Tiku xalakgalhamana namakglhtinan tasikulunalin

MAKGASATA, lu xlakaskinka xlitaxtukgo tamakamastan akxni xkakninanikan Jehová. Israelitas xmakamastakgo animales chu kstalaninanin Cristo ankgalhin litalakgapaskgonit pi tlawakgo tamakamastan «xlakata nalimalankikgo». Pero wi atanu tamakamastan nema makgapaxuwa Dios (Heb. 13:15, 16). Tiku mastakgo lu paxuwakgo chu makglhtinankgo tasikulunalin, chuna la limasiyakgo umakgolh liʼakxilhtit.

Ana israelita xwanit chu lu xkgalhiputun chatum skgata, pero nila xkgalhi. Kʼakgtum oración malaknunilh Jehová pi komo xkgalhilh chatum kgawasa, xʼama makamaxki chu kskujnanilh «xliputum xlatamat» (1 Sam. 1:10, 11). Titaxtulh kilhtamaku, Ana kgalhilh chatum kgawasa tiku limapakuwilh Samuel. Akxni nialh matsikilh, lilh ktabernáculo xlakata naskujnani Jehová, chuna la xmalaknunit. Jehová sikulunatlawalh Ana xlakata tamakamastan. Xla kgalhilh kgalhkitsis xkamanan, chu Samuel palakachuwina litaxtulh chu na tsokgli Biblia (1 Sam. 2:21).

Chuna la Ana chu Samuel, kstalaninanin Cristo na kgalhiyaw talakgalhaman namakamaxkiyaw kilatamatkan xlakata naskujnaniyaw kiMalakatsukinakan. Jesús malaknulh pi namakglhtinanaw tasikulunalin xlakata tamakamastan nema natlawayaw xlakata skujnaniyaw Jehová (Mar. 10:28-30).

Dorcas kstalanina Cristo xwanit xalak pulana siglo chu lu xlitalakgapasa pi «tlan xkatsiy» chu «lu[...] xlakgalhaman[an]», wamputun xlakata tuku xtlaway xpalakata amakgapitsin. Lu nitlan xlakata «titatatlalh, [chu] nilh», chu natalan xalak xcongregación lu lilipuwankgolh. Akxni katsikgolh pi Pedro lakatsu xlama, tasaskinikgolh pi lakapala xlakgalh. Kalilakpuwanti la paxuwakgolh akxni Pedro chalh chu malakastakwanilh Dorcas. Wa uma xapulana talakastakwanat nema chatum apóstol tlawalh nema Biblia lichuwinan (Hech. 9:36-41). Dios ankgalhin lakapastakli xtamakamastan Dorcas (Heb. 6:10). Tuku titaxtulh kxlatamat tsokgwilika anta kBiblia, chu la uku tlan nastalaniya xliʼakxilhtit.

Apóstol Pablo na lu tlan liʼakxilhtit kimpalakatakan xlakata na lu kalakgalhamalh chu kamakgtayalh amakgapitsin. Katsokgnanilh kstalaninanin Cristo xalak Corinto: «Xlipaks kintapaxuwan naklimakgasputa wa ntu xakkgalhilh, asta maski lu[...]man kit naklimakgasputa lantla xlipaks ntu nkit xpalakata [milatamatkan]» (2 Cor. 12:15). Pablo katsinilh pi akxni wi tuku tlawayaw xpalakatakan amakgapitsin lipaxuwayaw chu wi atanu tuku lu xlakaskinka makglhtinanaw: tasikulunalin chu tlan nakinkaliʼakxilhan Jehová (Hech. 20:24, 35).

Xlikana pi Jehová lakgati nalimaklakaskinaw kinkilhtamakujkan chu kilitliwakgakan xlakata xTamapakgsin chu xlakata kinatalankan. Pero ¿wi tuku tlan natlawayaw? Chuna. Ni kajwatiya tlan tuku natlawayaw xpalakatakan amakgapitsin, na tlan nalimalankiyaw Jehová akxni xatapaxuwan mastayaw kintuminkan. Kintuminkan nema xatapaxuwan mastayaw limakgtayananaw xlakata chuntiya nalichuwinankan xtachuwin Dios. Akgtum liʼakxilhtit, kalimakgtayakan misioneros chu amakgapitsi tiku skujnanikgo Jehová putum kilhtamaku. Nachuna limaklakaskinkan xlakata tlan namatitaxtikan likgalhtawakga, videos kʼatanu tachuwin chu limakgtayanankan niku la akgtum talakgaputsit chu litlawakan Pukgalhtawakga xla xtatayananin Jehová. Liwana katsiyaw pi komo xalakgalhamananin nawanaw namakglhtinanaw tasikulunalin. Chu nachuna nalimaxkiyaw kakni Jehová «wantuku laklanka xtapalh» (Prov. 3:9; 22:9).

