Niku tamasta xtakgalhtin akgtum takgalhskinin

◼ ¿Tuku nakatsinikgo kamanan xlakata nastaka xtakanajlakan?

Natlatni tiku stalanikgo Cristo lhuwa tuku tlawakgo xlakata namakgastakkgo xkamanankan, namasiyanikgo tu xatlan xtachuna la xtalakaskin Jehová (Efes. 6:4). Akgtum liʼakxilhtit, tsisa katalikgalhtawakgakgo texto xala chali chali xlakata akxilhkgonit pi lu tlan tuku kakitaxtuninit. Akxni kakninanikgo Dios familia chu atanu tuku tlawakgo, makgapitsi familias akxilhkgo video, o nalichuwinankgo tuku xla libro Los jóvenes preguntan, limasiyakgo liʼakxilhtit la wan Biblia xlakata la xlamakgolh xalak makgan. Pero xlakata kamanan nastakkgo xtakanajlakan talakaskin nakatsikgo xaxlikana nema tuwa akgatekgskan (Heb. 6:1).

Kalakapastakwi tuku kamasiyaniyaw latamanin. Xapulana akxni kalakgapaxialhnaw latamanin o alistalh, tuku lakaskinaw matsukiputunaw akgtum takgalhtawakga xla libro ¿Tuku xlikana masiyay Biblia? Akxni talikgalhtawakgakgota uma libro, alistalh katalikgalhtawakga «Katamakgxtakgtit kxtapaxkit Dios». ¿Tuku xlakata chuna tlawayaw? Xlakata libro ¿Tuku xlikana masiyay Biblia?, kamakgtayakgo xlakata tlakg nakatsikgo tuku wan Biblia chu libro «Katamakgxtakgtit kxtapaxkit Dios» tlawa pi nalilatamakgo tastakyaw xala kBiblia. Likgalhtawakgakan uma libros tlawa pi «katankgaxekglakgolh» xla Cristo chu «lakatanks natawilakgo kxtakanajlakan» (Col. 2:6, 7). ¿Tlan xwa komo nawa xkatalikgalhtawakgaw kinkamanankan? Nachuna talakaskin pi kinkamanankan na nakatsikgo talakgmaxtut chu xTamapakgsin chu la wilakgolh tiku nikgonita. Nachuna, xlikatsitkan tuku xlakata masta Dios kaʼanalh tapatin chu la katsiyaw pi lamaw xaʼawatiya kilhtamaku. Liwana nakanajlayaw xlakata akinin xtatayananin Jehová kgalhiyaw xaxlikana, akgatekgskan xtastakyaw Biblia chu liwana wi «kxtalakapastaknakan» (Heb. 5:14). Xlikana, natlatni kuenta xlitlawatkan la akgatekgskgo chu xkatakan xkamanan. Maski chuna, laktsukamanan liwana akgatekgskgo tuku xaxlikana maski tuwa akgatekgskan (Luc. 2:42, 46, 47).