¿Precursor auxiliar nawana?
1. ¿Tuku xlakata akxni natalakapastaka akxni tinilh Jesús tlan tlakg nalichuwinanaw Dios?
1 Tlan tlakg nalichuwinanaw Dios akxni natalakapastaka akxni tinilh Jesús. Uma kilhtamaku lilakapastakaw la xlilhuwa kinkapaxkiyan Jehová xlakata kinkalilakgmaxtun xKgawasa (Juan 3:16). Xlakata lu paxtikatsiniyaw tlawa pi nakalitachuwinamputunaw amakgapitsin xlakata Jehová chu tuku tlawama xpalakata latamanin (Is. 12:4, 5; Luc. 6:45). ¡Lu paxuwayaw uma kilhtamaku xlakata kawaniyaw kintalakatsukan, kifamiliajkan chu tiku kalakgapasaw xlakata nakinkataʼankgoyan kʼuma tamakxtumit! Nachuna, kalakgamparayaw tiku kilakgolh ktamakxtumit. ¿Tlan precursor auxiliar xwanti marzo, abril chu mayo?
2. ¿Tuku xlakata marzo tlan precursor auxiliar nawankan?
2 Tlakg kaskujwi marzo. Kpapaʼ marzo lu tlan precursor auxiliar nawankan xlakata tiku precursor nawankgo tlan nalaksakkgo namastakgo 30 o 50 horas. Komo akxni superintendente xla circuito nalakgapaxialhnan congregación kpapaʼ marzo, tiku naliskujkgo la precursor auxiliar tlan naʼankgo ktamakxtumit nema nakatakgalhikan precursores regulares chu precursores especiales. Akxni natalakapastaka akxni tinilh Cristo nema natatlawa martes 26 xla marzo kata 2013, tlakg lhuwa kilhtamaku namastakan invitaciones xlakata natsuku 1 xla marzo. Nachuna, marzo kgalhi akgkitsis sábado chu akgkitsis domingo. Wa xlakata, liwana kaʼakxilhti komo tlan tlakg nalichuwinana Dios uma papaʼ nema lu xlakaskinka.
3. ¿Tuku tlan natlawayaw xlakata tlakg nalichuwinanaw Dios?
3 La uku kalakkaxwili. La uku tlan naʼakxilhaw la wi kinkilhtamakujkan chu tuku natlawayaw xlakata tlan precursor nawanaw. Xlakata natalakaskin xtamakgtay putum familia, lu tlan nawan komo akxni nakakninaniyatit Dios kfamilia nalichuwinanatit tuku natlawayatit chu kalakkaxwilitit minkilhtamakujkan (Prov. 15:22). Komo nila precursor auxiliar nawana ni kataxlajwani. ¿Tlan tlakg lhuwa kilhtamaku nalichuwinana Dios akxni nataxtuya? ¿Na tlan xtaxtu atanu kilhtamaku ksemana?
4. ¿Tuku tasikulunalin namakglhtinanaw komo tlakg nalichuwinanaw Dios marzo, abril chu mayo?
4 Komo tlakg nalichuwinanaw Dios marzo, abril chu mayo, tlakg napaxuwayaw chu tlakg tlan namakgkatsiyaw xlakata skujnimaw Jehová chu kamakgtayamaw amakgapitsin (Juan 4:34; Hech. 20:35). Tuku tlakg xlakaskinka, namakgapaxuwa Jehová tuku natlawayaw (Prov. 27:11).