi kstalaninanin Cristo makgtayanankgo akxni min tuku nitlan xlakata «ntalakgachixkuwin ntu nkgalhiyatit xla xatlan xtamakatsinin nCristo» (2 Cor. 9:13). Uma wamputun, pi xlakata makgantaxtiputunkgo xtamasiy Cristo, kamakgtayakgo xnatalan. Chuna, Pablo kawani pi akxni tlan kalikatsinikgo xnatalan, limasiyakgo «ntlanka lipaxkatsinit ntu nkakgalhininitan Dios» (2 Cor. 9:14; 1 Ped. 4:10). Wa xlakata, akxni lichuwinalh la nakamakgtayayaw natalan tiku maklakaskinkgo, La Atalaya 1 xla junio kata 1976 xlikana tuku wa: «Putum kilhtamaku liwana kilikatsitkan pi Jehová Dios chu xKgawasa, Jesucristo lu xlakaskinka akxilhkgo uma taskujut». Chuna, akxni makgtayananaw na lu xlakaskinka nema likakninaniyaw Dios (Rom. 12:1, 7; 2 Cor. 8:7; Heb. 13:16).

Lakkaxwilikanit tuku xlakata makgtayananaw

7, 8. ¿Tuku tlakg xlakaskinka nema limakgtayananaw? Kawanti tuku xlakata.

⁷ ¿Tuku xlakata makgtayananaw? Pablo lichuwinalh kxlimaktiy carta nema kamalakgachanilh Corintios (kalikgalhtawakga 2 Corintios 9:11-15). Kʼuma versículos Pablo lichuwinan pulaktutu tuku kitaxtu akxni “ntlawayaw yuma ntamakgtay”. Kaʼakxilhwi pulakatunu.

⁸ Pulana: malanki Jehová. Kaʼakxilhti la makglit Pablo kalitachuwinan xnatalan xlakata Jehová kversículos nema akxilhwi kpárrafo 7. Apóstol wan «nalimaxkikgoy mpaxkatsinit Dios» chu na«lhuwa limaxkikgoy Dios mpaxkatsinit» (versículos 11 chu 12). Lichuwinan la kstalaninanin Cristo «limaxkikgoy nkakni Dios» akxni makgtayanankgo chu tlan lichuwinan «xpalakata ntlanka lipaxkatsinit ntu nkakgalhininitan Dios» (versículos 13 chu 14). Chu wa uma tuku limasputu akxni xlichuwinama tamakgtay nema tamasta: «Paxkatsinilh Dios» (versículo 15; 1 Ped. 4:11).

9. ¿La lakgpali la lakapastakkgo latamanin akxni makgtayananaw? Kawanti akgtum liʼakxilhtit.

⁹ Chuna la Pablo, xlakskujnin Dios xala uku akxni makgtayanankgo katsikgo limalankikgo Jehová chu tlan lichuwinankan xtamasiy (1 Cor. 10:31; Tito 2:10). Chu makglhuwa uma taskujut makgtayanan pi makgapitsi nialh nalakpuwankgo tuku nitlan xlakata Jehová chu xtatayananin. Kalichuwinaw tuku lalh kʼakgtum país akxni titaxtulh akgtum tliwakga un. Chatum puskat tiku na anta xwi xwilinit kxchik akgtum letrero nema xwan: «Xtatayananin Jehová, ni katitaxtutit kkinchik». Pero akgtum kilhtamaku akxilhli pi makgapitsi xkaxtlawamakgolh akgtum chiki nema xlakxtlawanit un xakgalhpatu tiji. Akglhuwa kilhtamaku kaʼakxilhli uma lakskujnin tiku tlan xlikatsikgo, alistalh kalakgalh xlakata xkakgalhskilh tiku xwankgonit. Akxni katsilh pi xtatayananin Jehová xwankgonit kaks lilakawa chu wa: «Nitlan tuku xakkalakpuwaniyan». ¿Tuku tlawalh? Mapanulh letrero.

