Biblia kalakgpalinilh xlatamatkan
¿Tuku tlawalh pi chatum chixku tiku xmakgtapakgsi krastafari, xmakgxtakgli la xlin xlatamat chu nialh xkasitsinilh latamanin xalakglhmumokgon? ¿Tuku xlakata chatum kgawasa nialh kataskujli tiku kstakgo droga chu lakgpalilh la xlin xlatamat? Kakamaxkiw talakaskin xlakan nakinkawanikgoyan.
«Nialh kkalaksakpaxkilh amakgapitsin» (HAFENI NGHAMA)
LA AKGLHIT KATA KGALHI: 34
PAÍS: ZAMBIA
ATANU: EX RASTAFARI
LA XAKLAMA: Xlakata xʼanan guerra, kintse xtsalanit kNamibia chu xmakgtanunit kʼakgtum grupo nema xwanikan Organización del Pueblo de África del Suroeste (SWAPO, xlakata tachuwin nema maklakaskinkan kʼinglés). Uma grupo xlakatawakakgo mapakgsinanin xalak Sudafrica tiku xmapakgsinamakgo kNamibia ama kilhtamaku. Kintse linka kʼcampo de refugiados kʼZambia, chu anta klakachilh.
Akgkukitsis kata klatamalh klakalhuwa campos xla SWAPO. Uma grupo lu tliwakga xlitaxtu kNamibia xlakata xkamakgamakglhtinan lhuwa lakkamanan tiku xkamasiyanikan xlakata política chu na xkamasiyanikan pi xkasitsinikgolh latamanin xalakglhmumokgon.
Akxni xakkgalhi 11 kata xaktlawaputun kinconfirmación, wa xlakata kputsalh chatum pastor, tiku xkamasiyani católicos, luteranos, anglicanos, chu atanu tiku xwilakgo kʼcampo de refugiados. Pero xla ni lakaskilh. Uma lu kimaxlajwanilh chu nialh kkanajlalh pi Dios xlama. Maski chuna, akxni xakkgalhi 15 kata kmakgtanulh akgtum grupo xla política chu xla xtakanajlakan rastafaris. Kmakgtanulh xlakata xaklakgati tatlakgni reggae, pero nachuna xlakata xaklakaskin pi nialh lu xkamaskujuka tiku xalakgtsitsekgen xwankgonit kʼÁfrica. Kmatlawinalh rastas kinchixit, chuna la xkgalhikgo rastafari, ktsukulh xkuli marihuana, nialh xakwa liwa chu lu xakmakgtaya grupo nema xkamakgtaya tiku xalakgtsitsekgen. Pero maski chuna, ni kmakgxtakgli xalixkajni kilatamat chu chuntiya xakakxilha películas niku lu xlamakgnikan. Chu chuntiya lixkajni xakchuwinan.
BIBLIA LAKGPALILH KILATAMAT: Kkata 1995 akxni xakkgalhi 20 kata, liwana klilakpuwa tuku xakama tlawa kkilatamat. Lhuwata kilhtamaku xaklikgalhtawakgama likgalhtawakga rastafaris nema xkimaxkikan, maski makgapitsi xlimin textos xalak Biblia, ni xakkanajlani tuku xlichuwinan. Wa xlakata, kiʼakstu ktsukulh klikgalhtawakga Biblia.
Chatum kiʼamigo rastafari, kimakgtayalh nakkgalhi maktum likgalhtawakga xla xtatayananin Jehová. Tunkun ktsukulh likgalhtawakga chu xaktamalakxtumi tuku wan Biblia. Titaxtulh kilhtamaku katekgsli xtatayananin Jehová chu kimakgtayakgolh tlakg nakatsinitilha. Pero akxni nina xakkatakgalhtawakga, lhuwa tuku klakgpalilh kilatamat.
