Katatlawalh xtalakaskin Dios
1. ¿Tuku nawanikan tamakxtumit xaʼakgtum kilhtamaku nema natsuku septiembre 2011 asta agosto 2012, chu tuku xlakata lu xlakaskinka naʼakxilhaw uma tema?
1 Kimputumkan Jehová kinkatlawan xlakata xtalakaskin (Apo. 4:11). Xlakata nalipaxuwayaw kilatamatkan kilikatsitkan tuku xtalakaskin Jehová chu kilitlawatkan. Maski uma ni lu tuwa tasiya, lu tuwa xlakata naliskujaw ni natlawayaw tuku nitlan «wantu xtalakaskin nkiliwakan, chu ni tlan nkintalakapastaknakan» o «xtalakaskinkan wanti xakgmakgat chixkuwin», uma wamputun xalak kakilhtamaku (Efe. 2:3; 1 Ped. 4:3; 2 Ped. 2:10). Komo Dios ni xkinkamakgtayan, Akgskgawini “xkinkachipan xkinkamatlawin lantla lakaskin” (2 Tim. 2:26). Lanka tamakxtumit xaʼakgtum kilhtamaku xla kata 2012 kinkamakgtayayan chuna natlawayaw la wan xliʼakgtutu tuku skilh Jesús kʼoración tuku lilakgapaskan padrenuestro (Mat. 6:9, 10). Tamakxtumit wanikan «Katatlawalh xtalakaskin Dios».
2. ¿Tukuya takgalhskinin natakgalhti kxalanka tamakxtumit xaʼakgtum kilhtamaku?
2 Takgalhskinin nema natakgalhti. Akxni natawila tamakxtumit, kuenta katlawa xlakata nakgaxpata xtakgalhtin umakgo takgalhskinin: Akxni nakgaxmataw xTachuwin Dios, ¿tuku na xlakaskinka kilitlawatkan? ¿La nakatsitilhiyaw tuku xtalakaskin Dios kimpalakatakan? ¿Tuku xlakata namakgtayaputunkgoyaw putum latamanin? ¿La natlawayaw xlakata xatapaxuwan nakgalhiyaw kilatamatkan? Kamanan, ¿tuku milimasiyanitkan Jehová? ¿Tuku tasikulunalin makglhtinankan akxni tlawakan xtalakaskin Dios? ¿Tuku xlakata lu xlakaskinka nakamatliwakglhaw chu nakamakgtayayaw kinatalankan?
3. ¿La tlan liwana nalimaklakaskinaw kilhtamaku akxni natawila tamakxtumit xaʼakgtum kilhtamaku?
3 Liwana kalakkaxwili minkilhtamaku xlakata napina ktamakxtumit chu liwana nakgaxpata tuku natalichuwinan. Max tiku namasta uma taʼakgchuwin chatum xalak Betel o chatum superintendente viajante. Kkawaniyan nakatachuwinanatit tiku akgchuwinalh chu xpuskat, komo tamakgaxtokgnit, akxni nina tsuku tamakxtumit o akxni kgalhsputnita. Xlakata «nalakapastaka tuku talichuwinalh» ktamakxtumit, kakalitakgalhchuwinanti mi familia kminchik tuku katsini (Sant. 1:25). Akxtum kalikgalhchuwinantit la natlawayatit xlakata tlakg tlan natlawayatit xtalakaskin Dios.
4. ¿Tuku xlakata lu xlakaskinka pi pulana nawiliyaw kkilatamatkan xtalakaskin Dios?
4 Nialh makgas Jehová nakamalakgsputu latamanin tiku xakstu kamakgapaxuwaputunkan chu ni tlawaputunkgo xtalakaskin (1 Juan 2:17). Wa xlakata, ¡lu paxtikatsiniyaw Jehová uma lu tlan tamakxtumit! Lu nakinkamakgtayayan pulana nawiliyaw xtalakaskin Dios kkilatamatkan.