Tamakxtumit xaʼakgtutu kilhtamaku masiyakgo tuku xaxlikana
1. ¿Tuku tlan xlakapastakkgo israelitas kxasanto xpaskuajkan?
1 Israelitas xala makgasa makgtutu xtamakxtumikgo akgatunu kata xlakata xtlawakgolh xasanto xpaskuajkan. Chu maski kaj xliʼanat xwanit lakchixkuwin na xʼankgo xfamiliajkan xlakata xlipaxuwakgolh uma paskua (Deu. 16:15, 16). Anta xkgalhikgo kilhtamaku nalilakapastakkgo tuku xaxlikana. Akgtum liʼakxilhtit, tlan xlakapastakkgo pi Jehová chatum Dios xapaxkina nema kamakgtaya putum kskujnin (Deu. 15:4, 5) chu nachuna pi tlan xlipawankgolh pi xla xkapulalilh chu xkamakgtayalh (Deu. 32:9, 10) o xlakata xkachikin Dios xwankgonit, xtalakaskin xtlawakgolh tuku xaʼakgstitum la Dios (Deu. 7:6, 11). La uku nachuna tlawayaw akxni anaw ktamakxtumit xaʼakgtutu kilhtamaku.
2. ¿La kinkamakgtayayan tuku lakkaxwilikan klaklanka tamakxtumit xlakata naʼakgatekgsaw tuku xaxlikana?
2 Tuku natalichuwinan nakinkamakgtayayan naʼakgatekgsaw tuku xaxlikana. Ktamakxtumit xaʼakgtutu kilhtamaku kgaxmataw taʼakgchuwin, akxilhaw dramas, liʼakxilhtit chu wi tiku katlawanikan takgalhskinin nema kinkamagktayakgoyan naʼakgatekgsaw tuku xaxlikana xlakata Biblia (Juan 17:17). Xkachikin Jehová lhuwa skujma xlakata nalakkaxwili tuku nakamakgtaya xtakanajla latamanin xlikalanka kakilhtamaku (Mat. 24:45-47). ¿Ni lipaxuwaya xlakata tuku nakatsiniya?
3. ¿La nalitamakgtayayaw xlakata tuku lakkaxwilikanit ktamakxtumit xaʼakgtutu kilhtamaku?
3 Xlakata liwana nalitamakgtayayaw tuku lakkaxwilikanit, talakaskin naʼanaw uma akgtutu kilhtamaku chu kuenta natlawayaw tuku nakinkamasiyanikanan. Katachuwinanti mi malana xlakata namaxkiyan talakaskin napina kʼuma tamakxtumit. Xlakata skgalalh natawilaya akgatunu kilhtamaku, liwana kajaxti katsisni. Lhuwa natalan kamakgtayanit naʼakxilhkgo tiku akgchuwinama chu kaj tsinu tuku natsokgkgo. Ni kamasta talakaskin pi mi celular o localizador natlawa pi wix chu atanu nialh kuenta natlawakgo tamakxtumit. Ni kachuwinanti, ni kamalakgacha mensajes, ni kawayanti o ni kakgotnanti akxni akgchuwinamaka.
4. ¿La nakamakgtayakgo natlatni xkamanankan xlakata nalitamakgtayakgo lanka tamakxtumit?
4 Kata xla sábado, israelitas xtamakxtumikgo xlakata nakgaxmatkgo akxni xtalikgalhtawakga xLimapakgsin Dios kpaskua xla laktsu chiki. Putum familias, chu asta «laktsu kamanan», xtamakxtumikgo xlakata xkgaxmatkgo xtachuwin Dios chu xkatsinikgolh tuku wan (Deu. 31:12). La uku lu matliwekglhnan akxni putum familias akxtum tawilakgo ktamakxtumit chu laktsu kamanan ni lhtatakgo chu kuenta tlawakgo tuku lichuwinankan. Max tlan nawan komo katsisni nalichuwinanatit tuku tsokgwilitit chu nalichuwinanatit tuku xlakaskinka akxilhtit. Xlakata «chatum kgawasa ni kgalhi liskgalala kxnaku», natlatni ni xlimaxkitkan «talakaskin natlawa putum tuku natlawaputun» xkamanankan. Lu xlakaskinka liwana naʼakxilhaw tuku lakaskinkgo lakkamanan, nachuna tiku tlakg laklankata akxni wayankan ktamakxtumit chu akxni wilakgolh kʼhotel (Pro. 22:15; 29:15).
