¿Tlan xtitaxtu kMacedonia?
1. ¿Tuku xlakata Pablo chu xcompañeros titaxtukgolh kMacedonia?
1 Kata 49 xla kinkilhtamakujkan, apóstol Pablo alh kʼAntioquía xla Siria akxni xlimakgtiy alh lichuwinan Dios chu ama lakgapaxialhnan Éfeso chu amakgapitsin kachikinin xalak Asia Menor. Pero xlakata xlitliwakga espíritu santo wanika «katat kMacedonia». Xla chu xcompañeros xatapaxuwan makglhtinankgolh uma taskujut, chu kgalhikgolh akgtum talakgalhaman xlakata matsukikgolh xapulana congregación ama kkachikin (Hech. 16:9, 10; 17:1, 2, 4). Xlakata tlakg lhuwa latamanin katsiputunkgo xtachuwin Dios kkinkilhtamakujkan, na lu talakaskin tiku namakgtayanan kmakgapitsin kachikin xlikalanka katiyatni (Mat. 9:37, 38). ¿Makgtayanamputuna kʼuma taskujut?
2. ¿Tuku xlakata makgapitsin makgkatsikgo pi nila ankgo kʼatanu país?
2 Max wix misionero wamputuna chuna la Pablo, pero max nina lakapastaka napina kʼatanu país. Max la wi milatamat ni maxkiyan talakaskin napina kʼEscuela xla Galaad, xlakata ni makgatsiya minkata, max wix chatum tala tsumat tiku nina tamakgaxtokgnita o kamakgastakpakgojku minkamanan. Max nitu lakpuwanita napina kʼatanu kachikin xlakata lakapastaka pi nila katikatsini atanu tachuwin o xlakata nialh akchaniyan tumin chu la uku tuwa makgkatsiya napimparaya kʼatanu país. Pero max akxni tlawanitata oración chu liwana nalakapastaka, naʼakxilha pi tlan napina kʼatanu país niku tlakg talakaskin tamakgtay.
3. ¿Tuku xlakata ni talakaskin naʼanaw kGalaad xlakata tlan namakgtayananaw kʼatanu país?
3 ¿Lu xlakaskinka naʼanaw kGalaad xlakata tlan nalichuwinanaw Dios? Xlakata tlan xkakitaxtunilh taskujut nema tlawakgolh Pablo chu amakgapitsi xtalakaskin pi xlipawankgolh Jehová chu xʼespíritu santo (2 Cor. 3:1-5). Wa xlakata, maski nila napina kGalaad, tlan namakgtayanana kʼatanu país. Na kalakapastakti pi tlan namakgtayayan tastakyaw nema tamasta ktamakxtumit Niku Masiyakan la Lichuwinankan Dios chu Tamakxtumit xlakata xTaskujut Dios. Komo pimputuna kGalaad o kʼatanu escuela, tlan napina kʼatanu país niku tlan namakgtayanana chu tuku nakatsiniya anta, namakgtayayan komo napina kʼescuela.
4. ¿Tuku xlakata tiku linkgoya kata ni nalakpuwankgo pi nila katiʼankgolh makgtayanankgo kʼatanu país?
4 Tiku lichuwinankgo Dios nema laklankata. Natalan tiku linkgoya kata chu tliwakga kgalhikgo xtakanajlakan chu na ni lu tatatlakgo lu namakgtayanankgo kpaíses niku ni anan tiku lichuwinankgo Dios. ¿Tajubilarlinita? Wilakgo makgapitsi tiku maski kaj tsinu kamaxkikan tumin, lakkaxwilikgo xlakata tlan naʼankgo makgtayanankgo niku ni lu anan tumin chu ni lu tapalaxla matajinankgo makuchinanin chu nachuna amakgapitsi tuku maklakaskinkan nixawa kxpaískan.
5. Kalichuwinanti chatum tala tiku tajubilarlilh chu alh kʼatanu país.
5 Chatum tala kgolotsin chu precursor xalak akgtum país niku chuwinankan inglés akxni tajubilarlilh alh kʼakgtum país xalak Asia niku lu lakgapaxialhnankan xlakata tlan namakgtayanan kʼakgtum grupo tiku xchuwinankgo inglés niku kaj xwi kgalhnajatsa tiku xlichuwinankgo Dios chu xlakan xkalitachuwinankgo Dios 30,000 tiku ni xala anta xwankgonit. Titaxtulh akgtiy kata tsukukgolh tamakxtumikgo 50. Tala wan: «Lu lanka tasikulunalin kkgalhinit xlakata kkalh kʼuma kachikin. Ni kintiakchanilh kilhtamaku xlakata nakkalitachuwinanan tasikulunalin nema kkgalhi».
