Kakgaxmatwi xlakata nakatsiniyaw
1. ¿Tuku xlakata tuwa tamakgkatsi liwana nakgaxmataw taʼakgchuwin xla laklanka tamakxtumit?
1 Nialh makgas natsukuparakgo tamakxtumit xaʼakgtutu kilhtamaku kata 2013. Lhuwa taskujut tlawakanit xlakata natamatitaxtikgo taʼakgchuwin nema nakamakgtaya xtakanajlakan putum latamanin xalak katiyatni. ¿Lakkaxwilinitata minkilhtamaku xlakata ni para akgtum kilhtamaku namakgatsankgaya? Kxalaklanka tamakxtumit lhuwa tuku tlawa pi ni aktanks nakgaxmataw taʼakgchuwin. Xlakata taʼakgchuwin nema tamatitaxti anta tlakg laktlanka nixtachuna la kcongregación, tlakg talakaskin aktanks nakgaxmataw. Chu tlakgwanaw xlakata lu makgat niku max kinkalakgchanan. ¿Tuku nakinkamakgtayayan xlakata liwana nakgaxmataw chu nakatsiniyaw? (Deut. 31:12.)
2. ¿Tuku tlan natlawayata xlakata nalitamakgtayaya lanka tamakxtumit?
2 Akxni nina chin asamblea. Anta kkisitiojkan oficial, www.jw.org/es, natekgsa programas xla asamblea niku limin tuku wanikgokan putum taʼakgchuwin chu na limin textos niku tiyakanit taʼakgchuwin. Komo kgalhiya Internet, chu naʼakxilha programas namakgtayayan tlakg aktanks nalitamakgtayaya lanka tamakxtumit (Esd. 7:10). Max tlan akxni naKakninaniya Dios kFamilia nalichuwinana lanka tamakxtumit.
3. ¿Tuku namakgtayayan aktanks nakgaxpata tuku lichuwinamaka?
3 Akxni natatekgsa kasamblea. Komo matlaniya, max tlan napina kbaño akxni nina tsuku taʼakgchuwin. Max tlan namamixiya mi celular xlakata ni namakgatsankgayan komo wi tiku nakilhminiyan o namakaminiyan mensajes o xlakata ni namakapimputuna mensajes ktamakxtumit. Komo talakaskin ni namamixiya, katlawa pi ni namakasanan xlakata niti namakgatsankga komo wi tiku nakilhminiyan. Komo wix namaklakaskina tableta electrónica, kuenta katlawa pi amakgapitsin ni namakgatsankgakgo. Ni kawayanti chu ni kakgotnanti akxni tamatitaxtima taʼakgchuwin (Ecl. 3:1). Kalakaʼakxilhti tiku matitaxtima taʼakgchuwin chu kaputsa textos nema xalak Biblia. Chu katsokgti tuku lichuwinamaka.
4. ¿La tlan xanatlatni nakamakgtayakgo xkamankan nakgaxmatkgo chu nalitamakgtayakgo taʼakgchuwin?
4 Nalakaskinaw pi laktsu kinkamanankan nakgaxmatkgo chu nalitamakgtayakgo. Proverbios 29:15 wan: «Kgawasa tiku maxkikan talakaskin natlawa putum tuku natlawaputun namamaxani xtse». Wa xlakata max tlakg tlan nakitaxtu komo akxtum natatawilakgo xtlatkan, xlakata xlakan naʼakxilhkgo komo kuenta tlawamakgolh tuku lichuwinamaka chu nikaj nachuwinantulakgo, o kaj namalakgachakgo mensajes kcelular o kaj nalatamakgo. Maski wa tlakg xalaktsina na tlan nakamasiyanikan ni nalhtatawalakgo chu ni nachuwinantawilakgo, maski ni putum naʼakgatekgskgo tuku lichuwinamaka.
5. ¿Tuku xlakata tlan kitaxtu lichuwinankan kfamilia taʼakgchuwin, chu lantla natlawayaw?
5 Akxni kakgotanun. Ni makgat tsisni kalhtata. Aktanks kajaxti. Kamaxtu tsinu kilhtamaku xlakata nakalitachuwinana mi familia tuku lichuwinanka, chuna ni lakapala katipatsankga. Komo napina tawayankgoya mi amigos krestaurante, max tlan nalichuwinanatit nema lakgatitit xla taʼakgchuwin. Max tlan nalimaklakaskina tuku tsokgti. Chu nachuna tlan nalimaklakaskina akxni naKakninaniya Dios kFamilia chu nalichuwinanatit la tlan kamakgtayayan. Nachuna tlan nalimakgxtakgatit ni lhuwa minutos akgatunu semanas xlakata nalikgalhtawakgayatit xasasti likgalhtawakga.
6. ¿Tuku xlakata ni kajwatiya talakaskin naʼanaw klanka tamakxtumit?
6 Akxni anaw makgwayanaw komo ni li paxuwayaw chu ni lakgatiyaw liwat ni kgalhi xtapalh kimpalakatakan. Nachuna kitaxtu komo ni lipaxuwayaw liwat xaʼespiritual nema mastakan klanka tamakxtumit xa akgtutu kilhtamaku ni kgalhi xtapalh kimpalakatakan. Ni kamakgatsankgaw taʼakgchuwin xlakata tlan nalitamakgtayayaw, kaks kakgaxmatwi chu kalilatamaw.