5. ¿La lichichuwinankan xaxlikana akxni lu tlan likatsiyaw?
5 Lu tlan talichuwinan xaxlikana akxni kgalhiyaw tlan tayat. Akxni tlan tayat kgalhiyaw kachikin niku tatlawa lanka tamakxtumit xaʼakgtutu kilhtamaku tlan masiya xaxlikana (Tito 2:10). Tiku skujkgo kʼhoteles xatapaxuwan kamakgamakglhtinankgo latamanin tiku ni lakapala sitsikgo, tlan likatsikgo chu tlawakgo tuku kawanikan (Col. 4:6). Kata nema titaxtulh, makgapitsi natalan tiku xkamalakgachanit betel akxni xtalakkaxlamakgolh akgtum hotel xlakata la xlilhuwa xʼamakgolh kamatajikgo, puskat tiku lakgayawakanit hotel wa: «Lu klakgatiyaw pi xtatayananin Jehová natamakxtakgo unu kʼhotel xlakata tlan likatsikgo chu xapaxkinanin. Nachuna, putum kilhtamaku tlan kalikatsinikgo tiku skujkgo unu chu kuenta tlawakgo hotel».
6. ¿La tlan nalichuwinankan xaxlikana niku tatlawama tamakxtumiyaw xlakata la lhakgananaw?
6 Kigafetejkan ni kajwatiya xlakata natalan nakatsikgo tiku akinin chu natakatsi pi kgalhiyaw lanka tamakxtumit, wata xlakata na natalichuwinan xaxlikana. Latamanin nakatsikgo pi tiku linkgo gafetes liwana lhakganankgo chu tlan takaxtayakgonit, ni kalawa lhakganankgo la xalak kakilhtamaku (1 Tim. 2:9, 10). Wa xlakata, kuenta natlawayaw la tasiyayaw akxni wilaw ktamakxtumit chu asta akxni natatsokgtawilayaw kʼhotel. Nawiliyaw kishortkan chu camiseta natlawa pi nitlan nalichuwinankan xtatayananin Jehová. Maski tamakxtumit natatlawa kʼakgtum estadio, talakaskin lu tlan nalhakgananaw. Komo lakgpalinanaw akxni kgalhsputnita tamakxtumit xlakata naʼanaw wayanaw kalakapastakwi pi kilanitaw kʼakgtum lanka tamakxtumit chu ni kalawa nalhakgananaw.
7. ¿La tlan nakatatawilayaw kinatalankan akxni kgalhiyaw lanka tamakxtumit?
7 Akxni xtlawakgo xpaskuajkan Israelitas xlipaxuwakgo xlakata akxtum xkatatawilakgo xnatalankan tiku xala atanu kachikin uma xtlawa pi tlakg tlan xlatalalinkgolh (Hech. 2:1, 5). Tamakxtumit xaʼakgtutu kilhtamaku liwana litasiya pi tlan katalalinaw putum kinatalankan. Uma lu tlan tayat nema anan kxkachikin Jehová tlawa pi lhuwa kaks nalilakawankgo (Sal. 133:1). Chu akinin tlan nakalakgapasaw atanu natalan chu tlan nakatachuwinanaw akxni wayanaw, chu ni nataxtuyaw xlakata natamawayaw tuku nawayaw.
8. ¿Tuku xlakata kilimakgtayanatkan ktamakxtumit komo nitu kinkalaktlawayan?
8 Latamanin kaks lilakawankgo akxni akxilhkgo la talakkaxwilinit kintamakxtumitkan, liwaka akxni katsikgo pi tiku tlawakgo taskujut ni kaxokgonikan. ¿Tlan «lipaxaw» namakgtayanana ktamakxtumit? (Sal. 110:3.) Lhuwa natlatni makgtayanankgo chu akxtum kataʼankgo xkamanan, chu kamasiyanikgo la nakataskujkgo amakgapitsin. Komo wix ni kgalhiya lhuwa amigos xlakata maxanana, komo namakgtayanana klanka ktamakxtumit namakgtayayan xlakata nakalakgapasa amakgapitsin. Chatum tala puskat wa: «Klaklanka tamakxtumit kaj xakkatalalin kifamilia chu ni lhuwa amigos. Pero akxni kmakgtayanalh niku kaxakakan, klakgapasli lhuwa natalan. ¡Lu klakgatilh!». Akxni kalakgapasaw lhuwa amigos xlakata makgtayananaw ktamakxtumit tlawa pi lu napaxuwayaw (2 Cor. 6:12, 13). Komo nikxni makgtayananita, kakakgalhskinti lakgkgolotsin tuku talakaskin xlakata tlan namakgtayanana.
