Xatapaxuwan kalakkaxwiliwa akxni natalakapastakka akxni tinilh Cristo
1. ¿Tuku tlan natlawayaw papaʼ akxni natalakapastaka akxni tinilh Cristo?
1 Akxni nalakapastakkan akxni tinilh Cristo, martes 26 xla marzo lu tlan kilhtamaku xlakata napaxtikatsiniyaw tuku Dios makamastalh xlakata nakinkalakgmaxtuyan (Is. 61:10). Xlakata nina chan kilhtamaku akxni nalakapastakkan akxni tinilh Cristo, tapaxuwan nakinkamakgtayayan liwana nalakaxwiliyaw. ¿Kaʼakxilhwi tuku xlakata?
2. ¿Tuku natlawa pi nalakkaxwiliyawa xlakata akxni natalakapastaka akxni tinilh Cristo?
2 Liwana nalakaxwiliyawa. Taway xla kiMalanakan ni lhuwa tuku tlawakan, pero lu xlakaskinka tuku kilhchanima. Chu xlakata nitu patsankgaputunaw tuku lu xlakaskinka la uku nalakaxwiliyawa (Prov. 21:5). Talakaskin nalakkaxwilikan tukuya hora chu niku natlawakan talakaskin nakaxakakan anta chu nakakaxwilikan. Naputsakan kaxtalanchu chu vino. Tiku naʼakgchuwinan liwana nalakkaxtlawa xtaʼakgchuwin, chu tiku kaxwilinankgo chu tiku namatitaxtikgo kaxtalanchu chu vino talakaskin liwana nakatsikgoya la natlawakgo. Max makgapitsi uma kalakkaxwilinitawa. Xlikana pi, xlakata lu paxtikatsiniyaw talakgmaxtut nema kinkalakgamxtuyan tlawa pi liwana nalakkaxwiliyawa tuku natalakaskin ama kilhtamaku (1 Ped. 1:8, 9).
3. ¿La tlan nalakaxwiliyaw kinakujkan xlakata xTaway kiMalanakan?
3 Kalakaxwiliwa kinakujkan. Nachuna lu xlakaskinka pi nalakaxwiliyaw kinakujkan (Esd. 7:10). Komo chuna natlawayaw naʼakgatekgsaw tuku kilhchanima uma kilhtamaku. Nalimaxtuyaw kilhtamaku xlakata nalikgalhtawakgayaw texto nema lakgchan semana akxni natalakapastaka akxni tinilh Cristo chu nalilakapastakaw tuku titaxtulh Jesús kxaʼawatiya kilhtamaku akxni xlama kKatiyatni. Komo nalilakapastakaw xliʼakxilhtit xlakata tuku limakgxtakgli, nachuna natlawaputunaw (Gál. 2:20).
4. ¿Tukuya tasikulunalin nema masta talakgmaxtut lu makgapaxuwayan?
4 Akxni Cristo nilh masiyalh pi Jehová lakgchan namapakgsinan, kinkalakgmaxtun ktalakgalhin chu klinin chu tlawalh pi tlan xtalaliw Dios chu tlan xlatamaw putum kilhtamaku (Col. 1:21, 22, 1 Juan 2:2). Nachuna kinkamatliwakglhan xlakata namakgantaxtiyaw tuku waniw Dios akxni tamakamastaniw chu nachuna la xliʼakxilhtit Cristo (Mat. 16:24). Xlikana pi, komo lu tlan nalakaxwiliyawa akxni natalakapastaka akxni tinilh Cristo, chu na anaw lu napaxuwa kinakujkan.