¿La tlan namakgtayananaw akxni wi tuku masputunan?

Chuna la titaxtuma kilhtamaku tlakg lhuwa tuku masputunan. Akxni la tuku masputunan, tiku makgtayanankgo klabores de socorro talakaskin liwana natalakkaxtawilakgo chu xlikatsitkan tuku natlawakgo. Wa xlakata Lakgkgolotsin tiku Pulalinankgo lakkaxwilikgonit pi kputum sucursales kxlikalanka katiyatni katawilalh akgtum Departamento de Labores de Socorro.

Akxni natalan tiku makgtayanankgo kʼuma departamento katsikgo pi lalh tuku masputunan, tunkun katachuwinankgo lakgkgolotsin xlakata nakatsikgo tuku maklakaskinkgo natalan. Komo natalan nila xʼakstukan lakkaxtlawakgo tuku lakgsputli, sucursal nakalaksaka natalan tiku tlan napulalinkgo taskujut anta. Umakgolh natalan max nakaputsakgo amakgapitsi natalan tiku namakgtayanankgo o naskinkgo pi kalimakgtayanankgolh tuku tamaklakaskima, o max natamawakgo chu namakgpitsikgo tuku tamaklakaskima.

Pulaklhuwa tuku tlakg tlan kitaxtu akxni chuna lakkaxwilikan taskujut. Akgtum liʼakxilhtit, ni makgtiy natlawakan taskujut, ni naʼanan taʼakglhuwit chu ni nalaktlawamikan tumin chu atanu tuku maklakaskinkan. Pero nichuna katikitaxtulh komo natalan xʼakstukan naʼankgo makgtayanankgo.

Natalan tiku nakalaksaka sucursal wa naʼakxilhkgo la xlilhuwa tumin natalakaskin chu la xlilhuwa tiku namakgtayanankgo. Max na nakatachuwinankgo mapakgsinanin xalak uma kachikin, xlakata uma namakgtayanan tlakg lakapala natlawakan taskujut. Wa xlakata, komo nitu wanipaka, kkawaniyan pi ni miʼakstu kapuki tumin, ni kalipi tuku tamaklakaskima chu ni kapit niku lalh tuku masputunanit.

Xlakata kapaxkiyaw kinatalankan, wi tuku tlawaputunaw xpalakatakan (Heb 13:16). Pero ¿tuku tlan natlawayaw? Tuku tlakg xlakaskinka wa pi natlawayaw oración xpalakatakan tiku patinamakgo chu xpalakatakan tiku makgtayanamakgo. Na tlan xatapaxuwan namastayaw kintuminkan xlakata natlawakan kintaskujutkan kxlikalanka katiyatni. Lakgkgolotsin tiku Pulalinankgo kawanikgo sucursales pi tlan nalaksakkgo la namaklakaskinkgo tumin. Chu komo amputunaw makgtayananaw, kamalakgatsamaw Solicitud de voluntario local de diseño y construcción (DC-50).

AKXNI AKXILHNITATA NAWAN VIDEO MASPUTUNAN CHUCHUT KBRASIL, KAKGALHTI UMA TAKGALHSKININ:

¿Tuku tlakg kaks malakawaniyan xlakata taskujut nema tlawakgolh tiku makgtayanankgolh klabores de socorro akxni masputunalh chuchut kBrasil kkata 2020?