Kalimasiyaw pi paxtikatsiniyaw 17 xla abril natalakapastaka akxni tinilh Jesús
1. ¿La nachuna namakgkatsiyaw la makgkatsilh salmista akxni nalakapastakaw akxni tinilh Jesús?
1 Salmista paxtikatsinilh Jehová xlakata pulaklhuwa la limasiyanilh pi xlakgalhamanan chu kalakgmaxtulh xkachikin, wa xlakata wa: «¿Tuku naklixokgoni Kintikukan Dios wakg ixlitlan nima kintatlawanit?» (Sal. 116:12). La uku, xlakskujnin Dios lhuwa tuku xlakata tlan nalipaxtikatsiniyaw, xlakata akxni akglhuwa ciento kata xtitaxtunit akxni tsokgka uma tachuwin, Jehová kamaxkilh latamanin tlakg xalanka tamaskiwin: talakgmaxtut. Wa xlakata, akxni natakaxaw xlakata nalakapastakaw akxni tinilh Jesús 17 xla abril, lakaskinaw katasiyalh pi paxtikatsiniyaw (Col. 3:15).
2. ¿Tuku xlakata paxtikatsiniyaw talakgmaxtut?
2 Tasikulunalin nema limin talakgmaxtut. Xlakata talakgmaxtut “kinkamatsankgenanikanan kintalakgalhinkan” (Col. 1:13, 14). Xlakata kinkamatsankgananikanan kintalakgalhinkan, tlan talakapastakni nakgalhiyaw akxni nakakninaniyaw Jehová (Heb. 9:13, 14). Akinin tlan nawaniyaw Jehová kʼoración putum tuku makgkatsiyaw (Heb. 4:14-16). Chu xlakata kanajlaniyaw talakgmaxtut tlan nalatamayaw putum kilhtamaku (Juan 3:16).
3. ¿La tlan nalimasiyaniyaw Jehová pi paxtikatsiniyaw talakgmaxtut?
3 Kalimasiyaw pi paxtikatsiniyaw. Pulaktum la tlan nalimasiyayaw pi lu paxtikatsiniyaw, nalikgalhtawakgayaw chu nalakapastakaw chali chali textos nema lichuwinan xlakata Jesús nema lakgchan semana akxni natalakapastaka akxni tinilh. Wa xlakata, revista La Atalaya 1 xla febrero kata 2011 limin artículo nema wanikan: «¿Está usted listo para el día más importante del año?», tlawakanit xlakata nakinkamakgtayayan chuna natlawayaw. Na tlan natlawaniyaw oración Jehová niku nawaniyaw la xlilhuwa paxtikatsiniyaw talakgmaxtut (1 Tes. 5:17, 18). Atanu la tlan napaxtikatsiniyaw wa naʼanaw akxni nalakapastakkan akxni tinilh Jesús xlakata chuna mapakgsinalh (1 Cor. 11:24, 25). Nachuna, tlan nalimasiyayaw tapaxkit chuna la Jehová akxni nakawaniyaw lhuwa latamanin pi kakinkataʼankgon kʼuma tamakxtumit (Isa. 55:1-3).
4. ¿Tuku kililakapastakatkan natlawayaw?
4 Skujni tiku paxtikatsini ni akxilha tamakxtumit akxni talakapastaka akxni tinilh Jesús chuna la amakgapitsi tamakxtumit nema tatlawa kcongregación. ¡Wa tamakxtumit nema tlakg xlakaskinka tatlawa akgatunu kata! Wa xlakata, chuna la talakatsuwitilhama uma lu xlakaskinka kilhtamaku, kililakapastakatkan chuna la salmista tiku wa: «Lata ixliwakg kilistakni nakpaxkatlikatsini Kintiku Dios. Akit nikxni kama akgtsonkgswa tu kilimakgtayanit nipara tipatum» (Sal. 103:2).