Kamakgtayayaw tiku patinamakgolh xlakata wi tuku masputunalh

Kkata 2020, lhuwa tuku masputunalh chu nachuna tsukulh pandemia xla COVID-19. ¿Tuku tlawakgolh xtatayananin Jehová xlakata xkamakgtayakgolh tiku xmaklakaskinkgo?

Kkata 2020,a Comité de Coordinadores xla Lakgkgolotsin tiku Pulalinkgo xtatayananin Jehová wa pi tlan namaklakaskinkan 28 millones xla dólaresb xlakata nalimakgtayanankan niku wi tuku masputunan. Uma tumin maklakaskinka xlakata xkalimakgtayaka tiku patikgolh akxni analh liwaka 200 tuku masputunan, chuna la akxni analh pandemia xla COVID-19, akxni milh lanka un, akxni masputunalh chuchut kʼÁfrica, akxni analh tatsinksni kVenezuela chu akxni sputli chuchut kʼZimbabue. Uma tumin nema xatapaxuwan mastakan limaklakaskinka xlakata xlitamawaka liwat, chuchut, niku xtamakgxtakgka, lhakgat chu likuchun. Na limaklakaskinka xlakata xtamawaka tuku nalikaxakakan, nakalitlawakan chu nakalilakkaxtlawakan edificios. Kaʼakxilhwi makgapitsi la makgtayanankanit.

COVID-19. Kxlikalanka katiyatni, pandemia tlawanit pi kinatalankan natatatlakgo, nitlan namakgkatsikgo chu namakgasputkgo lhuwa tumin. Wa xlakata kalakkaxwilika 800 Comités de Socorro xlakata xmakgtayanankgolh. Comités kuenta tlawakgo tuku maklakaskinkgo natalan chu makatsinikgo Comité de Coordinadores xlakata namalakgachakgo tamakgtay nema maklakaskimakgo.

Kkata nema titaxtulh, Comités de Socorro makgtayanankgolh xlakata natalan xkgalhikgolh liwat, chuchut, tuku kuenta xlitlawakgolh xmaknikan chu likuchun. Kmakgapitsi kachikinin Comités de Socorro akxtum kataskujkgolh lakgkgolotsin xlakata natalan xmakglhtinankgolh tamakgtay nema mastakgo mapakgsinanin.

Chuna la makgtayananitaw na akxilhkgonit tiku ni xtatayananin Jehová. Akgtum liʼakxilhtit, Field Simwinga, xpuxkukan policía xalak Nakonde (Zambia), kawanilh natalan: «Kmakgkatsiyaw pi kkalakliniyan xlakata kamakgtayatit familias tiku patikgolh».

Sputa taway kʼAngola. Xlakata anan COVID-19, kʼ Angola ni analh lhuwa taway, chu uma tlawalh pi xtapalaxlanalh. Kinatalankan na tuwa makgkatsikgolh natamawakgo liwat.

Wa xlakata skinika tamakgtay sucursal xla Brasil xlakata xkamakgtayalh natalan xalak Angola chu xkamalakgachanilh liwat. Xlakata liwana xmaklakaskinka tumin nema xatapaxuwan mastakan, natalan kgalhskininankgolh la tlakg tlan xwa xtamawaka chu xmalakgachaka liwat, chu laksakkgolh kaj makgtum natamawakgo lhuwa liwat. Kaj 22 dólares makgasputka xlakata xtamawaka chu xmalakgachaka liwat nema akgatunu bolsa max 20 kilos (44 libras) xtsinkan chu xtajuma arroz, stapu, aceite chu atanu. Asta la uku malakgachakanit 33,544 bolsas, xliputuminika 654 toneladas (721 toneladas americanas). Putum uma chu tuku xʼanan kkachikin, makgtayanalh xlakata xkamawika liwaka 50,000 latamanin.

¿La makgkatsikgo kinatalankan? Alexandre, tiku lama lakgamakgat kkachikin xla Angola, wan: «Liwana kakxilha pi Jehová kimpaxki, pi ni kiʼakstu kwi chu pi lu xtapalh klitaxtu kxkachikin». Mariza, tiku xʼakstu kamakastakma xkamanan, wan: «Jehová kgaxmatli kʼoración. Lu kpaxtikatsini Jehová chu xkachikin».

Sputa chuchut kZimbabue. Kkata 2020, sputli chuchut kZimbabue, nema tlawalh pi millones latamanin xtsinksnikgolh. Lhuwa mil natalan kaj aktsu xkgalhikgo tuku nawakgo.

Lakkaxwilika 5 Comités de Socorro xlakata xkamalakgachanika liwat natalan. Lhuwa natalan masakuaninankgolh xputlawkan, makgmujukgolh liwat nema xʼamaka kamalakgachanikan natalan chu makgmawakakgolh kputlaw.c Kkata 2020, laktlawaka 691,561 dólares xlakata xkamawika liwaka 22,700 latamanin.

Akxni chilh tamakgtay, makgapitsi natalan xmakgasputkgonita liwat nema xkgalhikgo. Wa xlakata natalan paxtikatsinikgolh Jehová chu makgapitsi tsukukgolh kilhtlinikgo Jehová takilhtlin xla Tamapakgsin.

Kʼakgtum kachikin, chatiy natalan tiku nikgonita xchixkukan, kilakgolh kʼakgtum tamakxtumit niku xʼamaka lichuwinankan tamakgtay nema xʼama masta akgtum organización nema ni xla mapakgsinanin (ONG). Pero ktamakxtumit, tsukuka lichuwinankan política, chu natalan laksakkgolh ni natlawakgo tuku xkawanimaka. Akxni taxtukgolh, tsukuka kalikgalhkgamanankan chu kawanika: «Ni natanatit alistalh xlakata nakilaskiniyatit liwat, ¿kgaxpattit?». Pero kaj akgtiy semana alistalh, natalan chankgolh kʼuma kachikin chu kamaxkika liwat umakgolh chatiy natalan... chu ONG nina xmasta tamakgtay.

Tamakgtay nema mastaka kZimbabue tlawalh pi lu tlan xlichuwinanka xkachikin Jehová. Kaʼakxilhwi tuku akgspulalh Prisca, tiku lama kʼakgtum aktsu kachikin. Maski tuwa tuku xtitaxtuma xlakata ni xʼanan chuchut, Prisca ankgalhin xʼan lichuwinan Dios miércoles chu viernes, maski asta akxni xlakgchan kilhtamaku nalakgwaxkan tiyat. Latamanin xalak xkachikin xlikgalhkgamanankgo chu xwanikgo: «¡Nakamakgatsinksniya mifamilia kaj xlakata lichuwinantapuliya Dios!». Pero Prisca xkakgalhti: «Jehová ankgalhin kakuentajtlawa tiku skujnikgo». Ni makgas kilhtamaku titaxtulh, xkachikin Jehová kamalakgachanilh liwat. Makgapitsi xtalakatsunin kaks lilakawankgolh chu wanikgolh: «Dios xlikana kuentajtlawayan. Kkatsiputunaw xlakata miDios. La uku kgalhtukun xtalakatsunin kgaxmatkgo tamakxtumit nema tamatitaxti kradio.

Xlakata tlakg talakatsuwinimaw xlisputni uma kakilhtamaku, tlakg natalhuwi tuku masputunan (Mateo 24:3, 7). Lu kkapaxtikatsiniyan chuna la tanu tanu xatapaxuwan mastayatit mintuminkan chuna la wan donate.jw.org. Lu nakalimakgtayakan natalan tiku titaxtumakgolh tuku tuwa.