9. ¿Tuku natlawayaw xlakata nakawaniyaw amakgapitsin naʼankgo klanka tamakxtumit?
9 Kakawani amakgapitsi kakgaxmatkgolh tuku xaxlikana. Chuna la tatlawanit kata nema titaxtukgonit, akxni tsankga nawan akgtutu semana nakamaxkiyaw invitaciones latamanin xlakata naʼankgo klanka tamakxtumit. Putum congregaciones natlawakgo tuku natalakaskin xlakata namakgpitsikan invitaciones niku kalakgchan (kaʼakxilhti recuadro «¿La namakgpitsiyaw invitación?»). Invitaciones tuku naʼakgataxtukgo kalipitit ktamakxtumit xlakata nalimaklakaskinkgo atanu natalan akxni nakalitachuwinankgo Dios tiku katatanokglhkgo.
10. Kalichuwinanati tuku tlan kitaxtunit xlakata tamakgpitsinit invitación.
10 ¿Tlan kitaxtu akxni makgpitsiyaw invitación? Kʼakgtum lanka tamakxtumit, chatum kaxwilina putsanilh niku natawilakgo akgtum tamakgaxtokgat. Xlakan wanikgolh pi xkamaxkikanit invitación chu xkatsiputunkgo tuku xʼama tatlawa. 300 kilómetros la xlimakgat ankgolh kputlaw xlakata tlan xchankgolh. Nachuna, chatum tala tiku xlichuwinama Dios akgatunu chiki maxkilh invitación chatum chixku. Komo uma chixku masiyalh pi xkatsiputun, xla litachuwinalh tuku xwan invitación. Alistalh, akxni xwija lanka tamakxtumit, uma tala akxilhli pi uma chixku xtaʼan xʼamigo, chu xlin xasasti likgalhtawakga.
11. ¿Tuku xlakata lu xlakaskinka naʼanaw kintamakxtumitkan kata kata?
11 Paskua nema xlikakninanikgo Jehová wa tuku xkamaxkinit israelitas tiku kskujnikgo «ni xmakgatsankgananikgo chu xaʼakgstitum xkakninanikgo» (Jos. 24:14). Nachuna la uku, tamakxtumit xaʼakgtutu kilhtamaku makgtayanan xlakata chuntiya «nastalaniyaw ntalulokgtat», o xaxlikana chu wa tuku na lu xlakaskinka xlakata nakakninaniyaw Dios (3 Juan 3). Lakaskinaw pi Jehová kakasikulanatlawalh tiku paxkikgo xaxlikana chu tlawakgo tuku natalakaskin xlakata kata kata naʼankgo kʼuma tamakxtumit chu lu nakamakgtaya.
[Comentario xla página 4]
Akxni tlan tayat kgalhiyaw kachikin niku tatlawa tamakxtumit xaʼakgtutu kilhtamaku tlan talichuwinan kintakanajlakan
[Comentario xla página 5]
Akxni tsankga nawan akgtutu semanas natawila tamakxtumit namakgpitsiyaw invitaciones
[Comentarios xla página 3-6]
Kililakapastakatkan Xlakata Tamakxtumit Xa’akgtutu Kilhtamaku Kata 2012
◼ Hora akxni natsuku chu nakgalhsputa tamakxtumit. Akgtutu kilhtamaku nema nakgalhiyaw, tamakxtumit natsuku tsisa 9:20. Kamakgtsayan namalakkikan. Akxni nawankan pi natsuku tatlakgni nema nalimatsukikan tamakxtumit naʼanaw tawilayaw xlakata natsuku chuna la xlilat. Viernes chu sábado4:55 nakgalhsputa tamakxtumit chu domingo nakgalhsputa 3:40.
