Jesús Staka Knazaret

Jesús staka kNazaret, kʼakgtum aktsu kachikin nema xwi kxnorte Judea chu ni lu xlakaskinka xlitaxtu. Uma kachikin tatekgsa xkasipijni Galilea xʼoeste lanka pupunu nema wanikan Galilea.

Max Jesús xkgalhi akgtiy kata akxni xnatlatni liminkgolh kʼuma kachikin akxni kitaspitkgolh kʼEgipto. Max uma kilhtamaku, Jesús ni xkgalhi xnatalan. Pero alistalh José chu María kgalhikgo atanu xlakgkgawasankan: Santiago, José, Simón chu Judas. Nachuna, kgalhikgo max chatiy xlaktsumankan. Wa xlakata Jesús kgalhi xtunatalan, kgalhtati lakgkgawasan chu max chatiy laktsuman tiku tlakg laktsujku nixawa xla.

Jesús kgalhi atanu xtalilakgapasni. Lakgapasaw Elisabet chu xkgawasa, Juan, tiku makgat lamakgo, kxsur Judea. Pero kʼGalilea, lama Salomé, nema max xtala María chu xnapa Jesús. Xchixku wanikan Zebedeo chu chatiy xkamanan, Santiago chu Juan, xnatapuxnimatni Jesús. Ni katsiyaw la xlilhuwa kilhtamaku akxtum katala Santiago chu Juan akxni Jesús aktsujku, pero akxni laklankata tlan latalalin chu xʼapóstoles litaxtukgo.

José xwakna chu lhuwa xliskujat xlakata namaxki xfamilia tuku maklakaskin. Xlakata José kuentajtlawa Jesús chuna la xkgawasa, putum latamanin lilakgapaskgo Jesús la «xkgawasa xwakna» (Mateo 13:55). Chuna la staktilha, José masiyani la naxwaknan, chu xla liwana katsini uma taskujut. Chuna la titaxtu kilhtamaku latamanin limapakuwikgo Jesús la «xwakna» (Marcos 6:3).

José chu xfamilia lu xlakaskinka liʼakxilhkgo nakakninanikgo Jehová. Chuna la wan xLimapakgsin Dios, José chu María kamasiyanikgo xkamanankan putum kilhtamaku: akxni wilakgo kchiki, akxni wi niku ankgo, akxni amakgo lhtatakgo chu akxni takikgo (Deuteronomio 6:6-9). Nachuna, wi akgtum sinagoga kNazaret. Chu José ankgalhin kalin xfamilia anta xlakata nakakninanikgo Dios. Alistalh, lichuwinankan pi Jesús lismani an ksinagoga sábado (Lucas 4:16). Xfamilia Jesús na xatapaxuwan ankgo ktemplo kJerusalén, chuna la nakatsiyaw kcapítulo nema stala.