Xatapaxuwan kakamakgamakglhtinanti

¿Tiku tlan nakamakgamakglhtinanaw? Kaxatikawa tiku namin kkintamakxtumitkan, lata tiku makgtumku mima asta tiku makgasa lakgapasaw (Ro 15:7; Heb 13:2). Max chatum kintalakan tiku xalak atanu país kinkalakgapaxialhnaman o chatum kstalanina Cristo tiku nialh lichuwinan Dios xlimakgtumku mimapa. ¿La xmakgkatsi wix komo chuna xtitaxtu? ¿Ni xlakgati pi tlan xmakgamakglhtinanka? (Mt 7:12). Wa xlakata xlakaskinka naliskujaw na’anaw kapakgachipayaw amakgapitsin akxni nina tsuku tamakxtumit chu akxni sputnita. Uma namakgtayanan pi na’anan tapaxuwan chu tapaxkit chu namalanki Jehová (Mt 5:16). Xlikana, max nila putum katikatachuwinaw. Pero putum tlan namakgkatsikgo komo tlan nakamakgamakglhtinanaw.a

Putum kilhtamaku tlan nakamakgamakglhtinanaw, ni kajwatiya akxni wi tuku xlakaskinka tlawamaw la akxni lakapastakkan akxni tinilh Cristo. Akxni tiku xlimakgtumku minkgo akxilhkgo pi kstalaninanin Cristo lapaxki max namalankikgo Dios chu akxtum nakinkatatapakgsikgoyan kxaxlikana takanajla (Jn 13:35).