◼ Niku kawilikan putlaw. Ni kintikamaxokgekan niku nawiliyaw putlaw komo anta tapakgsi niku tamakxtumimaw chu chuna la nachintilhakgo putlaw nakakaxwilikan. Na makgataxtikanit niku tlan nakawilikan putlaw nema liminkgo tiku nila tlawankgo o atanu tuku nitlan kalaninit, putlaw xlikgalhit akgtum letrero o placa nema maxkikanit kpumapakgsin niku wan pi tlan anta namakgxtakga. Xlakata ni anan lhuwa niku nakawilikan putlaw, tlakg tlan xwa kaj akgtum putlaw xlipitit komo natanukgoyatit.
◼ Putawilh. Kajwatiya tiku akxtum kataʼanaw kputlaw o tiku wilakgolh kkinchikkan tlan nakamakgataxtiniyaw niku natawilakgo chu nachuna tiku kamakgalhtawakgemaw (1 Cor. 13:5).
◼ Taway. Tlakg tlan nalinaw tuku nawayaw chu ni naʼanaw tamawayaw tastunut. Tlakg tlan komo xaʼaktsina tuku napulipina miliwat nema tlan natamaknuya xtanpin minputawilh. Anta ktamakxtumit ni mastakan talakaskin xalanka tuku napulinaw kiliwatkan chu na ni nalinaw tuku litatlawanit vidrio.
◼ Tumin nema xatapaxuwan tamaskiwinan. Tlan nalimasiyayaw pi paxtikatsiniyaw paskua xlakata kintakanajlakan akxni xatapaxuwan mastayaw tumin xlakata taskujut nema tatlawa xlikalanka katiyatni, anta klanka tamakxtumit xaʼakgtutu kilhtamaku. Wantiku namastakgo cheque nawilikgo pi wa maxkimaka «La Torre del Vigía, A.R.».
◼ Akxni wi tuku kaj lakapara nitlan la. Akxni lakapara wi tiku nalani tuku nitlan anta ktamakxtumit, pulana kawani chatum kaxwilina tiku lakatsu ya, chu wa lakapara namakatsininan niku wilakgolh Makuchinanin xlakata anta naʼakxilhkgo tuku kgalhi chu namakgtayakgo.
◼ Likuchun. Komo wix waya likuchun nema maxkin makuchina kalipi ktamakxtumit nema nalimaklakaskina, xlakata max ni katianalh kintamakxtumitkan. Komo kgalhiya diabétes chu limaklakaskina jeringas, liwana kamakgchi akxni namakgana xlakata max wi tiku nitlan naliʼakgspula. Ni kamakganti niku wilimaka basura ktamakxtumit o kʼhotel.
◼ Tatunu. Kata kata wi tuku nitlan kaliʼakgspula natalan kaj xlakata xtatunukan. Tlakg tlan nalinaw tatunu chuna la xlilat, xlakata tlan kaniwa nalitlawanaw, kʼescaleras, niku wilakgolh rejillas o alakatanu.
◼ Tiku ni liwana kgaxmatkgo. Kmakgapitsi tamakxtumit namatitaxtikan tuku nalichuwinankan kradio (FM). Xlakata tlan nakgaxmata natalakaskin nalipina akgtum aktsu radio nema limaklakaskin pilas chu nalipina mi audífono.
◼ Tuku kalilinkan lakgskgatan nema kgalhi xllanta chu sillas nema talakgnu chu talakgxtu. Niti nalin tuku kalilinkan lakgskgatan nema kgalhi xllanta chu sillas nema talakgnu chu talakgxtu anta niku natlawakan tamakxtumit. Kajwatiya tlan linkan sillas nema tlan chiwilikan xla lakgskgatan nema tlan kawilikan kxpaxtun niku wilakgolh xanatlatni.
◼ Perfumes. Lhuwa tamakxtumit katlawakan niku putum talakchuwanit chu kgalhikgo aire acondicionado. Wa xlakata limasiyayaw pi paxkinanaw akxni ni wiliyaw lhuwa perfume nema lu takgankgawanan nema max natlawa pi amakgapitsin nalitatatlakgo o nitlan nalimakgkatsikgo (1 Cor. 10:24).