10, 11. 1) ¿Tuku liʼakxilhtit limasiya pi makgantaxtimaw xlipulaktiy tuku xlakata makgtayananaw? 2) ¿Tukuya likgalhtawakga kgalhikgo makgapitsin tiku makgtayanankgo akxni wi tuku masputunan? (Kaʼakxilhti recuadro «Tuku lu makgtayanan akxni wi tuku masputukan».)

¹⁰ Xlipulaktiy: kamaxkikan “tamakgtay” kinatalankan (2 Cor. 9:12a). Lu kamaxkiputunaw tuku maklakaskinkgo kinatalankan chu tlan nakamamakgkatsiniyaw. ¿Tuku xlakata? Xlakata tiku tapakgsiyaw kcongregación, litaxtuyaw «watiya akgtum wa ntiyatliwa. [...] Wa cha xpalakata, lapi wa lakatum lakni [o makni], katsan, xlipaks talakkatsan lakni» (1 Cor. 12:20, 26). Xlakata lapaxkikgo chu lalakgalhamankgo, lhuwa xtatayananin makgxtakgkgo tuku tlawamakgolh, chu tiyakgo xliskujnikan chu ankgo niku wi tuku masputunan xlakata nakamakgtayakgo xnatalan (Sant. 2:15, 16). Akgtum liʼakxilhtit, akxni titaxtulh akgtum tsunami kJapón kkata 2011, Sucursal xalak Estados Unidos malakgachalh cartas niku kakgalhskilh Comités Regionales de Construcción xalak país komo «makgapitsi natalan tiku xkatsinikgo tlawakgo taskujut» tlan xmakgtayanankgolh xlakata xkaxtlawaka Pukgalhtawakga xla xTatayananin Jehová. ¿La kgalhtinankgolh? Kaj ni lhuwa semanas titaxtulh, atsinu ni akgchaxan ciento natalan wankgolh pi tlan xmakgtayanankgolh asta makgapitsi wankgolh pi tlan kxokgokgolh xpasaje xla avión asta kJapón. «Kaks klilakawaw» wa sucursal xalak Estados Unidos. Akxni chatum xtatayana Jehová xalak Japón kgalhskilh chatum tala tuku xlakata xʼanit, kgalhtinalh: «Natalan xalak Japón litaxtukgo xtachuna la kimaknikan. Kinkakatsaniyan tuku kakatsani». Xlakata lu paxkinankgo, natalan tiku makgtayanankgo asta kalipekua wilikgo xlatamatkan xlakata nakamakgtayakgo xnatalankan (1 Juan 3:16).c

¹¹ Asta tiku ni xtatayananin Jehová paxtikatsinikgo taskujut nema tlawayaw. Akgtum liʼakxilhtit, akxni wi tuku masputunalh kkata 2013 kʼestado xla Arkansas (Estados Unidos), maktum periódico lichuwinalh xlakata la lakapala makgtayanankgolh xtatayananin Jehová: «Chuna la talakkaxwilikgonit xtatayananin Jehová tlawa pi lu stlan natasiya la makgtayanankgo akxni wi tuku masputunan». Xlikana, chuna la wa Pablo, lhuwa kamaxkiyaw tuku maklakaskinkgo kinatalankan.

12-14. 1) ¿Tuku xlakata xlakaskinka xlipulaktutu tuku xlakata limakgtayananaw? 2) ¿Tuku wankgo makgapitsi natalan nema limasiya pi lu xlakaskinka tunkun naskujnaniparakan Dios?

