Xatapaxuwan kakamakgamakglhtinaw
1. ¿Tukuya kilhtamaku lu tlan xlakata nalichuwinanaw Dios chu tuku xlakata?
1 Akgatunu kata akxni talakapastaka akxni tinilh Cristo lu tlan kilhtamaku xlakata lu nalichuwinanaw Dios. Uma kata max naminkgo liwaka akgkaw millón latamanin chu nakgaxmatkgo pulaktiy xlakata talakgmaxtut nema litasiya pi lu kinkapaxkikanan (Juan 3:16; 15:13). Nachuna nakatsikgo tuku tasikulunalin tlan makgamakglhtinankgo xlakata uma xtamaskiwin Jehová (Is. 65:21-23). Pero tiku namasta taʼakgchuwin ni kajwatiya tiku nalichuwinan Dios uma kilhtamaku. Putum tiku anta natawilayaw na tlan natlawayaw komo xatapaxuwan nakamakgamakglhtinanaw tiku naʼankgo (Rom. 15:7).
2. ¿La tlan nakamamakgkatsiniyaw wantiku naʼankgo akxni natalakapastaka akxni tinilh Cristo?
2 Ni kajwatiya naputsayaw niku natawilayaw chu kaks nakgalhkgalhiyaw katsukulh taʼakgchuwin, wata kakatalakatsuwiniw chu kakatachuwinaw tiku ankgonit. Tiku naʼankgo max ni katsikgo la natlawakan chu pekuankgo. Komo chuna, lu tlan namakgkatsikgo komo xatapaxuwan nakatachuwinanaw chu nakatalitsinaw. Max minkgolh ktamakxtumit xlakata kamaxkika maktum invitación. Xlakata nakatsiyaw, tlan xkakgalhskiw komo xlimakgtumku minkgonit ktamakxtumit o wi tiku lakgapasa xalak congregación. Max tlan xkawaniw komo kinkatatawilaputunan xlakata xkataʼakxilhwi kibibliajkan chu kilibrojkan xla takilhtlin. Komo maklakaskimaka kkinpukgalhtawakgakan, max tlan xmalakgapasniw tsinu. Akxni sputnita nawan taʼakgchuwin nakawaniyaw komo kgalhikgo takgalhskinin. Komo congregación lakapala xlitaxtut xlakata atanu natanukgo, tlan xkawaniw: «Kkatsiputun tuku lakpuwana xlakata uma tamakxtumit. ¿La tlan naktekgsan?». Chu liwana kakatalakkaxla xlakata nakatachuwinamparaya. Komo naʼankgo tiku nialh lichuwinankgo Dios uma lakgkgolotsin nakamakgtayakgo chu nakamakgpuwantinikgo.
3. ¿Tuku xlakata tlakg xlakaskinka nakatalakatsuwiniyaw tiku naʼankgo akxni natalakapastaka akxni tinilh Cristo?
3 Makgapitsi tiku naʼankgo xakgasiya akxni naʼakxilhkgo la paxuwakgo, tlan latalalinkgo chu makxtum wilakgo xlakskujnin Jehová (Sal. 29:11; Is. 11:6-9; 65:13, 14). ¿La nakinkaʼakxilhkgoyan tiku naminkgo kkintamakxtumitkan? Lu tlan, komo naliskujaw xlakata lu tlan nakamakgamakglhtinanaw.