Kilhtamaku 17 xla marzo natsukuyaw makgpitsiyaw invitación akxni natalakapastaka akxni tinilh Jesús
1. ¿Tuku natsuku tamakgpitsi 17 xla marzo?
1 Chuntiya makatsininanaw pi Jesús nilh akxni lakapastakaw kata kata (1 Cor. 11:26). Lakaskinaw pi lhuwa latamanin nakinkatatawilakgoyan akxni natalakapastaka akxni tinilh Jesús, chu nakgaxmatkgo la xlilhuwa kinkapaxkiyan kiDioskan xlakata mastalh talakgmaxtut (Juan 3:16). Uma kata, sábado 17 xla marzo natsukuyaw kawaniyaw latamanin pi kakinkatatamakxtumikgon. ¿Lakkaxwilimawa kinkilhtamakujkan xlakata lhuwa kilhtamaku namakgmakgpitsiyaw invitación?
2. ¿La tlan namastaya invitación?
2 La namakgpitsiyaw invitación. Tlakg tlan ni lhuwa tuku nawana. Tlan nawana la uma: «Kgalhen. Kmaxkiyan uma invitación xlakata wix chu mi familia tlan napinatit kʼakgtum lu xlakaskinka tamakxtumit, nema natatlawa 5 xla abril xlikalanka kkatiyatni. Kʼakgtum taʼakgchuwin xalak Biblia nalichuwinankan la kinkamakgtayayan xlakata nilh Jesús chu tuku tlawama la uku. Ni katitamatajinalh. Kʼuma invitación limin niku chu tuku hora natawila». Sábados chu domingos namastayaw revistas komo naʼakxilhaw pi talakaskin.
3. ¿La namakgtayananaw xlakata putum latamanin nakgalhikgo invitación?
3 Kakawani putum latamanin. Tuku lakaskinaw wa pi lu lhuwa latamanin kakinkatatamakxtumikgon. Wa xlakata, kakawaniw ki revisitaskan, tiku kalimakgalhtawakgeyaw Biblia, kifamiliajkan, kintalakatsukan chu tiku kataskujaw, kataʼanaw kʼescuela chu tiku kalakgapasaw. Nachuna lakgkgolotsin xalak congregación nalakkaxwilikgo la natamakgpitsi invitación. Kata nema titaxtukgonit lu tlan kitaxtunit xlakata chuna tatlawalh. Katata akxni talakapastakli akxni tinilh Cristo chatum kaxwilina akxilhli akxni chalh chatum puskat, chu wanilh pi xʼama taputsa tiku xmaxkinit invitación. Pero uma puskat niti xlakgapasa. Ama kilhtamaku wi tiku xmakgxtakgninit invitación.
4. ¿Tuku xlakata lu xlakaskinka xatapaxuwan namakgpitsiyaw invitación?
4 Akxni natalakapastaka akxni tinilh Cristo max nachan tiku wix maxki invitación. Chu maski niti naʼan, komo lu namakgpitsiya namakgtayanan lhuwa latamanin nakatsikgo xlakata Jesús. Tuku namakgpitsiya lichuwinan pi Jesús la uku xatliwakga mapakgsina. Nachuna, xlakata xatapaxuwan natlawaya uma taskujut naʼakxilhkgo latamanin niku lichuwinana Dios, natalan chu tuku tlakg xlakaskinka wa pi Jehová naʼakxilha pi wix lu lanka xtapalh akxilha talakgmaxtut (Col. 3:15).