La tlan nakamakgtayayaw amakgapitsin

FRANÇOIS chatum kgolotsin tiku lama kkachikin nema ni lhuwa tumin kgalhikgo wan: «Akxni sputkgolh votaciones tsukukgolh latalatlawanankgo, uma tlawalh pi lhuwa xtatayananin Jehová xmakgxtakgkgolh xchikkan. Ni lhuwa xʼanan tuku nawakan chu likuchun, chu nema xwijku lu tapalaxla xwanit. Bancos kamalakchuwaka, chu cajeros automáticos nialh xkgalhikgo tumin o talakgalhikgolh».

Natalanin xalak sucursal lakapala tsukukgolh kamalakgachanikgo tumin chu atanu tuku lu xmaklakaskinkgo xtatayananin Jehová tiku xtsalakgonit chu xtatamakxtumikgonit kPukgalhtawakga xla xTatayananin Jehová klakgatum país. Akgtiy grupos nema xlatachipamakgo wilikgolh lakchixkuwin tiku xmakgskgalakgo carreteras, pero xlakata xkatsikgo pi xtatayananin Jehová ni xmakgtanukgo kpolítica, ni xkamachokgokan xputlawkan sucursal.

François wan: «Akxni xakamaw kPukgalhtawakga xla xTatayananin Jehová, makgapitsi tiku xlimakatalatnankgo rifles talakgolh kimputlawkan. Balas lu lakatsu kinkatilakatsalan. Akxni akxilhwi pi lakapala xkinkalakgmiman soldado tiku xchipanit xpistola, tunkun kwililh reversa, malakgspitwi kimputlawkan chu lakapala taspitparaw ksucursal. Xpaxtikatsiniyaw Jehová pi ni kinkamakgnikan. Lichali, 130 natalanin tiku ankgolh kPukgalhtawakga xla xTatayananin Jehová nialhtu kalanikgolh. Makgapitsi chankgolh ksucursal, niku kamaxkiw tuku xmaklakaskinkgo kxtakanajlakan chu atanu asta akxni titaxtukgolh tuku tuwa.

»Alistalh, lhuwa natalanin malakgachakgolh ksucursal lhuwa cartas niku xwankgo pi lu xpaxtikatsinikgo. Akxni akxilhkgolh la xnatalan xalak alakatanu xkamakgtayakgonit, tlakg lipawankgolh Jehová».

Akxni la tuku masputunan, nema kaj xakstu tsuku o tuku malakatsukikgo lakchixkuwin, ni kawaniyaw kinatalankan: «Tlan kalatapatit, katsitsijwantit, na kakgalhkgastit» (Sant. 2:15, 16). Wata liskujaw nakamaxkiyaw tuku maklakaskinkgo, la tlawakgolh kstalaninanin Cristo kxapulana siglo. Akxni katsikgolh pi xmima akgtum kilhtamaku xla tatsinksni «litachuwinilikgolh mpi wa lantla namakalay nchatunu, nalimakgtayakgoy namalakgachananikgokan natalanin nti xwilakgo kJudea» (Hech. 11:28-30).

Kskujnin Jehová xatapaxuwan kamaxkiputunaw tuku maklakaskinkgo tiku titaxtumakgo tuku tuwa, pero katsiyaw pi latamanin na maklakaskinkgo tuku xla Dios (Mat. 5:3). Xlakata nakamakgtayayaw nakatsikgo pi maklakaskinkgo Dios chu xlakata nalakgapaskgo, Jesús kamapakgsilh kstalaninanin kakamasiyanikgolh amakgapitsin (Mat. 28:19, 20). Kinchatunukan limaxtuyaw kinkilhtamakujkan, kilitliwakgakan chu tuku kgalhiyaw xlakata namakgantaxtiyaw uma taskujut. Chu la maklakaskinaw xkachikin Dios tumin nema xatapaxuwan mastakan xlakata nakamakgtayayaw tiku maklakaskinkgo, pero tlakg maklakaskinaw xlakata namakgtayayaw Tamapakgsin chu natalichuwinan xalakwan xalaksasti. Chuna limasiyayaw pi paxkiyaw Dios chu kintalatamankan (Mat. 22:37-39).

Tiku makgtayakgo taskujut nema xtatayananin Jehová tlawakgo xlikalanka katiyatni tlan liwana katsikgo pi tumin nema xatapaxuwan mastakgo ni akglakgwa maklakaskinkan. ¿Tlan makgtayanana xlakata natalan tiku titaxtumakgo tuku tuwa nakgalhikgo tuku maklakaskinkgo? ¿Makgtayanamputuna la talichuwinama xalakwan xalaksasti? Komo chuna, kuentajkatlawa xtastakyaw Proverbios 3:27: «Kakamakgtaya tiku maklakaskinkgo tamakgtay, komo kmimakan wi tlan nakamakgtayaya».