¹² Xlipulaktutu: kamakgtayayaw tiku nitlan tuku kaʼakgspulalh naskujnaniparakgo Jehová. ¿Tuku xlakata lu xlakaskinka? Xlakata chuna la wan apóstol Pablo, tiku kamakgtayakan «lhuwa limaxkikgoy Dios mpaxkatsinit» (2 Cor. 9:12b). Chu lipaxtikatsinikgo Jehová akxni tunkun skujnaniparakgo (Filip. 1:10). Kkata 1946, La Atalaya wa pi Pablo mastalh talakaskin namastokgkgo tumin xlakata uma xmasta talakaskin pi natalan xkamaxkika tuku xmaklakaskinkgo, chu chuna tlakg xkgalhikgolh kilhtamaku chu litliwakga xlakata xlichuwinankgolh Jehová. La uku, na watiya tuku tlawayaw, xlakata akxni tsukuparakgo lichuwinankgo Dios, natalan ni kaj kamatliwakglhkgo xtalakatsukan xlakata tuku nitlan kaʼakgspulalh, wata na kamatliwakglha (kalikgalhtawakga 2 Corintios 1:3, 4).

¹³ Wa tama tuku akxilhkgonit makgapitsi natalan akxni kamakgtayakan, xlakata kamaxkinit kilhtamaku nalichuwinamparakgo Dios nema kamatliwakglhnit. Chatum tala chixku wa: «Kifamilia, lu kamakgtayalh akxni ankgolh lichuwinankgo Dios. Xlakata xakkamakgtayaputunaw kintalatamankan lu tlan klimakgkatsiw maski lhuwa taʼakglhuwit xakkgalhiyaw». Atanu tala puskat wa: «Akxni tlakg ktlawalh xtaskujut Dios, kimakgtayalh nialh naklakapastaka tuku nitlan xlanit. Kimakgtayalh xlakata nitu xaklipekualh». Atanu tala puskat na wa: «Xwi lhuwa tuku nila xaktlawayaw, pero xlakata xaklichuwinamaw Dios kifamilia chu akit kinkamakgtayan naktlawayaw tuku tlakg xlakaskinka. Naklichuwinanaw kintakgalhkgalhinkan xlakata xasasti kakilhtamaku tlawalh pi tlakg nakanajlayaw pi Dios putum namasasti».

¹⁴ Ankan ktamakxtumit na atanu tuku lakapala xlitlawakan tiku kaʼakgspula tuku nitlan. Kiyoko, chatum tala puskat tiku kgalhi atsinu 60 kata, tiku putum makgatsankgalh akxni titaxtulh tsunami, kaj litamakgxtakgli tuku xlhakganit chu tatunu nema xlin. Ni xkatsi la xʼama kitaxtuni. Ama kilhtamaku chatum kgolotsin wanilh pi xʼamakgolh kgalhikgo tamakxtumit... kxputlaw. Xla lakapastaka: «Kgolotsin, xpuskat, atanu tala chu akit ktawilaw kputlaw. Maski ni kilhuwakan ktamakxtumiw, tlawalh pi nialh xaklakapastakwi tsunami. Stlan klimakgkatsilh. Uma kimasiyanilh la lu makgtayanan tamakxtumit xla kstalaninanin Cristo». Atanu tala puskat wa xlakata tamakxtumit niku kilalh akxni aku xlanit tuku nitlan: «Wa kilakgmaxtulh» (Rom. 1:11, 12; 12:12).

Putum kilhtamaku tlan kitaxtu akxni makgtayanankan

15, 16. 1) ¿Tuku xʼamakgolh makgamakglhtinankgo corintios chu xalak alakatanu xlakata xmakgtayanankgolh? 2) ¿Tuku makglhtinanaw la uku xlakata makgtayananaw?

¹⁵ Akxni Pablo lichuwinalh uma taskujut, kawanilh corintios tuku tlan xmakglhtinankgolh chu nachuna atanu kstalaninanin Cristo, xlakata xmakgtayanamakgolh: «Na nakapalakaskinkgoyan kxoracionkan [judíos tiku kstalanikgo Cristo xalak Jerusalén tiku kamakgtayaka] xpalakata ntlanka lipaxkatsinit ntu nkakgalhininitan Dios» (2 Cor. 9:14). Chuna, xlakata corintios lhuwa tuku xmastakgo xtlawalh pi kstalaninanin Cristo xalak Jerusalén xkapalakaskinkgolh xnatalan xalak Corinto, asta tiku ni judíos xwankgonit chu tlawalh pi tlakg xlapaxkikgolh.