La makgtayanankgo makgapitsin ktaskujut nema tatlawa xlikalanka katiyatni

Xapulana kstalaninanin Cristo xlismanikgonit namakikgo tumin nema xmastakgo kcongregación. La uku lhuwa kstalaninanin Cristo nachuna tlawakgo chu mujukgo tumin niku wi caja de donaciones (1 Cor. 16:2). Akgatunu papaʼ, congregaciones malakgachakgo uma tumin ksucursal xla xtatayananin Jehová nema pulalin taskujut kpaís. Na tlan namalakgachaya tumin nema mastaputuna kxtukuwani nema maklakaskinkgo xtatayananin Jehová kxlakatin mapakgsinanin kmimpaís. Komo liwana katsiputuna xtukuwani niku malakgachakan tumin kaputsa ksitio xla Internet www.jw.org/top chu kachuwinanti ksucursal nema pulalin taskujut niku wila. Wa uma makgapitsi la tlan xatapaxuwan namastaya mintamakgtay.

XATAPAXUWAN MASTAKAN TUKU KGALHIKAN

Tlan natlawaya nema lilakgapaskan transferencia bancaria o tlan nalimaklakaskina tarjeta de débito o crédito. Na tlan nalimaklakaskina jw.org.
Tlan namastaya tumin, joyas o atanu nema kgalhi xtapalh. Komo chuna natlawaya, natamalakgachaya maktum carta niku nawana pi maskiwinampat.

TUKU MASTAYA PERO WI TUKU SKINA

Kilhchanima mastakan tumin pero tiku mastama tlan namaspitniparakan komo namaklakaskin.
Namalakgachaya maktum carta niku nawana pi wi tuku mastapat pero max alistalh namaklakaskimparaya.

ATANU LA TLAN NAMASTAYA MINTAMAKGTAY

Unu lichuwinan pulaklhuwa la tlan wi tuku namaskiwinana xlakata natlawakan xtaskujut Dios xlikalanka Katiyatni. Akxni nina maskiwinana tuku kgalhiya, kakgalhskininanti ksucursal xlakata nakatsiya komo tlan chuna tatlawa kmimpaís. Chuna nakatsiya tuku tlan namastaya niku wila. Xlakata tuku skinkgo mapakgsinanin talakgpali kʼakgatunu países, lu xlakaskinka naputsaya xtamakgtay tiku lu lakgapasa limapakgsin chu xlakata impuestos.

Seguros chu planes de jubilación: Komo wix kgalhiya seguro xla akxni nikan o tumin xla jubilación, wix tlan nawiliya kxtukuwani nema maklakaskinkgo xtatayananin Jehová kxlakatin mapakgsinanin xlakata wa namakglhtinan tumin.

Cuentas xalak banco: Tlan natsokgwiliya pi kamaklakaskinkgolh mintumin kxtukuwani nema maklakaskinkgo xtatayananin Jehová nema kgalhiya kbanco, akgtum certificado de depósito o tuku maxkika xla mijubilación akxni lapatku. Na tlan natsokgwiliya pi wa namakglhtinankgo mintumin komo wix naniya. Pero chuna natlawakan la wi limapakgsin xlakata bancos kpaís.

Acciones chu bonos: Tlan namaskiwinankan kxtukuwani nema maklakaskinkgo xtatayananin Jehová. Na tlan namatsokgninana maktum documento niku nawana pi acciones chu bonos nema kgalhiya wa nakamaxkikan akxni naniya.

Chiki chu tiyat: Komo wix kgalhiya chiki o tiyat nema tlan natasta, tlan nawiliya kxtukuwani nema maklakaskinkgo xtatayananin Jehová kxlakatin mapakgsinanin. Komo antaku wila, tlan nawana pi antaku natawilaya asta akxni nakiniya.

Testamentos chu fideicomisos: Wix tlan nawana pi akxni naniya, namastaya tiyat o tumin nema kgalhiya kxtukuwani nema maklakaskinkgo xtatayananin Jehová kxlakatin mapakgsinanin. Tlan chuna natlawaya kmintestamento kxlakatin notario o wa nawilikan xlakata nalitamakgtaya maktum fideicomiso. Komo chuna natlawaya ni tuwa katikitaxtulh akxni naxokgokan impuestos.

Komo tlakg katsiputuna la tlan pulaklhuwa namakgtayanana xlakata ktaskujut nema tatlawa xlikalanka Katiyatni, kalikgalhtawakga folleto Donaciones planificadas para favorecer el servicio del Reino en todo el mundo. Uma folleto wi kxaʼespañol chu kxaʼinglés. Xlakata limapakgsin kʼakgatunu países talakgpali, max ni putum katimaklakaskinti tuku talichuwinan. Liwana kkawaniyan pi akxni likgalhtawakganitata folleto, kakgalhskinti tiku lu lakgapasa limapakgsin chu xlakata impuestos. Lhuwa latamanin xatapaxuwan mastakgonit tuku kgalhikgo xlakata nalimakgtayanankgo taskujut nema tatlawama xlikalanka Katiyatni chu tlan kakitaxtuninit akxni xokgokgo xʼimpuestoskan. Komo uma folleto tatlawanit kmimpaís, tlan naskiniya secretario xalak mincongregación.

Komo tlakg katsiputuna katanu jw.org, chu kapita niku wan «La tlan xatapaxuwan namastaya tumin xlakata nalimakgtayanana xtaskujut Dios» asta niku sputa akgtum página, o kachuwinanti ksucursal nema pulalin taskujut niku wix lapat.