Liwana lakkaxwililh tuku xʼama tlawa chu tlan kitaxtulh
María Isabel chatum aktsu tsumat tiku lichuwinan Dios xla akgtum kachikin xalak Chile nema wanikan San Bernardo. Xla chu xfamilia mapuches, chu xatapaxuwan makgtayakgonit natatlawa akgtum congregación mapudungún, kxtachuwinakan, nema na wanikan mapuche.
Akxni wanka pi nalakapastakkan akxni tinilh Cristo xʼamaka tlawakan kmapudungún chu xtlawakanit 2,000 invitaciones kʼuma tachuwin, María Isabel kgalhskinka tuku tlan xtlawalh xlakata xmakgtayalh xmakgpitsika. Lakapastakli tuku xtlawakgonit atanu xtatayananin Jehová tiku aktsujku tiku tlan kakitaxtuninit akxni kalitachuwinankgolh xlakata Dios xcompañeros chu xmakgalhtawakgenanin. Katachuwinalh xnatlatni, chu akxtum laksakkgolh pi xla xlakkaxwililh la tlan xmakgpitsilh invitaciones kʼescuela. ¿Tuku lalh?
Xapulana, skilh xmaxkika talakaskin xwililh akgtum invitación niku laktanukan escuela. Tiku xpulalinkgo escuela maxkikgolh talakaskin, chu wanikgolh pi lu tlan tuku xtlawama. Akgtum kilhtamaku akxni xmatitaxtimaka lista, director mastalh akgtum tamakatsin xlakata invitación.
Nachuna, María Isabel skinilh talakaskin makgalhtawakgena xlakata tlan xʼalh atanu salones. Akxni maxkika talakaskin, kakgalhskilh tiku xʼankgo anta kʼescuela komo wi tiku xchuwinankgo mapuche. Xla kinkawaniyan: «Akit klakpuwa pi xʼanan kgalhkaw o akgkukitsis tiku xʼankgo escuela tiku xfamilia mapuche xwanit, pero tlakg xʼanan. ¡Kmakgpitsilh 150 invitaciones!».
«XLA XAKXILHPUTUN TIKU TLAKG LANKATA»
Chatum puskat tiku akxilhli invitación nema xwi niku laktanukan kʼescuela kgalhskilh tiku tlan tlakg xwanilh xlakata uma. Kalakpuwanti la lakawa akxni linka niku xwi chatum aktsu tsumat tiku kajku 10 kata xkgalhi. María Isabel wan: «Xla xakxilhputun tiku tlakg lankata». Akxni kmaxkilh akgtum invitación chu tsinu kwanilh tuku xwan uma invitación, kgalhskilh puskat niku xlama xlakata xla chu xnatlatni xʼankgolh lakgapaxialhnankgo chu tlakg xlichuwinankgolh xlakata xTamapakgsin Dios. Uma puskat chu 26 tiku na mapuche xlitaxtukgo akxni talakapastakli akxni tinilh Jesús. Kaj kalakpuwanti la paxuwakgolh puxam tiku lichuwinankgo Dios kʼmapudungún akxni akxilhkgolh umakgolh latamanin. ¡La uku stakma uma congregación!
Maski laklankata o aktsujku akinin, ¿na wi tuku xtlawaw xlakata tiku kataʼanaw escuela o tiku taskujaw naʼankgo akxni natalakapastaka akxni tinilh Jesús o naʼankgo akgtum taʼakgchuwin kcongregación o tamakxtumit xaʼakgtutu kilhtamaku? Kkilikgalhtawakgekan, natekgsaw tuku tlawakgonit kinatalankan nema nakinkamakgtayayan wi tuku nalakkaxwiliyaw chu tlan nakitaxtuyaw. Nachuna kaskiniw Jehová kakinkamaxkin xʼespíritu santo xlakata ni napekuanaw akxni nakatachuwinanaw amakgapitsin (Luc. 11:13). Komo liwana lakkaxwiliyaw tuku natlawayaw, max na tlan tuku natitaxtuyaw chu nakinkamatliwakglhan.