Lu tlan tasiyakgo xalaksasti tratados
1. ¿Tukuya likgalhtawakga xalaksasti kgalhiyaw chu tlan tasiyakgo xlakata akxni naʼanaw lichuwinanaw Dios?
1 Tamakxtumit xaʼakgtutu kilhtamaku xla xTatayananin Jehová 2013 «Wa xTachuwin Dios xaxlikana» taxtukgolh makkitsis tratados xalaksasti, nachuna tratado Tamakatsin xla Tamapakgsin número 38 nema wanikan ¿Tlan nalatamaparakgo tiku nikgonita? Uma makchaxan tratados tanu la katlawakanit chu lu tlan tasiyakgo. ¿Tuku xlakata kamasastiparaka? ¿La liwana nakamaklakaskinaw xlakata la tasiyakgo akxni namakgpitsiyaw akgatunu chiki?
2. ¿La nakinkamakgtayayan xalaksasti tratados?
2 Tuku xlakata lakgpalika la tasiyakgo. Pulaktati tuku tlan nakinkamakgtayayan xlakata liwana nalimaklakaskinaw kʼakgatunu chiki: 1) katlawaw akgtum takgalhskinin xlakata natsukuyaw chuwinanaw, 2) kamasiyaniw tuku wan Biblia, 3) kamakgxtakgniw tratado xlakata nalikgalhtawakga chu 4) kamakgxtakgniw akgtum takgalhskinin xlakata nakgalhtiyaw akxni nalakgapaxialhnamparayaw chu kalakkaxwiliw tukuya kilhtamaku nataspitaw. Xalaksasti tratado nakinkamakgtayayan xlakata natlawayaw uma pulaktati tastakyaw.
3. ¿La namakgpitsiyaw tratados xalaksasti akxni nalichuwinanaw Dios?
3 La nakamaklakaskinaw. Akxni wi tiku natachuwinanaw, 1) kamasiyaniw lu xlakaskinka takgalhskinin niku akglhuwa limin takgalhtin xapulana página xla uma tratado chu kakgalhskiw tuku lakpuwan, 2) kamalakgakiw tratado chu kalitachuwinaw niku wan «Wantuku wan Biblia». Alistalh tlan nalikgalhtawakganiyaw versículo kBiblia, komo tiku tachuwinamaw kgalhi kilhtamaku tlan natalikgalhtawakgayaw subtítulo «La kinkamakgtayayan nakatsiyaw», 3) namaxkiyaw tratado chu nawaniyaw pi kalikgalhtawakgalh akxni nakgalhi kilhtamaku, 4) akxni nina anaw, kamasiyaniw takgalhskinin nema wi kxaʼawatiya página, subtítulo nema wan «Kalilakpuwanti uma» chu katalakkaxla tuku kilhtamaku tlan naʼakxilhatit takgalhtin nema masta Biblia.
4. La tlan namaklakaskinaw xalaksasti tratados akxni nalakgapaxialhnamparayaw tiku litachuwinaw Dios?
4 Na ni tuwa tlawakan revisita. Kajwatiya namaklakaskinaw texto xalak Biblia nema wi xaʼawatiya página xla tratado xlakata nakgalhtiyaw takgalhskinin nema xmakgxtakgnitaw chu kamasiyaniw folleto Lakwan tamakatsin masta Dios nema limin tratado. Alistalh, tlan namasiyaniyaw tuku wan folleto chu lección niku tlakg lichuwinan tuku litachuwinaw, chu alistalh kamakgxtakgniw folleto. Komo namakglhtinan, nataspitparayaw xlakata natalikgalhtawakgayaw. Chuna tsukukan makgalhtawakgenankan. Komo ni namakgxtakgniyaw folleto, tlan namaxkiyaw atanu tratado chu nawaniyaw pi tlan natalikgalhtawakgaparayaw atanu kilhtamaku.
5. ¿Tuku xlakata lu kinkamakgtayayan tratados akxni lichuwinanaw Dios?
5 Liwakaya akgtum ciento puxamakaw kata maklakaskinitaw tratados akxni anaw lichuwinanaw Dios. Lakgpalitilhakanit la xlilaklanka chu la tasiyakgo, pero lu kinkamakgtayakgonitan akxni lichuwinanaw Dios. Liwana kalimaklakaskiw uma xalaksasti tratado xlakata chuntiya namasiyayaw tuku wan Biblia xlikalanka Katiyatni (Prov. 15:7a).