Agosto natalichuwinan Dios chuna la nikxni tatlawanit

1. ¿Tuku natamakgpitsi xlikalanka Katiyatni akxni talakatsuwima nawan akgtum ciento kata lata lakatsukulh xTamapakgsin Dios?

¹ Akxni talakatsuwi akgtum ciento kata lata lakatsukulh xTamapakgsin Dios, ¡lu xlakaskinka pi kalimalankiw Jehová akxni namakgpitsiyaw uma tratado! Agosto namakgpitsiyaw xasasti tratado xlikalanka Katiyatni nema wanikan ¿Niku natekgsa xtakgalhtin xalaktuwa takgalhskinin xla latamat? Uma tratado kamakgtaya latamanin naputsakgo kBiblia xtakgalhtin xtakgalhskininkan, chu lichuwinan pi sitio jw.org tlan kamakgtaya.

2. ¿La namakgtayananaw xlakata na namalankiyaw Jehová agosto?

² Lu namalankiyaw. Xlakata natalan nakamakgtayayaw pi tlakg nalichuwinankgo Dios, lakkaxwilikanit pi tiku nalakaskinkgo chu matlanikgo tlan naliskujkgo la precursores auxiliares, chu kaj puxakaw hora namastakgo agosto. Xlakata kgalhi akgkitsis semanas, lhuwa natalan tiku skujkgo o tiku ankgo kʼescuela, tlan naliskujkgo precursorado auxiliar ama papaʼ. Komo tiku makgalhtawakgepat o chatum minkgawasa makgatsi tuku taskin xlakata nalichuwinan Dios, tunkun katachuwinanti tiku kamakgtaya nalakkaxwilikgo xtaskujutkan amakgapitsi lakgkgolotsin. ¡Lu tlan namakgkatsikgo xlakata na nalichuwinankgo Dios uma papaʼ, nema nikxni chuna tatlawanit! Lhuwa precursores jaxkgo agosto akxni makgatsikgonita xʼhoraskan, pero max tlan nalakkaxwilikgo xkilhtamakujkan xlakata namakgtayanankgo akxni natamakgpitsi tratado. La uku tlan natsukukgo familias akxilhkgo la namakgpitsikgo uma tratados xlakata na namalankikgo Jehová agosto (Esd. 3:11; Prov. 15:22).

3. ¿Tuku lakaskinaw pi nala akxni natatlawa uma taskujut?

³ Maski makgtayananitaw akxni tamakgpitsinit atanu likgalhtawakga, lakaskinaw pi uma natatlawa la nikxni chuna tatlawanit. ¿Tlakg nalhuwan horas, tiku lichuwinankgo Dios chu precursores auxiliares agosto? Akxni talakatsuwima nawan septiembre kata 2014, ¡lakaskinaw pi Jehová kasikulunatlawalh taskujut nema natlawayaw xlikalanka kKatiyatni, xlakata agosto natatlawa taskujut la nikxni chuna tatlawanit! (Mat. 24:14.)