Lu lhuwa nalichuwinankan
1. Maski nalakgatikgo taʼakgchuwin, ¿tuku max na nalakgatikgo tiku naʼankgo tamakxtumit?
1 ¿Tuku kilhtamaku? Akxni natalakapastaka akxni tinilh Jesús. Wa xlakata liskujmaw xlakata nakawaniyaw putum latamanin. Chu lakaskinaw pi ni kajwatiya nalakgatikgo tuku nakgaxmatkgo, na lakaskinaw kalakgatikgolh tuku naʼakxilhkgo. Chatum puskat tiku kilalh ktamakxtumit, lichuwinalh la likatsinikgolh tiku kilakgolh ktamakxtumit chu na lichuwinalh pi lu stlan chu skulunku xwanit putamakxtumit nema xtlawakgonit tiku xatapaxuwan skujkgo chu ni kaxokgonika. ¿Tuku kinkamasiyaniyan? Pi kimputumkan chu ni kajwatiya tiku akgchuwinan kinkalakgchanan natlawayaw tlan nalichuwinankan Dios putum kilhtamaku (Efe. 4:16).
2. ¿La tlan kimputumkan natlawayaw pi tiku kinkalakgapaxialhnamakgon tlan kalichuwinankgolh Dios?
2 Lipaxaw kakamakgamakglhtinanti tiku naʼankgo ktamakxtumit. Akxni lipaxuw kamakgamakglhtinanaw tiku kinkalakgapaxialhnaman natlawa pi tlan nalichuwinankan Dios (Juan 13:35). Maski wix nila nakatachuwinana putum tiku naʼankgo ktamakxtumit tlan nakamakgachipaya tiku lakatsu tawilakgon (Heb. 13:1, 2). Kuenta katlawa komo naʼan tiku niti lakgapasa ktamakxtumit: max wa tiku makgamakglhtinalh invitación nema tamakgpitsilh. Tlan xkgalhskinti: «¿Xlimakgtumku kilalakgapaxialhnamaw?». Komo nawaniyan pi chuna, kawani pi tlan napaxtutawilayan chu tlan nakgalhskinan tuku katsiputun. Komo lakapala nataxtu mincongregación xlakata natanu atanu, tlan xwani: «Kkatsiputun la akxilhti tamakxtumit. ¿La tlan xaktachuwinamparan?».
3. ¿Tuku natlawayaw xlakata tlan namakgkatsikgo tiku nialh lichuwinankgo Dios akxni natalakatsuwikgo?
3 Lipaxuw kakamakgamakglhtinanti tiku nialh lichuwinankgo Dios. Tamakxtumit akxni natalakapastaka akxni tinilh Jesús max naʼankgo tiku nialh lichuwinankgo Dios, nachuna tiku kaj makgtum ankgo ktamakxtumit akgatunu kata. Xatapaxuwan kamakgamakglhtinanti chu kakalimasiyani pi paxuwaya xlakata kaʼakxilhpapara (Rom. 15:7). Nachuna, alistalh lakgkgolotsin tlan nakalakgapaxialhnankgo kxchikkan xlakata nakawanikgo pi tlan chuntiya naʼankgo tamakxtumit. Kskinaw kioracionkan pi tiku naʼankgo tamakxtumit namalankikgo Dios, ni kajwatiya xlakata tuku nakgaxmatkgo nachuna xlakata tuku naʼakxilhkgo “kilatamatkan ntu ntlan ntlawayaw, nalimaxkikgoy nkakni Dios akxni nachin nkilhtamaku nalakgalhamankgoy” (1 Ped. 2:12).