«Ankgalhin natlawayatit» 5 xla abril natalakapastaka akxni tinilh Cristo
1. ¿Tuku xlakata lu xlakaskinka natalakapastaka akxni tinilh Cristo?
1 «Ankgalhin natlawayatit nakililakapastakatit.» (Luc. 22:19.) Kʼuma texto, Jesús kawanilh kstalaninanin pi xlakapastakkgolh akxni xʼama niy xpalakata latamanin. Xlakata talakgmaxtut lu makgtayanalh, wa xlakata kstalaninanin Cristo lu xlakaskinka akxilhkgo nalakapastakkgo akxni tinilh Cristo chu uma kata natatlawa 5 xla abril. ¿La nalimasiyaniyaw Jehová pi paxtikatsiniyaw chuna la natalakatsuwitilha uma kilhtamaku? (Col. 3:15.)
2. ¿La kinkamakgtayayan nalikgalhtawakgayaw chu nalakpuwanaw tuku lalh akxni nilh Jesús xlakata lu xlakaskinka naʼakxilhaw akxni lakapastakaw?
2 Katsukuwa makaxaw kinakujkan. Akxni talakatsuwi tuku lu xlakaskinka, tsukuyaw takaxaw. Akxni natalakapastaka akxni tinilh Cristo, tlan natsukuyaw kaxwiliyaw kinakujkan akxni nakatalikgalhtawakgayaw kifamiliajkan tuku lalh akxni nina xniy Jesús chu nalakapastakaw xlakata uma (Esd. 7:10). Kcalendario chu kfolleto Examinando limin versículos niku lichuwinan tuku lalh akxni nilh Jesús. Chu kʼrevista La Atalaya 1 xla febrero kata 2011 (páginas 23 chu 24) lichuwinan tuku nalikgalhtawakgayaw chu anta wan tukuya capítulos nalikgalhtawakgayaw xla libro El hombre más grande.
3. ¿La limasiyayaw pi lu xlakaskinka akxilhaw akxni talakapastaka akxni tinilh Cristo akxni lichuwinanaw Dios?
3 Kalichuwinaw Dios. Atanu la nalimasiyayaw pi xlakaskinka akxilhaw akxni lakapastakaw akxni nilh Cristo wa akxni lhuwa lichuwinanaw Dios (Luc. 6:45). Sábado 17 xla marzo natsukuyaw kawaniyaw latamanin xlikalanka katiyatni pi kaʼankgolh akxni nalakapastakaw akxni tinilh Cristo. ¿Tlan xlakkaxwili minkilhtamaku xlakata tlakg xlichuwinanti Dios, o asta tlan xliskujti precursor auxiliar? Tlan xkalitakgalhchuwinanti mi familia akxni nakakninaniyatit Dios.
4. ¿La kinkamakgtayayan naʼanaw akxni talakapastaka akxni tinilh Cristo?
4 ¡Lu kinkamakgtayayan akxni kata kata lakapastakaw akxni tinilh Cristo! Lu kinkamatliwakglhan chu tlakg paxkiyaw Jehová akxni lakapastakaw pi kinkapaxkiyan xlakata mastalh xKgawasa tiku lu paxki xlakata xkinkalakgmaxtun (Juan 3:16; 1 Juan 4:9, 10). Uma tlawa pi nialh kiʼakstukan natapakgsiyaw (2 Cor. 5:14, 15). Chu na tlawa pi nakalitachuwinamputunaw latamanin xlakata Jehová (Sal. 102:19-21). Nachuna, xlakata lu paxtikatsiniyaw, akinin xlakskujnin Jehová kgalhkgalhimaw kachalh 5 xla abril xlakata «namasiyuya[w] lantla nilh nkimPuchinakan» (1 Cor. 11:26).