Lu tlan kitaxtu akxni maʼakgpitsiyaw invitaciones
Akgtutu semana akxni nina chin tamakxtumit xa akgtutu kilhtamaku, nakawanikgoyaw latamanin xlakata nakinkatatamakxtumikgoyan chu lu xlakaskinka namakgtayananaw kʼuma taskujut. Latamanin tiku kamaxkiw invitación kata nema titaxtukgonita lu kaks lilakawankgo taʼakgchuwin, chu la aktanks skujkgo natalan pulakatanu taskujut nema kalakgayawakanit chu la tlan tayat kgalhikgo natalan (Sal. 110:3; 133:1; Is. 65:13, 14). Xlakata kawaniyaw latamanin nakinkatatamakxtumikgoyan, ¿kaj watiya tlan kinkalakgminkgoyan tiku makgat wilakgolh?
Akxni xkgalhsputnita tamakxtumit xaʼakgtutu kilhtamaku kata 2011, akgtum sucursal makglhtinalh maktum carta xla chatum puskat tiku xkatatsekgni xtatayananin Jehová, tekgsli maktum invitación kxmalakcha. Carta xwan: «Kkgalhi akgtum lu stlan chiki chu kinchixku lu stlan likatsi, chu xaklakpuwan pi putum xakkgalhi tuku makgapaxuwanan. Pero ni chuna xwanit; ni xakpaxuwa kkilatamat. Uma tlawalh pi xamputulh klanka tamakxtumit kilhtamaku sábado, maski xmatlawanilh xputlaw 320 kilómetros». Lu lakgatilh tamakxtumit, tachuwinalh ktelefono chu wanilh pi xʼama tamakgxtakga xlakata na xʼamputun domingo. Xla wan: «Kkgaxmatli putum taʼakgchuwin chu lhuwa xtatayananin Jehová kkalakgapasli. Ni xaklakaskin pi xkgalhsputli». Alistalh tsukulh katakgalhtawakga xtatayananin Jehová, akgtati papaʼ titaxtulh tsukulh makglichuwinan Dios maski ni xtamununit. Xla wa: «¡Lu kpaxtikatsini xlakata ktekgsli invitación kkimalakcha! La uku lu kpaxuwa.»
Lu xlikana pi wi tiku naʼan tiku namakglhtinankgo invitación. Wa xlakata xatapaxuwan kamakgtayanaw kuma taskujut. Kalipi klanka tamakxtumit invitaciones nema kgalhiyaku, xlakata nalimaklakaskina komo wi tiku nalitachuwinana Dios.
[Recuadro xla página 5]
¿La namakgpitsiyaw invitación?
Xlakata tlan namastayaw invitación putum niku lichuwinanaw Dios, xlakaskinka ni lhuwa tuku nawanaw. Tlan nawanaw: «Tlen. Kmastamaw uma invitación xlikalanka katiyatni. Uma mila. Anta tlakg lhuwa tuku nakatsiya». Xatapaxuwan kamakgpitsi. Akxni namakgpitsiya sábado chu domingo, na tlan nakamaxkiya revistas komo lakgatikgo.