Tuwa kmakgkatsilh nakmakgxtakga kuchu chu nialh nakxkuli (2 Corintios 7:1). Na klakgpalilh la xaktakaxtaya, asta kchukulh kinchixit, nialh kakxilhli películas niku lu xlamakgnikan, chu niku xtasiya talakgxtumit xalimaxana nachuna klakgpalilh la xakchuwinan (Efesios 5:3, 4). Titaxtulh kilhtamaku nialh klaksakpaxkinalh (Hechos 10:34, 35). Xlakata tlan xaktalakgpalilh, nialh kkgaxmatli takilhtlin nema xlichuwinankgo tasitsi chu nialh kkatalalilh tiku xkimatlawiputunkgo tuku nitlan.
Akxni, kmakgxtakgli tuku nitlan xaktlawa kputsalh Pukgalhtawakga xla xtatayananin Jehová. Ama kilhtamaku kmakgamakglhtinalh akgtum takgalhtawakga xalak Biblia chu klakpuwa naktamunu. Kifamilia ni lakgatilh uma. Kintse kiwanilh pi xakkatatapakgsilh atanu «takanajla» pero ni wa xtatayananin Jehová. Chu chatum xalak kifamilia, tiku xtaskujma mapakgsina, ankgalhin xkilichuwinan xlakata tuku xaklaksaknit.
Maski kifamilia kimputsastalanilh chu kilikgalhkgamanalh, ktayanilh xlakata kstalanilh xliʼakxilhtit chu xtamasiy Jesús. Liwana xakkatsi pi xtatayananin Jehová xkgalhikgo xaxlikana takanajla, xlakata tuku xkimasiyanikgo xtatalakxtumi tuku wan Biblia. Xlakan ankgalhin kgalhakgaxmatkgo tuku kalimapakgsi Dios wa xlakata kalitachuwinankgo xtachuwin amakgapitsi latamanin (Mateo 28:19, 20; Hechos 15:14). Chu na ni makgtanukgo kpolítica (Salmo 146:3, 4; Juan 15:17, 18).
TUKU TLAN KINKITAXTUNINIT: Xlakata kkgalhakgaxmata tuku wan Biblia tlan kinkitaxtuninit. Nialh kxkuli marihuana, chu xlakata uma nialh klaktlawa lhuwa ciento dólares akgatunu papaʼ. Nialh kakxilhlakachan tuku nitlan chu nialh lu ktatatla.
Akxni aktsujku xakwanit xaklilakpuwan naktlawa tuku tlan kkilatamat chu la uku kmakgantaxtinit. Pero tuku tlakg tlan klimakgkatsi wa pi tlakg ktalakatsuwininit Dios (Santiago 4:8).
«Nialh lu lakapala ksitsi» (MARTINO PEDRETTI)
LA AKGLHIT KATA KGALHI: 43
PAÍS: AUSTRALIA
ATANU: TIKU XKAMAKGNI LATAMAMIN CHU KSTA DROGAS
LA XAKLAMA: Akxni aktsujku xakwanit kifamilia tanu tanu niku latamalh, klatamaw lhuwa laktsu kachikinin, akgtum lanka kachikin chu, milh kilhtamaku, naklatamaw kʼakgtum kachikin aborigen nema anan kpaís. Kkgalhi lakglilakgatit talakapastakni xla ama kilhtamaku akxni akxtum xakkatalamaw kinakukun chu kinatapuxnimatni. Xakchipayaw skiti, xaktalatnanaw chu xaktlawayaw bumeranes, chu atanu.
Ankgalhin xakkatalatlawa amakgapitsin, xlakata kintlat, tiku boxeador xwanit, xkimasiyaninit lata akxni aktsujku xakwanit. Akxni kgawasata xakwanit ktsukulh kwa kuchu. Kiʼamigos chu akit lu xaklakgatiyaw xakkatalatlawayaw amakgapitsin. Xaklimaklakaskinaw navajas chu bates xla béisbol, puxam o liwaka latamanin xaklatalatlawayaw.
Xlakata xakkgalhilh tumin, xaksta drogas chu tuku atanu xkgalhankgonit niku chankgo barcos. Na xakkaskujnani tiku stakgo lhuwa droga, xakkamataji tiku xkalaklinikgo chu xakkalimakgapekuan tuku limakgninankan. Kintachuwin xwanit: «Nakkamakgni o nakimakgnikgo». Xlikana pi makgnina xaklitaxtuputun.
