Niku Tamasta Xtakgalhtin Akgtum Takgalhskinin

◼ ¿Nalimaklakaskinaw Internet xlakata nakalitachuwinanaw Dios tiku wilakgolh kʼalakatanu países o nakatakgalhtawakgayaw?

Makgapitsi tiku lichuwinankgo Dios limaklakaskinkgo Internet xlakata nakamalaknuni takgalhtawakga xalak Biblia latamanin tiku wilakgolh kʼalakatanu países niku nila lichuwinankan Dios o ni lhuwa xtatayananin Jehová wilakgolh. Lakgachunin, tlan kitaxtunit. Pero, uma na lu tuwa kitaxtu akxni lamalakgachanikan correos electrónicos o katsokgnanikan latamanin tiku ni kalakgapasaw (kaʼakxilhti Nuestro Ministerio del Reino xla julio kata 2007, página 3). Maski xlikana pi kalitachuwinamputunaw xlakata xTamapakgsin Dios latamanin tiku lakgatikgo xlakata Dios, umakgolh takgalhchuwin natlawa pi nakatalalinaw tiku nitlan likatsikgo, chu asta tiku apóstatas (1 Cor. 1:19-25; Col. 2:8). Nachuna, wi niku ni mastakan talakaskin natalichuwinan xlakata xTamapakgsin Dios o lakkaxwilikanit xlakata ni natalichuwinan, chu uma natlawa pi mapakgsinanin naskgalakgo tuku kamalakgachaniyaw. Uma natlawa pi katuwa natawilakgo xTatayananin Jehová tiku wilakgolh anta. Wa xlakata, ni nakaputsayaw kʼInternet latamanin xalak alakatanu países xlakata nakalitachuwinanaw xalakwan xalaksasti.

Komo nalitachuwinanaw Dios chatum latamanin tiku xalak alakatanu kachikinin tiku minkgonit paxialhnankgo, nialh nakatachuwinanaw akxni taspitkgonita kxchikkan, katlawaw komo chuna lakkaxwilinit sucursal. Tuku tlan tlawayaw namasiyaniyaw la namaklakaskin jw.org xlakata natekgsa tuku katsiputun o natekgsa sucursal nema pulalin taskujut kxpaís. Komo wi lakatsu Pukgalhtawakga xla xTatayananin Jehová niku lama, tlan waniyaw pi kaʼalh. Komo lakaskin pi xtatayananin Jehová kalakgapaxialhnankgolh. Komo limasiya pi tlakg katsiputun, kaskini xdirección komo chuna nalakaskin chu namaxkiya secretario, tiku namalakgacha kBetel nalimaklakaskin sitio jw.org. Sucursal nema pulalin taskujut kʼuma país niku xla wi, wa tlan tiku maxkikgo tuku talakaskin xlakata katsi la wi uma país (kaʼakxilhti La Natlawayaw xTaskujut Dios xla junio kata 2014, página 7, chu La Natlawayaw xTaskujut Dios xla noviembre kata 2011, página 2).

Komo tiku xlakgapaxialhnanaw naʼan alakatanu país, o komo masiyanimaw tuku wan Biblia chatum lataman tiku xalak atanu país chu kaj lakgapasaw kʼInternet, kilitlawatkan chuna la lichuwinawa kpárrafo nema akxilhwi. Pero tlan chuntiya namakgtayayaw chatum lataman asta akxni chatum tiku lichuwinan Dios xala anta natachuwinan. Pero komo wi chatum lataman niku ni mastakan talakaskin nalichuwinankan Dios o lakkaxwilikanit pi ni nalichuwinankan, lu kuenta kilitlawatkan xlakata nalichuwinanaw tuku wan Biblia akxni tsokgaw akgtum carta, akxni chuwinanaw kteléfono o namalakgachayaw mensajes electrónicos (Mat. 10:16).