Xatapaxuwan ankgolh skujkgo kTurquía

KSTALANINANIN Cristo xalak pulana siglo liskujkgolh xlakata nakalitachuwinankgo «xalakwan xalaksasti tamakatsin xla xtamapakgsin Dios» lhuwa latamanin (Mat. 24:14). Makgapitsin ankgolh alakatanu kachikin. Akgtum liʼakxilhtit, apóstol Pablo kilalh kkachikin nema la uku anta wi Turquía chu anta lhuwa lichuwinalh Dios akxni misionero xwanit.a Alistalh kata 2014, akxni xtitaxtunita 2,000 kata, kTurquía tlawaka akgtum campaña xlakata talichuwinalh Dios. ¿Tiku tlawalh chu tuku xlakata?

«¿TUKU LAMA?»

Anta kTurquía wilakgolh liwaka 2,800 tiku lichuwinankgo Dios, pero liwaka 79 millones wilakgoka kʼama kachikin. Uma wamputun pi lata 28,000 latamanin kaj chatum tiku lichuwinan Dios. Chuna, tiku lichuwinankgo Dios kaj ni lhuwa latamanin litachuwinankgonit Dios. Uma campaña litlawaka xlakata tlakg nakalixakgatlikgokan latamanin xTachuwin Dios kaj ni makgas kilhtamaku. Akxni xtalichuwinama Dios, 550 natalan tiku xalak atanu países chu xchuwinankgo turco ankgolh kTurquía xlakata nakalitachuwinankgo Dios natalan tiku xala anta. ¿Tuku kitaxtulh xlakata ama campaña?

Lhuwa latamanin kalitachuwinanka Dios. Akgtum congregación xla Estambul tsokgli: «Latamanin kaniwa xʼakxilhkgo xtatayananin Jehová chu xkinkakgalhskinkgoyan komo xʼanan akgtum lanka tamakxtumit». Congregación xalak Izmir tsokgli: «Chatum chixku tiku skuja niku kgalhkgalhikan taxi lakgtalakatsuwilh chatum kgolotsin chu kgalhskilh: “¿Tuku lama? ¿Taliwakalh mintaskujutkan?”». Xlikana, uma campaña lu tlan kitaxtulh.

Natalan xalak atanu países lu lipaxuwakgolh xlakata lichuwinankgolh Dios. Steffen, xalak Dinamarca, wa: «Chali chali tlan xakkalitachuwinan Dios latamanin tiku nikxni a xkgaxmatkgo xlakata Jehová. Xakmakgkatsi pi xlikana xakmakatsininama xtukuwani Jehová». Chatum tala xalak Francia wanikan Jean-David tsokgli: «Akglhuwa horas xaklichuwinanaw Dios kʼakgtum tiji. ¡Lu tlan xwanit! Lhuwa ni xkalakgapaskgo xtatayananin Jehová. Kʼakgatunu malakcha, xakkatachuwinanaw latamanin, xakkamasiyaniyaw akgtum video chu xakkamakgxtakgniyaw maktum likgalhtawakga».

Lata 550 natalan makgxtakgkgolh 60,000 likgalhtawakga kaj akgtiy semanas. Chuna, campaña tlawalh pi lhuwa latamanin xkalitachuwinanka Dios.

Taliwakalh tapaxuwan la talichuwinan Dios. Campaña kamakgpuwantinilh natalan tiku xala anta. Lhuwa tsukukgolh lilakpuwankgo pi tlan putum kilhtamaku kskujnikgolh Jehová. Lata xwilakgolh precursores regulares kTurquía taliwakalh liwaka 24% umakgolh akgkutiy papaʼ lata makgapalalh campaña.

Tiku kilakgolh kʼama país lichuwinankgolh la lu tlan kitaxtulh la lichuwinankgolh Dios kcampaña asta akxni taspitparakgolh kxpaískan. Chatum tala xalak Alemania wanikan Şirin tsokgli: «Natalan xalak Turquía nituwa makgkatsikgo nalichuwinankgo Dios kkatijin. Akit lu tuwa kmakgkatsi xlakata lu kmaxanan. Pero kmatlanilh, xlakata uma campaña chu xlakata xliʼakxilhtitkan natalan tiku xala anta chu xlakata xaktlawa oración. ¡Asta tlan klichuwinalh Dios chu kmakgxtakgli tratados kmetro! Nialh lu kmaxanan la xapulana».

Johannes, chatum tala xalak Alemania, wa: «Kkatsinilh makgapitsi la tlan naklichuwinan Dios. Natalan xalak Turquía lu kalitachuwinamputunkgo Dios lhuwa latamanin chuna la namatlanikgo chu putum kilhtamaku kalitachuwinankgo Dios niku katekgskgo. Nachuna ktlawalh akxni ktaspitli kʼAlemania. Chu la uku tlakg kkalitachuwinan Dios latamanin».

Chatum tala xalak Francia wanikan Zeynep wa: «Campaña lu kimakgtayalh la naklichuwinan Dios, ni nakpekuan chu tlakg naklipawan Jehová».

Natalan makgkatsikgolh pi xlapaxkikgo xchatunukan. Tapaxkit tlawalh pi natalan makxtum xtawilakgolh maski xalak tanu tanu países xwankgonit. Jean-David, tiku lichuwinaw xapulana, wa: «Kaʼakxilhwi pi natalan lu tlan likatsikgo. La xʼamigoskan kinkaliʼakxilhkgon chu la xalak xfamiliajkan. Tlan kinkamakgamakglhtinankgon. Xakkatsi pi akinin akgtum familia litaxtuyaw xlikalanka Katiyatni, xlakata makglhuwa xaklikgalhtawakganit kkilikgalhtawakgakan. Pero la uku xlikana kakxilhli pi chuna. Lu klipaxuwa pi akit xtatayana Jehová. Kpaxtikatsini xlakata uma talakgalhaman».

