Wa xTachuwin Dios lu wa tlan nalimakgalhtawakganankan

1. ¿Tuku título nakgalhi lanka tamakxtumit xaʼakgtiy kilhtamaku kata 2014, chu tuku takgalhskinin natakgalhti?

¹ Jehová «Xatlan Makgalhtawakgana», tlakg xatlan kimakgalhtawakgenakan nema wi xlitilanka kkakilhtamaku (Is. 30:20, 21). Xla kinkalimasiyaniyan maktum libro nema nitu xtachuna: Biblia, wa xTachuwin. ¿La nakinkamakgtayayan kkilatamatkan, kkintapuwankan, la makgkatsiyaw chu kkintakanajlakan? Namastakan xtakgalhtin klanka tamakxtumit xaʼakgtiy kilhtamaku kata 2014, xtítulo anta takilhtinit 2 Timoteo 3:16 wa «xTachuwin Dios lu wa tlan nalimakgalhtawakganankan».

2. ¿Tuku takgalhskinin nakinkamakgtayayan xlakata nakatsiyaw tuku tlakg xlakaskinka natalichuwinan ktamakxtumit?

² Tuku tlakg xlakaskinka natalichuwinan klanka tamakxtumit. Takgalhskinin nema wilakgolh unu nakinkamakgtayayan xlakata nakatsiyaw tuku tlakg xlakaskinka natalichuwinan ktamakxtumit:

• ¿La kinkamakgtayayan kkilatamatkan xtamasiyat Dios? (Is. 48:17, 18.)

• ¿Tuku liwana katsiyaw komo nalakkaxwiliyaw kilatamatkan xlakata naskujnaniyaw Jehová putum kilhtamaku? (Mal. 3:10.)

• ¿La kiliʼakxilhatkan «atanuj [...] talakapastakni»? (Heb. 13:9.)

• ¿La naʼakxilhxtuyaw xlakata “la xmasiya ” Jesús? (Mat. 7:28, 29.)

• ¿Tuku xlakata chuntiya nakatsinikgo tiku masiyakgo congregación? (Rom. 2:21.)

• ¿La kinkamakgtayayan xTachuwin Dios? (2 Tim. 3:16.)

• ¿La kakitaxtunima latamanin xlakata Dios «kalakchikima» kachikinin? (Ageo 2:6, 7.)

• ¿La kinkalipawanan Jehová? (Efes. 5:1.)

• ¿Tuku xlakata talakaskin chuntiya nalilatamayaw xtamasiyat Jehová? (Luc. 13:24.)

3. ¿Tuku xlakata lu xlakaskinka nakgaxmataw putum taʼakgchuwin nema namastakan kprograma?

³ Anta niku tsuku 2 Timoteo 3 kinkawaniyan la xʼama wan xaʼawatiya kilhtamaku. Pablo tsokgli la xlituwa xʼama wan: «Wa nti ni lakwan nchixkuwin, chu nti akgskgawinankgoy, kax nataliwakanikoy, nakgskgawinankgoy, chu nakgskgawikgokan» (2 Tim. 3:13). Komo ni lakaskinaw xlakata kakinkaʼakgskgawikan lu xlakaskinka nakgaxmataw Dios chu natlawayaw tuku kinkamasiyaniyan. Wa xlakata kakgaxmatwi putum taʼakgchuwin nema namastakan xlakata kʼuma programa.