6. ¿La kitaxtunilh chatum tala tiku ni tamakgaxtokgnit akxni alh makgtayanan niku ni lhuwa xʼanan tiku xlichuwinankgo Dios?
6 Natalan laktsuman tiku ni tamakgaxtokgkgonit. Jehová lu lhuwa kalimaklakaskinit natalan laktsuman xlakata natalichuwinan xalakwan xalaksasti kʼatanu países niku lu talakaskin tiku lichuwinankgo Dios (Sal. 68:11). Chatum tala tsumat xlakpuwanit naʼan kʼatanu país xlakata tlakg namaliwaka la skujnima Dios, pero xnatlatni xlilakgaputsakgo xlakata ni xlakaskinkgo pi wi tuku xakgspulalh. Wa xlakata xla laksakli akgtum país niku ni anan taʼakglhuwit xlakata política chu tlakg tlan wi xlakata tumin, xla tsokgnalh ksucursal chu wanika tuku namakgtaya chu tuku xlitlawat. Akgchaxan kata nema xwilacha kʼuma país kgalhilh lhuwa tasikulunalin. Xla wan: «Kkinkachikin nila xaktikamakgalhtawakgalh lhuwa latamanin. Pero akxni kalh makgtayanan niku ni lu xʼanan tiku xlichuwinankgo Dios, chalhuwa ktsukulh kamakgalhtawakga chu kkatsinilh la tlakg tlan xakmasiyalh tuku wan Biblia».
7. Kawanti tuku tlawalh akgtum familia tiku ankgolh kʼatanu kpaís.
7 Familias. ¿Lakpuwana pi komo kgalhiya kamanan nila pina alakatanu país xlakata tlakg nalichuwinana Dios? Akgtum familia tiku kgalhi chatiy kamanan tiku kgalhikgo akgtsayan chu akgkaw kata, lakpuwankgolh chuna natlawakgo. Xatse wan: «Klipaxuwayaw pi kinkamanankan unu stakkgolh, xlakata tlan katalalinkgolh precursores especiales chu misioneros. Xlikana, xlakata kmakgtayanaw niku talakaskin tamakgtay lu tlan kinkamamakgkatsinin».
8. ¿Tlan namakgtayanana kʼatanu país maski ni nakatsiniya atanu tachuwin? Kawanti tuku xlakata.
8 Nila chuwinana xtachuwinkan. ¿Ni pimputuna xlakata lu tuwa makgkatsiya nakatsiniya atanu tachuwin? Max tuku wix chuwinana na chuwinankan niku ni anan lhuwa tiku lichuwinankgo Dios. Akgtum tamakgaxtokgat tiku chuwinankgo inglés ankgolh kʼatanu país niku chuwinankan español chu anta wilakgo lhuwa tiku xtachuwinankan wa inglés. Betel kawanilh tuku congregaciones xaʼinglés tlakg maklakaskin tamakgtay. Xlakan laksakkgolh akgtum chu makgtiy lakgapaxialhnankgolh. Taspitparakgolh xchikkan, nialh lhuwa tumin tsukukgolh maklakaskinkgo akgatunu papaʼ chu akgtum kata tsukukgolh makikgo tumin. Akxni ankgolh makgtayanankgo, natalan xalak congregación kataputsakgolh niku natawilakgo.
9, 10. ¿Tuku xlakpuwankgolh natlawakgo tiku ankgonit kʼatanu país chu tuku xlakata?
9 Tiku ankgo latamakgo kʼatanu país. ¿Pit kʼatanu país akxni nina xkgalhtawakgaya? Max talakaskin tiku nalichuwinankgo Dios kpaís niku xwila. ¿Lakpuwanita nataspitparaya xlakata namakglichuwinana Dios? Max ni tuwa katitekgsti taskujut chu niku natawilaya nixawa tiku xalak atanu kachikin chu max katsiyata xtachuwinkan. Nachuna, max wix tlakg nakgaxmatnikgoyan nixawa tiku ni xala anta.