◼ Formularios Sírvase visitar (S-43-S). Tlan nalipina maktum o maktiy formularios Sírvase visitar xlakata natsokgwiliya xtukuwanikan chu niku wilakgolh tiku nakatachuwinana akxni nakatatanokglha chu nalakgatikgo tuku nakalitachuwinana. Tlan namastaya uma kapsnat kDepartamento de Publicaciones, o secretario xla congregación akxni nataspita kmincongregación (kaʼakxilhti likgalhtawakga La Natlawayaw xTaskujut Dios xla noviembre kata 2009, página. 4).
◼ Restaurantes. Akxni limasiyayaw tlan tayat krestaurantes malankiyaw xtukuwani Jehová. Komo talismani namastakan propina, chuna katlawa.
◼ Hoteles
1) Ni kaskinti cuartos nema ni namaklakaskina chu ni kamasta talakaskin tlakg natamakgxtakgkgo, kajwatiya tiku kamaxkikanit talakaskin.
2) Kajwatiya komo xlikana nila katipi kawanti pi nialh namaklakaskina akgtum cuarto chu tunkun kamakatsininanti khotel (Mat. 5:37).
3) Milikatsit pi komo maklakaskina tarjeta de crédito o de débito akxni naskina cuarto, hotel namakglhtiyan tsinu mintumin xlakata nalixokgoniya tuku namaklakaskina kcuarto, o komo wi tuku nalani cuarto akxni anta natawilaya. Wix tlan nalimaklakaskimparaya uma tumin akxni natitaxtukgo makgapitsi kilhtamaku.
4) Kalipi tuku pulinkan maletas akxni pinpata maklakaskina chu tunkun kamaspitti xlakata tlan atanu tiku nalimaklakaskin.
5) Kamaxki propina tiku natalinan mimaleta chu chali chali kamakgxtakgni propina tiku kaxaka mincuarto khotel.
6) Kajwatiya natlawaya liwat kcuarto niku mastakan talakaskin.
7) Ni kamalakatsali la nawaya liwat, café o hielos nema maskiwinankan akxni wilaw khotel.
8) Xliputum kilhtamaku kalimasiya xtawakat espíritu chuna la nakalikatsiniya tiku skujkgo khotel. Kalakapastakti pi lhuwa tiku wilakgolh khotel chu lhuwa taskujut kgalhikgo, wa xlakata napaxtikatsinikgo komo akinin ni lhuwa tuku nakaskiniyaw, tlan nakalikatsiniyaw chu ni nakasitsiniyaw.
9) Lu xlakaskinka pi natlatni nakuentatlawakgo xkamanan akxni natawilakgo kʼhotel, tuku kilhchani niku wi picsina, niku putum chinkgo chu gimnasio.
10) Kkapsnat niku tatsokgnit tukuya hoteles tlan natamakgxtakgaw wilikanit la naxokgoyaw chali chali, chu tanu naxokgoyaw impuestos. Komo tlakg namatejekana o namatajekana tuku wix nitu skinpat ni kaxokgo, tunkun kamakatsini Departamento tiku Putsakgo niku tlan Natamakgxtakgkgo natalan.
11) Komo nakgalhiya akgtum taʼakglhuwit anta niku tamakgxtakgpat tunkun kamakatsini Departamento tiku Putsakgo niku tlan Natamakgxtakgkgo natalan akxni wijku nawan tamakxtumit.
◼ Tiku xatapaxuwan skujputunkgo. Putum tiku makgtayaputunkgo kaʼalh kDepartamento xlakata tiku Xatapaxuwan Skujputunkgo. Tiku nina kgalhikgo 16 kata na tlan namakgtayanankgo pero wa xnatlatnikan, tiku kakuentajtlawakgo o chatum tiku nakalakgayawakgo xnatlatnikan nakataʼankgo skujkgo.
[Tuku wan página 6]
¿La namakgpitsiyaw invitación?
Xlakata tlan namastayaw invitación putum niku lichuwinanaw Dios, xlakaskinka ni lhuwa tuku nawanaw. Tlan nawanaw: «Tlen. Kmastamaw uma invitación xlikalanka katiyatni. Uma mila. Anta tlakg lhuwa tuku nakatsiya». Xatapaxuwan kamakgpitsi. Akxni namakgpitsiya sábado chu domingo, na tlan nakamaxkiya revistas komo lakgatikgo.