Tuku xlikana lanit

◼ Australia. John chatum chixku tiku lhuwa takgalhtawakga kgalhi, akxni aktsu xwanit xʼan ksikulan; pero titaxtulh kilhtamaku wan pi nialh kanajlanilh Dios. Akgtum kilhtamaku, chatum precursor makgxtakgnilh folleto nema wanikan ¿Es la vida obra de un Creador?, chu atanu kilhtamaku maxkilh folleto El origen de la vida. Xlakata xlakgatilh, uma precursor akgatunu papaʼ xlini revistas chu xwani tuku tlakg xlakaskinka limin artículo nema lichuwinan xlakata tamalakatsukin o tuku lichuwinanit kBiblia nakgantaxtu. Akxni akxilhli pi tlan, wanilh pi namakgxtakgni libro La Biblia... ¿la Palabra de Dios, o palabra del hombre? Akxni John tsukulh likgalhtawakga uma libro wa pi «tsinu xtsukuma kanajlani Dios». Alistalh uma precursor masiyanilh párrafos 8 xla página 20 libro ¿Tuku xlikana masiyay Biblia? chu alistalh likgalhtawakgakgolh párrafos 13 asta 16 xla páginas 23 chu 24. Lu kaks malakawanilh John textos xalak Biblia nema xlimin libro, wa xlakata wa: «Max tlan xwa komo xaktsukupa likgalhtawakga Biblia».

◼ México. Chatum chixku wanilh tiku lichuwinan Dios pi xlakpuwan pi Biblia ni xTachuwin Dios xwanit. Tiku lichuwinan Dios wanilh pi xmaxkilh talakaskin xlimasiyanilh pi Biblia, wa xTachuwin Dios chu chixku wanilh pi tlan. Xlakata makglhuwa lakgapaxialhnalh uma chixku, tuku xlikgalhtawakga kBiblia tsukulh chan kxnaku. Tuku xmasiya xlakata la nalinaw kilatamatkan lakgpalilh xtalakpuwan. Xla wa: «Xapulana xaklakpuwan pi tastakyaw tuku xaklikgalhtawakga kaj kmaktum libro xmaxtukanit nema ni lu xlakaskinka xakakxilha. La uku, akxni kilimakgalhtawakgekan Biblia, niku wan la linkan latamat, kmakgkatsi pi kintalakapastakni kiwani pi nitlan tuku xaktlawama».

◼ Estados Unidos. Akgtum tamakgaxtokgat tiku lichuwinankgo Dios, makgtayanankgo niku lhuwa titaxtukgo latamanin, akgtum kilhtamaku talakatsuwilh niku xwilakgolh likgalhtawakga chatum puskat xalak Taiwán, xkanajlani Dios pero xlakpuwan pi Biblia maktum libro tiku kaj wa xmaklakaskinkgo xalak occidente. Maski chuna, xlakpuwan pi Biblia xʼama makgtaya xlakata lipaxuw xlatamalh, chu maski putum xkgalhi kxlatamat xmakgkatsi pi wi tuku xtsankgani chu xlipuwan. Uma tamakgaxtokgat tsukukgolh limakgalhtawakgekgo libro ¿Tuku xlikana masiyay Biblia? chu folleto Cómo hallar paz y felicidad duraderas. Ni likgalhtawakgakgolh capítulo 2 xla uma libro, wata likgalhtawakgakgolh sección xla folleto nema wanikan «Una guía para toda la humanidad». Akxni xlikgalhtawakgakgonita akgchaxan párrafo xla uma sección, lu kaks lakawa puskat chu wa pi Biblia ni xtachuna libros nema kgalhikgo amakgapitsi takanajla. Chu akxni akxilhkgolh tuku xlichuwinanit Biblia chu chuna la kgantaxtunit, wa: «¡Klakpuwan pi kajwatiya uma libro kgantaxtu putum tuku wan!».

◼ Japón. Chatum tiku lichuwinan Dios, tachuwinalh tiku ni xkanajlani Dios. Uma tala chuntiya xlakgapaxialhnan, maski ni lhuwa kilhtamaku xtachuwinan, xmasiyani artículo xla serie nema wanikan «¿Casualidad o diseño?», xla ¡Despertad! Uma chixku tsinu tsinu lakgpalilh xtapuwan chu tsukulh akxilha pi max wi chatum Malakatsukina. La uku kanajla pi wi chatum Dios, chu limakgalhtawakgemaka folleto Lakwan tamakatsin masta Dios.

◼ Canadá. Chatum puskat tiku aku xtaxtuma kxchik akxni nina xtanu kxputlaw, chatum tala maxkilh maktum revista. Akxni tala taspitli, puskat wanilh pi ni xlakaskin xlakata ni xkanajlani Dios. Pero ni xlajwanalh chu lakpuwa nalini folleto Cómo lograr una vida llena de satisfacción. Akxni tekgspa uma puskat, wanilh xlakata maski xkatsiya pi ni kanajlani Dios, pero xkatsi pi xakstu xwi chu xmakgtayaputun. Pulana masinilh párrafo 6 xla página 4, tuku lichuwinan pi tuwa tekgskan xatlan tastakyaw. Alistalh wanilh pi kalikgalhtawakgalh tuku wan xlipulaktiy, niku wan la tlan kamakgastakkan kamanan. Puskat xatapaxuwan makgamakglhtinalh uma folleto.