«Kakimamakxtupini kachikin»
1. ¿La tatalakxtumi tamakxtumit nema kgalhiyaw la uku chu nema kgalhikgolh israelitas akxni xtaxtukgonita kʼEgipto?
1 Akxni israelitas xtaxtukgonitku kʼEgipto, Jehová limapakgsilh Moisés pi xkamamakxtumilh xkachikin Israel ksipi nema wanikan Sinaí xlakata xkgaxmatkgolh xTachuwin, xlakata xkatsinikgolh pekuanikgo chu xkamasiyanikgolh xkamanankan xTiji Jehová (Deut. 4:10-13). Xlikana pi uma kilhtamaku lu tatliwakglhli xtakanajlakan chu putum kilhtamaku xʼamakgo lakapastakkgo. Papaʼ nema mimakgolh, xkachikin Jehová na nakgalhikgo laklanka tamakxtumit xaʼakgtutu kilhtamaku chu xaʼakgtati kilhtamaku xlakata Jehová nakamasiyani xtachuwin. ¿Tuku natlawayaw xlakata nakinkamakgtayayan?
2. ¿Tuku nalakkaxwiliyaw xlakata tlan naʼanaw klanka tamakxtumit xaʼakgtutu kilhtamaku?
2 Skgalalh natawilayaw. Jehová kalimapakgsilh israelitas pi xtakaxtawilakgolh akxni xtatlawalh ama tamakxtumit ksipi Sinaí (Éx. 19:10, 11). Nachuna, putum tiku naʼankgo klanka tamakxtumit xaʼakgtutu kilhtamaku nachuna xlitlawatkan, ni kaj watiya tiku naʼakgchuwinankgo. Akgtum liʼakxilhtit, lhuwa tiku skujkgo xliskinatkan kilhtamaku. Max wix nachuna tatekgsa la Nehemías. Xla xlakaskin xmaxkika kilhtamaku ni kskujnanilh mapakgsina Artajerjes xlakata xla xmaxki xvino, xlakata xʼalh lakkaxtlawa patsaps xalak kJerusalén, pero xkatsi pi mapakgsina ni xʼama maxki talakaskin. Wa xlakata Nehemías tlawalh oración, chu liwana lakkaxwililh tuku xʼama wan, ni pekualh chu skilh tuku xlakaskin. Mapakgsina maxkilh talakaskin, asta limakgtayalh tuku xlikaxtlawalh patsaps (Neh. 2:1-9). Ni kajwatiya naskiniya talakaskin mi malana, na talakaskin nawana komo napina ktamakxtumit xlakata naputsakan niku natamakgxtakga. Lakgkgolotsin xatapaxuwan nakamakgtayakgo tiku namaklakaskin. Liwana kalakkaxwili minkilhtamaku xlakata sokg nachipina kʼakgatunu tamakxtumit, chu skgalalh katawila xlakata «tlakg [...] kuintaj natlawayaw» tuku nakgaxpata (Heb. 2:1).
3. ¿Tuku nakinkamakgtayayan xlakata nalakkaxwiliyaw kinakujkan akxni nakgalhiyaw lanka tamakxtumit?
3 Xlakata skgalalh natawilayaw, na lu xlakaskinka nalakkaxwiliyaw kinakujkan xlakata nakgaxmataw chu nakatsiniyaw (Esd. 7:10). Akxni lhuwa kilhtamaku tsankga nawan natawila tamakxtumit xaʼakgtutu kilhtamaku, Programas nawilikan ksitio xla Internet jw.org, chu nalimin xtitulos taʼakgchuwin nema natamasta chu na nalimin akgtum o akgtiy textos kpulakatunu taʼakgchuwin. Lu tlan nawan nalikgalhtawakgayaw akxni nakakninaniyaw Dios kfamilia, akxni akglhuwa semanas tsankga natawila tamakxtumit nema nakinkalakgchanan. Makgapitsi tiku lichuwinankgo Dios maxtunikgo xacopia programa, chu limaklakaskinkgo xlakata tsokgwilikgo tsinu tuku tlakg xlakaskinka talichuwinan kʼakgatunu taʼakgchuwin.
4. ¿La nalimaklakaskinkgo natlatni tamakxtumit xaʼakgtutu kilhtamaku nakamasiyanikgo xkamanankan?
4 «Kakamasiyani minkamanan.» Tuku xtalakaskin kʼuma tamakxtumit ksipi Sinaí, wa pi israelitas xkamasiyanikgolh xkamanankan xtachuwin Jehová (Deut. 4:10). Tamakxtumit xaʼakgtutu kilhtamaku lu makgtayanan xlakata nachuna natlawayaw. Natlatni akxtum xlitatawilatkan xkamanankan ktamakxtumit chu nakamakgtayakgo nakgaxmatkgo tuku natalichuwinan. Familias tlan nalichuwinankgo tuku katsinikgolh akxni nakgalhsputa akgatunu tamakxtumit o akxni nasputa kilhtamaku o alistalh, akxni nakakninanikgo Dios kfamilia.
5. ¿La nakinkamakgtayayan komo naʼanaw klanka tamakxtumit xaʼakgtutu kilhtamaku nema aku mima?
5 Lanka tamakxtumit nema nitu xtachuna tlawaka ksipi Sinaí, kamakgtayalh israelitas lanka talakgalhaman naʼakxilhkgo xlakata xkachikin Dios xwankgonit (Deut. 4:7, 8). Lanka tamakxtumit nema natatlawa lakkaxwilikanit xlakata nachuna nakinkamakgtayayan. Akgtutu kilhtamaku nataxtuyaw kxkakilhtamaku Satanás, xtachuna la akgtum xakaskakni tiyat niku nitu anan, xlakata nakgalhiparayaw litliwakga chu akxtum nakatatawilayaw kinatalankan kʼakgtum paraíso xaʼespiritual (Is. 35:7-9). Xlakata xkilhtamaku Jehová talakatsuwima, ni kalakgmakgaw talakgalhaman xlakata natamakxtumiyaw chu nalamatliwakglhaw kinchatunukan (Heb. 10:24, 25).