¿La kiʼakxilha Jehová?
1. ¿La tatalakxtumi Biblia la akgtum espejo?
1 ¿Makglhuwa lakaʼakxilhkana kʼespejo? Max atsinu ni kimputumkan chuna tlawayaw chali chali, chuna tlawayaw xlakata kinkamakgtayayan nakatsiyaw la natakaxtayayaw. Biblia tlan tamalakxtumikan espejo. Akxni likgalhtawakgayaw kinkamakgtayayan nakatsiyaw tuku xlikana wi kkinakujkan, nema akxilha Jehová (1 Sam. 16:7; Sant. 1:22-24). Xtachuwin Dios «na tlan lilakgapasa xatu ntalakapastakna, chu lantla xtatlawaputu nchatum» (Heb. 4:12). Likgalhtawakgakan Biblia chali chali chu lilakpuwankan tlan nakinkamakgtayayan tuku kilitlawatkan xlakata tlakg nakatsiniyaw lichuwinanaw Dios. ¿Tuku xlakata chuna wanaw? (Sal. 1:1-3.)
2. ¿La kinkamakgtayayan Biblia xlakata liwana nalakpuwanaw la skujnanimaw Dios?
2 Kalimaklakaskinti Biblia la akgtum espejo. Tuku lichuwinan Biblia xlakata kskujnin Dios tiku ni xmakgxtakgkgo, kinkamakgtayayan nakatsiyaw tuku tayat lakgati. Akgtum liʼakxilhtit mapakgsina David limasiyalh pi xlikana xpaxki Dios (1 Sam. 17:45, 46). Palakachuwina Isaías ni pekualh chu wa pi xʼama lichuwinan Dios niku ni xkgaxmatputunkan xtachuwin (Is. 6:8, 9). Xlakata Jesús lu xpaxki xtlat xalak akgapun lu xmatliwakglha akxni xlichuwinan, tlan xmamakgkatsini, chu ni la akgtum takuka xakxilha (Juan 4:34). Xapulana kstalaninanin Cristo ni pekuankgolh akxni lichuwinankgolh Dios, lipawankgolh Jehová chu ni mastakgolh talakaskin nataxlajwanikgo (Hech. 5:41, 42; 2 Cor. 4:1; 2 Tim. 4:17). Akxni lakapastakaw umakgolh liʼakxilhtit kinkamakgtayayan xlakata tlakg nakatsiniyaw lichuwinanaw Dios.
3. ¿Tuku xlakata talakaskin nalakgpaliyawa tuku nitlan kkilatamatkan?
3 Kalakkaxtlawa tuku nitlan. Nitu litaxtu komo nalakaʼakxilhkanaw kʼespejo chu ni nakaxtlawayaw tuku nitlan akxilhwi. Tlan naskiniyaw tamakgtay Jehová xlakata liwana naʼakxilhaw kintayatkan chu nalakgpaliyaw tuku natalakaskin (Sal. 139:23, 24; Luc. 11:13). Xlakata nialh makgas namin xlisputni kakilhtamaku lhuwa latamanin nanikgo komo ni nakamakatsiniyaw, wa xlakata talakaskin tunkun natlawayaw (1 Cor. 7:29; 1 Tim. 4:16).
4. ¿Tuku kitaxtuni chixku tiku liwana likgalhtawakga xtachuwin Dios chu alistalh lakgpali tuku nitlan kxlatamat?
4 Jehová akxilha tuku wi kkinakujkan chu ni wa la tasiyayaw, wa uma tuku tlakg xlakaskinka (1 Ped. 3:3, 4). ¿Tuku kitaxtuni chixku tiku liwana likgalhtawakga xtachuwin Dios chu alistalh lakgpali tuku nitlan kxlatamat? Litaxtuy la chatum tiku «xlakata tlawa tuku kgaxmata, lipaxuwa akxni makgantaxti» (Sant. 1:25). Xlikana, tlakg xatapaxuwan skujnin nawanaw chu tlakg tlan natlawayaw taskujut xlakata «Limasiyayaw xtachuna la espejos xlilanka Jehová» (2 Cor. 3:18).