¿Katsiya tuku tlan natlawaya?
Xlikalanka katiyatni tlakg talhuwima pumakuchin niku ni maklakaskinkan kgalhni akxni chukunankgo. Chu wix, ¿liwana katsiya tuku tlan natamaklakaskin xlakata ni nawilinikana kgalhni? Komo nakatsiya tuku tlawakgo makuchinanin akxni chukunankgo o tuku limakuchinankgo namakgtayayan nalaksaka tuku nalimakuchikana. Kkawaniyan pi pulana kaʼakxilhti video La negativa a la sangre. La medicina acepta el reto. Alistalh, katlawa oración chu kalimaklakaskinti takgalhskinin nema wi unu xlakata nakatsiya komo akgatekgsti. Nota: Video limin tiku kachukumaka, wa xlakata kkawaniyaw natlatni pi kuenta natlawakgo akxni nakataʼakxilhkgo laktsu xkamanankan.
(1) ¿Tuku xlakata xtatayananin Jehová ni makglhtinankgo kgalhni? (2) ¿La lakaskinkgo nakamakuchikan xtatayananin Jehová? (3) ¿Tuku wa lakgchan natlawa tiku an kpumakuchin? (4) ¿Tuku xlakata tlan chu chuna xlilat nalaksakaw atanu tuku nakinkalimakuchikanan chu ni kgalhni? (5) Akxni wi tiku lhuwa makgan kgalhni, ¿tuku pulaktiy nema lu xlakaskinka xlitlawatkan makuchinanin? (6) ¿Tuku pulaktati tlawakgo makuchinanin xlakata ni nawilikgo kgalhni? (7) ¿La natlawakgo makuchinanin xlakata 1) ni lu natamakgan kgalhni, 2) ni natamakgan globulos rojos, 3) tlan namalhuwikgo kgalhni chu 4) ni namastakgo talakaskin natamakgan kgalhni? (8) Kawanti tuku wamputun 1) hemodilución chu 2) recuperación de sangre. 9) ¿Tuku milikatsit akxni nawanikana pi wi atanu tuku tlan nalimaklakaskinkan xlakata ni nawilinikana kgalhni? (10) ¿Tlan nachukukan chatum lataman chu ni nawilinikan kgalhni maski namakgapala chu maski tuwa? (11) ¿Tuku lu tlan tlawamakgolh makuchinanin?
Komo wi tiku namakglhtinan makgapitsi tuku likuchunkan nema taxtu kvideo, xakstu nalaksaka chuna la wi xtalakapastakni xlakata tuku katsininit kBiblia. ¿Liwana katsiyata tuku namakglhtinana nema maklakaskinkgo makuchinanin akxni natatatlaya chu xla minkamanan? ¿Tsokgwili ktarjeta DPA (directriz médica) tuku lakaskina? Akxni nina malakgatsamaya kalikgalhtawakga «Preguntas de los lectores» nema limin La Atalaya 15 xla junio kata 2004 chu 15 xla octubre kata 2000. Na kaʼakxilhti takgalhskinin xla suplemento «¿Qué opino de las fracciones sanguíneas y de los procedimientos médicos que impliquen el uso de mi sangre?», xla Nuestro Ministerio del Reino xla noviembre kata 2006 xlakata nakatsiya tuku namakglhtinana chu tuku ni katimakglhtinanti. Akxni laksaktita tuku namakglhtinana, liwana katsokgwili ktarjeta DPA. Nachuna, tiku kaliyawanita napalakachuwinanan chu atanu xalak mifamilia tiku ni xTatayana Jehová na xlikatsitkan tuku laksaknita.