Lu xlakaskinka kaʼakxilhwi nalichuwinanaw Dios
1. ¿La limasiyalh Jesús pi lu xlakaskinka xakxilha nalichuwinan Dios?
1 Jesús lu xlakaskinka xakxilha nalichuwinan Dios. Xla lu liskujli uma, asta lhuwa kilómetros tlawalh xlakata lichuwinalh Dios xliputum Palestina, xlakata xkalitachuwinalh lhuwa latamanin tiku xkgaxmatniputunkgolh. Wa xlakata ni xlilakgaputsa lhuwa tuku nakgalhi, xlakata tlakg xlichuwinalh Dios chu ni atanu tuku xlitamakgapalilh (Mat. 8:20). Asta akxni latamanin machokgoputunkgolh xlakata xkamakuchikgolh xtatatlanin, wa: «Na chuna xlakaskinka amakgapitsin chuchutsipi [o latamanin] nakan mastay xatlan tamakatsinin xla xtapakgsin Dios; sampi wa yuma nkilimakaminkanit» (Luc. 4:43).
2. ¿Tuku xlakata Jesús lu xlakaskinka akxilhli nalichuwinan Dios?
2 ¿Tuku xlakata Jesús lu xlakaskinka akxilhli nalichuwinan Dios? Xlakata tlakg xlakaskinka xakxilha namasantujli xtukuwani Dios (Mat. 6:9). Nachuna xlakata lu xpaxki xTlat xalak akgapun: xtlawaputun Xtalakaskin chu xkgaxmatniputun putum Xlimapakgsin (Juan 14:31). Chu nachuna xlakata lu xlikana xkapaxki latamanin chu xkamakgtayaputun (Mat. 9:36, 37).
3. ¿La tlan nalimasiyayaw pi lu xlakaskinka akxilhaw nalichuwinanaw Dios?
3 La tlan natlawayaw la Jesús. Max akinin lu tuwa namakgkatsiyaw natlawayaw la Jesús, xlakata lhuwa kilhtamaku kinkamakglhtiyan uma kakilhtamaku chu putum tuku kinkamalaknuniyan (Mat. 24:37-39; Luc. 21:34). Wa xlakata talakaskin nakatsiyaw tuku tlakg xlakaskinka chu kalakaxwiliw kinkilhtamakujkan xlakata nalakaxwiliyaw tuku nawanaw akxni naʼanaw lichuwinanaw Dios chu tlan lhuwa kilhtamaku nataxtuyaw (Fili. 1:10). Nachuna kaliskujwi xlakata ni lhuwa tuku nakgalhiputunaw kkilatamatkan chu ni natlawayaw putum tuku tlawa kakilhtamaku (1 Cor. 7:31).
4. ¿Tuku xlakata la uku lu xlakaskinka naʼakxilhaw nalichuwinanaw Dios?
4 Akxni ni kgalhi lhuwa kilhtamaku, chixku tiku liwana lakapastaka katsi tuku pulana natlawa. Akgtum liʼakxilhtit, komo talakatsuwima akgtum lanka un, limaklakaskin xkilhtamaku chu xlitliwakga xlakata nitu nakaʼakgspula xfamilia chu xlakata nakamakatsini xtalakatsunin. ¿Nixlikana pi ni atanu tuku natlawa? Nachuna, nialh lhuwa kilhtamaku tsankga xlakata namin Armagedón (Sof. 1:14-16; 1 Cor. 7:29). Wa xlakata, komo lakgmaxtuputunaw kilatamatkan chu xlatamat tiku kinkakgaxmatniyan, kuenta nakinkatlawakanan chu la masiyayaw, anta kcongregación o ni anta (1 Tim. 4:16). Xlikana, xlakata tlan nalakgtaxtuyaw xlakaskinka naʼakxilhaw nalichuwinanaw Dios.