¹⁶ Revista La Atalaya 15 xla abril kata 1946 lichuwinalh tuku tlan kitaxtu la uku akxni Pablo wa pi akxni pulaktu kachikin nema tamakamastaninit Dios kamaxki apulaktu tuku maklakaskinkgo, kimputumkan makgkatsiyaw pi makxtum wilaw. Chuna makgkatsikgo tiku makgtayanankgo. Chatum kgolotsin tiku makgtayanalh akxni masputunalh chuchut wa: «Uma taskujut tlawalh pi tlakg nakkatalakatsuwini kinatalan». Chu chatum tala tiku makgtayaka wa: «Kinatalankan wa tuku tlakg xtachuna la natasiya Paraíso» (kalikgalhtawakga Proverbios 17:17).

17. 1) ¿La kgantaxtu Isaías 41:13 akxni makgtayanankan? 2) Kalichuwinanti makgapitsi liʼakxilhtit xlakata la akxni makgtayanankan malanki Jehová chu tlawa pi tlakg tlan nalatalalinaw (na kaʼakxilhti recuadro «Makgtayanankan xlikalanka katiyatni»).

¹⁷ Akxni tiku makgtayanankgo chankgo niku wi tuku masputunalh, natalan tiku titaxtukgonit tuku nitlan akxilhkgo pi xlikana tuku Dios malaknu: «Akit, Jehová miDios, kpakgachipanitan, Akit tiku waniyan: “Ni kapekuanti. Akit xlikana nakmakgtayayan”» (Is. 41:13). Chatum tala puskat tiku lakgtaxtulh akxni wi tuku masputunalh wa: «Kmakgkatsilh pi kiʼakstu xakwi xlakata wi tuku masputunalh, pero Jehová kimakgtayalh. Ni anan tachuwin xlakata nakwan la kimakgtayakgolh kinatalankan». Chatiy lakgkgolotsin tiku xwilakgolh niku tachikilh tiyat tsokgkgolh xpalakata xcongregacionkan: «Akxni tachikilh tiyat analh lhuwa talipuwan, pero Jehová maklakaskilh kinatalankan xlakata nakinkamakgtayayan. Xaklikgalhtawakganitaw la makgtayanankgo, pero la uku kakxilhwi la kinkamakgtayakan».

¿Tlan namakgtayanana?

18. ¿Tuku militlawat xlakata tlan namakgtayanana akxni wi tuku masputunan? (Na kaʼakxilhti recuadro «Lakgpalinilh xlatamat».)

¹⁸ ¿Na paxuwaputuna xlakata tlan nakamakgtayaya natalan? Komo chuna, kalakapastakti pi tiku makgtayanankgo kalaksakkan tiku makgtlawakgo Pukgalhtawakga xla xTatayananin Jehová. Wa xlakata, ¿tlan xkaskini akgtum solicitud lakgkgolotsin xalak mincongregación? Chatum kgolotsin tiku lhuwa katsi xlakata la makgtayanankan masta tastakyaw: «Ni kapit niku wi tuku masputunalh komo Comité de Socorro ni waninitan pi tlan napina». Chuna liwana natalakkaxwili la namakgtayanankan.

19. ¿Tuku xlakata wanaw pi akxni makgtayananaw liwana limasiya pi xaxlikana kstalaninanin Cristo akinin?

¹⁹ Makgtayanankan na lu xlakaskinka xlakata namakgantaxtiyaw uma xlimapakgsin Cristo: «Kalapaxkitit nchatunu chatunu». Akxni chuna tlawayaw limasiyayaw pi akinin xaxlikana kstalaninanin Cristo (Juan 13:34, 35). Kalilakpuwanti lhuwa tiku makgtayanankgo chu malankiputunkgo Jehová akxni kamakgtayakgo tiku ni makgxtakgkgo xTamapakgsin Dios. ¡Kgalhiyaw akgtum lanka talakgalhaman!