BIBLIA LAKGPALILH KILATAMAT: Klakapastaka pi akxni aktsujku xakwanit kkgaxmatli xlakata xtatayananin Jehová. Pero akxni xakkgalhi liwaka puxam kata, tlakg kkatsiputulh xpalakatakan, chu kkgalhskilh kintse. Aku akgtiy kilhtamaku xtitaxtunit lakgatlakgli kimalakcha chatum xtatayana Jehová tiku xwanikan Dixon. Kgalhchuwinaw lhuwa kilhtamaku, chu alistalh kiwanilh xaktaʼalh akgtum tamakxtumit. Kkalh ama xapulana tamakxtumit chu, la uku kgalhi puxam kata la ktamakxtumima. Lu xaklakgati pi putum takgalhskinin nema xakkatlawani xkilikgalhtikgo Biblia.
Kimasiyanikgolh pi Jehová kalilakgaputsa latamanin, asta kalilakgaputsa tiku ni lu limasiyanikgo kakni (2 Pedro 3:9). Na kkatsinilh pi xla xlitaxtu chatum tlat xapaxkina nema xʼama kimakgtakgalha maski amakgapitsin ni chuna xtlawakgolh. ¡Kaks kimalakawanilh akxni kkatsilh pi komo xaktalakgpalilh, xla xʼama kimatsankgenani putum kintalakgalhin! Akgtum texto xalak Biblia nema kaks kimalakawanilh wa Efesios 4:22-24. Niku wan: «nalakgmakganatit chuna la xlikatsiyatit makgasa» chu «kalilhakganantit xasasti tayat nema litlawaka xtalakaskin Dios».
Lu tuwa kmakgkatsilh naklakgpali la xaklin kilatamat. Tlan ni xakwa droga lhuwa kilhtamaku, pero akxni xchan sábado chu domingo chu xakkatatamakxtumi kiʼamigos, xakwapara drogas. Kkakxilhli pi nila xakama lakgpali kilatamat komo ni xakkamakgxtakgli, wa xlakata kkatamakgatlinilh chu kkalh latama atanu kachikin. Kmatlanilh pi makgapitsi na xkintaʼankgolh, pero tsukukgolh kimalaknunikgo marihuana. Kkawanilh pi xakmakgxtakgputun uma nitlan talismanin chu akxni kchaw niku tapakgta kachikin, kkamakgxtakgli. Alistalh kkatsilh pi xkgalhanankgonit kʼakgtum banco chu xlimaklakaskinkgonit tuku limakgninankan.
TUKU TLAN KINKITAXTUNINIT: Akxni nialh xakkatalalin ama latamanin, ni tuwa kmakgkatsilh naklakgpali kilatamat. Ktamunulh la xtatayana Jehová kata 1989. Alistalh, kintala tsumat chu kinatlatni na xtatayananin Jehová litaxtukgolh.
La uku kkgalhiya akgkutujun kata lata ktamakgaxtokgnit chu kkgalhi kgalhtutu kamanan. La uku tlan kwan pi nialh lu ksitsi, asta akxni kimakgasitsiputunkgo. Na kkatsininit nakkapaxki putum latamanin, maski tanu tanu xlakatsukutkan chu xtachuwinkan (Apocalipsis 7:9). Ankgalhin klakapastaka xtachuwin Jesús nema kgantaxtukgonit kkilatamat: «Komo kgalhakgaxpatatit kintachuwin, xlikana kistalaninanin litaxtuyatit, chu nalakgapasatit xaxlikana, chu xaxlikana nakalakgmaxtuyan» (Juan 8:31, 32).
[Tuku wan página]
Xlakata tlan xaktalakgpalilh, nialh kkgaxmatli takilhtlin nema xlichuwinankgo tasitsi
[Tuku wan página]
Kiʼamigos chu akit lu xaklakgatiyaw xakkatalatlawayaw amakgapitsin. Xaklimaklakaskinaw navajas chu bates xla béisbol, puxam o liwaka latamanin xaklatalatlawayaw