Kilhtamaku 2 xla abril natsukuyaw makgpitsiyaw invitación akxni natalakapastaka akxni tinilh Jesús
1. ¿Tukuya kilhtamaku namaʼakgpitsiyaw invitación uma kata? ¿Tlan kitaxtu akxni chuna tlawakan?
1 Kilhtamaku 2 xla abril asta 17 xla abril, namakgpitsiyaw invitación xlakata natatlawa tuku lu xlakaskinka: natalakapastaka akxni tinilh Jesús. Makgasa, lhuwa latamanin kinkatatamakxtumikgonitan akxni kamaxkiw invitación nema mastayaw kata kata. Akgtum liʼakxilhtit, akxni talakapastakli akxni tinilh Jesús chatum puskat chuwinalh ksucursal chu wa: «Aku kchima kkinchik, chu kakxilhli maktum invitación xtampin kimalakcha, o puwilhta. Kkamputun pero ni liwana kkatsi tuku hora natawila». Tiku kgalhtinalh kteléfono wanilh niku natekgsa kʼinvitación hora nema xʼama tlawakan, chu uma puskat masputulh takgalhchuwin chu wa: «¡Uku nakan niku natalakapastaka akxni tinilh Jesús!».
2. ¿Tuku tlan nawanaw akxni namastayaw invitación?
2 La natatlawa. Xlakata ni lhuwa kilhtamaku kgalhiyaw xlakata nalichuwinanaw Dios putum niku kinkalakgchanan, tlakg tlan ni makgas nakatachuwinanaw latamanin. Tlan nawana: «Kgalhen. Kkamaxkiputunan uma invitación wix chu mifamilia. Kmastamaw xlakata domingo 17 xla abril lu xlakaskinka tuku natatlawa xlikalanka katiyatni [kamaxki invitación]. Uma kilhtamaku lakgchan akxni nilh Jesús chu kʼakgtum taʼakgchuwin xalak Biblia nakinkawanikanan la tlan nalitamakgtayayaw xlakata kinkalakgmaxtun Cristo. Ni katimatajika xlakata natanuya. Kʼuma invitación limin niku chu tuku hora natawila uma tamakxtumit kkinkachikinkan».
3. ¿Tuku natlawayaw xlakata tlan nakamaxkiyaw invitación lhuwa latamanin?
3 Komo kcongregación lhuwa anan niku lichuwinankan Dios, lakgkgolotsin max nawankgo komo namakgxtakgkan kchiki niku ni wilaka pero tlan nawiliya niku ni naʼakxilhkgo amakgapitsi. Na nakawaniya tiku nakalakgpimparaya, mimparientes, tiku kataskuja, tiku katapina kʼescuela chu atanu tiku kalakgapasa. Akxni namakgpitsiya sábado chu domingo, na tlan namastaya revistas komo tiku tachuwinampat masta talakaskin. ¿Tlan naliskuja precursor auxiliar xlakata tlakg namakgtayanana?
4. ¿Tuku xlakata lakaskinaw pi amakgapitsi kaʼankgolh akxni natalakapastaka akxni tinilh Jesús?
4 ¡Lu nakamakgtaya tiku naʼankgo ktamakxtumit! Nakgaxmatkgo la xlilhuwa kinkapaxkin Jehová xlakata kinkalakgmaxtun (Juan 3:16). Nakatsikgo la nakamakgtaya latamanin xTamapakgsin Dios (Isa. 65:21-23). Na nakawanikan tiku naʼankgo ktamakxtumit pi kawanikgolh kaxwilinanin pi lakaskinkgo akgtum takgalhtawakga xalak Biblia xlakata tlakg nakatsikgo xlakata Dios. Skinaw kkioracionkan pi lhuwa latamanin tiku katsiputunkgo xlakata Jehová kamakglhtinankgolh invitación chu kaʼankgolh akxni natalakapastaka akxni tinilh Jesús.