Chatum tala xalak Francia wanikan Claire wa: «Kimputumkan akgtum familia xakwanitaw, maski xalak Alemania, Dinamarca, Francia o Turquía. Xtachuna la Dios xtiyalh lanka lixapan chu xapalh tuku xkamapapitsi akgatunu países».

Stéphanie, xalak Francia, nalichuwinalh: «Campaña kinkamasiyanin pi wa tuku makxtum kinkatlawayan ni wa talismanin o kintachuwinkan, wata wa tapaxkit nema kgalhiniyaw Jehová».

TAMAKGTAY NEMA ALISTALH NAKINKAMAKGTAYAYAN

Lhuwa natalan tiku makgtayanankgolh kcampaña tsukukgolh lakpuwankgo pi anta naʼankgo latamakgo kTurquía xlakata tlakg namakgtayanankgo klanka taskujut nema xlitatlawatku. Makgapitsi antiya lamakgolh kTurquía, chu lu tapaxtikatsini xtaskujutkan.

Akgtum liʼakxilhtit, kʼakgtum aktsu kachikin xwi akgtum grupo niku xwilakgo puxamakitsis tiku xlichuwinankgo Dios. Akglhuwa kata kaj chatum kgolotsin xwi. Pero kkata 2015, kgalhchaxan natalan xalak Alemania chu xalak Países Bajos anta ankgolh latamakgo xlakata namakgtayanankgo. ¡Natalan lu lipaxuwakgolh!

«KXALAKAPULANA SKUJKGO»

¿La makgkatsikgo natalan tiku lakskujmakgo kTurquía maski kaj tsinu kilhtamaku ankgonit? Xlikana, tsinu tuwa makgkatsikgonit, pero lhuwa tasikulunalin makglhtinankgo. Kaʼakxilhwi tuku wankgo makgapitsin.

Chatum tala tiku tamakgaxtokgnita wanikan Federico xalak España, kgalhi 40 kata, na alh latama kTurquía. Xla wan: «Ni lhuwa kgalhikan tuku lhuwa xtapalh kimakgtaya ni lhuwa tuku naklilakgaputsa chu kimaxki talakaskin wa kuenta naktlawa tuku tlakg xlakaskinka». ¿Lichuwinan xla pi na tlan chuna natlawayaw? Xla kgalhtinan: «¡Xlikana pi chuna! Akxni napina latapaya kʼatanu país xlakata nakamakgtayaya latamanin nalakgapaskgo Jehová, anta nalitasiya pi wix lipawana Jehová. Chu xlikana namakgkatsiya la kuentajtlawayan».

Rudy, chatum tala tiku tamakgaxtokgnita xalak Países Bajos tiku max kgalhi 60 kata, wan: «Lu klipaxuwayaw xlakata “kxalakapulana kskujaw” chu lhuwa latamanin kalitachuwinanaw Dios tiku nikxni xkgaxmatkgonit uma tamakatsinin. Akxilhkan la paxuwakgo akxni makglhtinankgo tuku xaxlikana lu lipaxuwakan».

Sascha chatum tala xalak Alemania tiku tamakgaxtokgnita chu max kgalhi 40 kata na alh latama kTurquía. Xla wan: «Ankgalhin akxni kan lichuwinan Dios, katekgsa latamanin tiku xlipulanajku xkgaxmatmakgolh tamakatsinin. Lu klipaxuwa xlakata kkamaxki talakaskin xlakata nalakgapaskgo Jehová».

Chatum tala puskat xalak Japón tiku tamakgaxtokgnita chu kgalhi 35 kata wanikan Atsuko lichuwinan: «Pulana xaklakaskin pi Armagedón lakapala xmilh. Pero akxni kalh latama kTurquía, lu kpaxtikatsini Jehová pi mastamajku kilhtamaku. Akxni kakxilha la Jehová pulalima uma taskujut, tlakg ktalakatsuwiniputun».

Alisa, chatum tala xalak Rusia tiku max tsinu liwaka 30 kata kgalhi, wan: «Skujnikan Jehová alakatanu kachikin kimakgtayanit nakkatsi pi xla tlan likatsi (Sal. 34:8). Jehová ni kaj xman wa kinTlat, nachuna chatum kiʼamigo tiku liwana klakgapasa maski tanu tanu tuku naktitaxtu. Lu klipaxuwa kilatamat, xlakata lu tlan tuku ktitaxtunit, chu lu laktlan tasikulunalin».

«KAʼUKXILHTIT NKAPUKUXTUN»

Paxtikatsiniyaw xlakata uma campaña, lhuwa latamanin kgaxmatkgonit xalakwan tamakatsinin xla Tamapakgsin. Pero lhuwaku wi niku ni a talichuwinan Dios. Natalan tiku ankgolh latamakgo anta kTurquía chali chali katekgskgo latamanin tiku nikxni kgaxmatkgonit xlakata Jehová. ¿Lakgatiya wix xlakskujni Dios kʼakgtum kachikin la uma? Komo chuna, kalakapastakti tuku wan Juan 4:35: «Kalakapitit, na kaʼukxilhtit nkapukuxtun, sampi lhmukukuta, na Iixkganata». ¿Tlan nakmakgtayanan kʼakgtum kachikin niku kapukuxtun max lhmukukuta, chu Iixkganata? Komo chuna, la uku talakaskin naliskuja xlakata nalakgchipina tuku lakapastakpat. Liwana kakatsi pi komo namaliwakaya la nalichuwinana Dios «asta awatiya kxtankgana tiyat» lhuwa tasikulunalin naliminiyan nixawa la lakpuwana (Hech. 1:8).