10 Chatum chixku xalak Albania chalh kItalia xlakata xtsalama. Anta tekgsli akgtum tlan taskujut chu tlan xkamalakgachani tumin xfamilia. Alistalh katsinilh tuku xaxlikana chu tsukulh kamasiyani precursores especiales tachuwin xalak Albania xlakata xʼamakgo makgtayanankgo kʼuma kachikin. Tala tsokgnalh: «Xlakan xʼamakgo kkachikin nema xakmakgxtakgnit chu maski ni xkatsinikgo tachuwin xalak Albania lu xapaxuwana xʼamakgo. Xlakata xakchuwinan chu xakstaknit kʼAlbania, ¿tuku xaktlawama kʼItalia?». Tala lakpuwa pi nataspita kxpaís xlakata namakglichuwinan xalakwan xalaksasti. Na wan: «Nikxni klakpuwan pi nitlan xlakata kmakgxtakgli taskujut chu tumin nema xakkgalhi kʼItalia. Ktekgsli kʼAlbania tlakg tlan taskujut, akit kakxilha pi taskujut nema tlakg xlakaskinka chu tuku xlikana makgapaxuwanan wa skujnikan Jehová chu putum tuku nakgalhiya».
11, 12. ¿Tuku xlitlawatkan tiku lakpuwamakgo naʼankgo lichuwinankgo Dios kʼatanu país?
11 La tlawakan. Akxni espíritu santo nina xpulalin kMacedonia, Pablo chu tiku xtaʼankgo chuntiya xʼamputunkgo kʼoeste. Pero komo kawanika pi nialh xʼankgolh niku xʼamakgo, ankgolh knorte (Hech. 16:6). Akxni lakatsuwa xwi Bitinia, Jesús ni kamaxkilh talakaskin xtanukgolh kkachikin (Hech. 16:7). La uku, Jehová limaklakaskin xKgawasa xlakata nakinkawaniyan niku nalichuwinanaw xtachuwin (Mat. 28:20). Wa xlakata, komo lakapastakpat pi napina kʼatanu país, katasaskini Jehová xtamakgtay (Luc. 14:28-30; Sant. 1:5; kaʼakxilhti recuadro «¿La nakkatsi komo kpaís niku kamputun maklakaskin tamakgtay?»).
12 Kakawani lakgkgolotsin xalak congregación tuku tlawaputuna o kakawani atanu natalan tiku tlakg tliwakga wi xtakanajlakan chu kakawani pi kawanikgon tuku lakpuwankgo (Pro. 11:14; 15:22). Kalikgalhtawakga tuku liminit likgalhtawakga xlakata tiku amputun makgtayanan atanu país chu kaputsa la wi país niku pimputuna. ¿Tlan xpit kʼuma país chu tlan xtamakgxtakgti maski kaj tsinu kilhtamaku? Komo pimputuna latapaya kʼuma kachikin, talakaskin pi natsokgnaniya Betel xalak mimpaís xlakata namakgtayayan. Kaputsa dirección klibro Anuario xla uma kata. Pero carta ni wix namalakgachaya kBetel wata kakamaxki lakgkgolotsin xalak mincongregación chu xlakan na natsokgkgo xlakata taskujut nema tlawapat (kaʼakxilhti libro Organizados para hacer la voluntad de Jehová kpágina 111 chu 112).
13. ¿La namakgtayayan Betel chu tuku miakstu nalakkaxtlawaya?
13 Betel namalakgachaniyan tuku milikatsit xlakata país chu namakgtayayan tlakg tlan nalaksaka tuku tlawaputuna. Pero ni katimaxkin kapsnat nema skinkgo mapakgsinanin, la nema talakaskin xlakata namaxkikana mi visa o namaxkikana kapsnat nema wan pi tlan anta latapaya, na ni katimalakgachanin carta niku nawaniyan pi kapit makgtayayanana kʼakgtum kachikin chu na ni katixokgonin tuku namaklakaskina. Na ni katiputsanin niku natamakgxtakga. Wix natlawaya putum tuku natalakaskin akxni nina napina kʼatanu país. Wix nakatachuwinana embajada o consulado xlakata nawanikana tuku talakaskin xlakata namaxkikana mi visa o namaxkikana talakaskin naskuja niku napina. Tiku amputunkgo kʼatanu país xlakaskinka pi xakstukan nalakkaxtlawakgo xkapsnatkan chu tuku namaklakaskinkgo (Gál. 6:5).
14. ¿Tuku militlawat komo napina kʼpaíses niku ni mastakan talakaskin natalichuwinan Dios o komo lakapastakpat napina latapaya anta?
14 Kpaíses niku ni mastakan talakaskin nalichuwinankan Dios. Kmakgapitsi países, natalan liwana laksakkgo tiku nakalitachuwinankgo Dios (Mat. 10:16). Natalan tiku ankgo makgtayanankgo kpaíses niku ni mastakan talakaskin natalichuwinan Dios maski ni chuna tlawaputunkgo max natlawakgo pi mapakgsinanin naʼakxilhkgo taskujut nema tlawamaw chu katuwa nawilikgo xlatamatkan kinatalankan xala kʼuma país. Komo lakapastakpat napina kʼuma países, kamaxki lakgkgolotsin akgtum carta xlakata xlakan namalakgachakgo kBetel.
15. Komo nila pina kʼatanu país, ¿la tlan namaliwakaya la skujniya Dios?
15 ¿Chu komo nila pina k’atanu país? Komo wix nila pina kʼatanu país nitu kapuwanti. Max “luwa lakalhuwa ntani luwa namininiyan naskuja” (1 Cor. 16:8, 9). Max superintendente de circuito katsi xlakata akgtum congregación niku lakaskin tamakgtay. Max tlan namakgtayanana kʼakgtum congregación o grupo xla atanu tachuwin. Na tlan namaliwakaya la lichuwinana Dios kmincongregación. Kalakapastakti pi maski nila pina o tlan napina kʼatanu país wantuku tlakg xlakaskinka wa naskujnaniya Jehová xliputum minaku (Col. 3:23).
16. ¿Tuku kilitlawatkan komo wi tiku nakinkawaniyan pi amputun makgtayanan kʼatanu país?
16 ¿Lakgapasa chatum kstalinanina Cristo tiku tliwakga wi xtakanajla chu amputun kʼatanu país? Kawani pi tlan naʼan chu kamakgtaya. Akxni Pablo taxtulh kAntioquía nema xtapakgsi kSiria, xliʼakgtutu kachikin nema tlakg lanka xwanit anta klanka tamapakgsin xla Roma (Roma chu Alejandría wa tlakg laklanka xwankgonit). Xlikana, xlakata lhuwa xʼanan niku xlichuwinankan Dios kcongregación xtalakaskin pi Pablo anta xtamakgxtakgli. Maski chuna, Biblia ni wan pi natalan wanikgolh Pablo pi ni xʼalh xlakata tlan xtamakgxtakgli. Tlan akxilhkgolh tuku xtlawama Pablo xlakata xkatsikgo pi «mpukuxtu, wa nkatuxawat» (Mat. 13:38).
17. ¿Tuku xlakata tlan kitaxtu komo “natitaxtuyaw kMacedonia”?
17 Pablo chu amakgapitsi makglhtinankgolh lhuwa tasikulunalin xlakata kgaxmatkgolh akxni kawanika pi xtitaxtukgolh kMacedonia. Anta kFilipos lakgapaskgolh Lidia, «xmaxkiy nkakni Dios, cha nchu lantla xkgaxmatma, wa xnaku malakkinilh nkimPuchinakan, lakimpi nakanajlaniy wa ntu xwan mPablo» (Hech. 16:14). Kaj kalakpuwanti la paxuwakgolh Pablo chu amakgapitsin misioneros akxni Lidia chu xfamilia tamunukgolh. Kʼakglhuwa países lamakgo lhuwa latamanin tiku xlikana katsiputunkgo chuna la Lidia, tiku nina kgaxmatkgo xlimapakgsin Dios. Komo wix “natitaxtuya kMacedonia,” nakgalhiya lanka talakgalhaman xlakata nakatekgsa latamanin tiku tlan nakamakgtayaya nakatsinikgo xlakata Dios.
[Recuadro xla página 5]
«¿La nakkatsi komo país niku kamputun maklakaskin tamakgtay?»
• Kaʼakxilhti Anuario nema aku taxtunit chu kaʼakxilhti la kgalhlit lakgchan nakalakgapaxialhnan chatum tiku lichuwinan Dios.
• Kalimaklakaskinti Índice xlakata naputsaya artículos xlakata país niku pimputuna chu tuku tlan liʼakxilhtit kgalhikgonit.
• Kakatachuwinanti natalan tiku kilakgonit kʼuma kachikin o anta xlamakgo.
• Komo lichuwinamputuna Dios ktachuwin nema wix chuwinana, kaputsa kʼInternet xlakata nakatsiya komo kʼuma kachikin anankgo lhuwa latamanin tiku chuwinankgo mintachuwin.