Tlakg kakatsini la nalichuwinana Dios: kalimasiya la limakgalhtawakgenankan Biblia wa kalimaklakaskinti libro ¿Tuku xlikana masiyay Biblia?

Tuku xlakata xlakaskinka. Lhuwa latamanin ni katsikgo tuku wamputun akxni kamalaknuniyaw takgalhtawakga xalak Biblia. Max lakpuwan pi naʼan akgtum kpukgalhtawakga o atanu. ¿Tuku xlakata ni kalimasiyaniyaw tuku wamputun uma? Kakamasiyaniw pi takgalhtawakga xalak Biblia ni tuwa chu lu makgtayanan. Ni lhuwa kilhtamaku nalitlawayaw chu max nakxmalakcha.

La natlawayaw:

Akxni wani mintukuwani, kakgalhskinti tiku tachuwinampat komo lilakgaputsa kilhtamaku nema aku mima.
Kawani pi uma, lhuwa latamanin lilakgaputsakgo. Alistalh kamasiyani liputsan xla libro ¿Tuku xlikana masiyay Biblia? Kawani pi uma likgalhtawakga ni tuwa makgatekgsninan tuku lichuwinan Biblia xlakata kilhtamaku nema aku mima chu atanu. Alistalh, kakgalhskinti tuku capítulo lakgati.
Kamaxki maktum libro chu kaputsa capítulo nema laksakli. Kawani pi kcapítulo tlakg natekgsa xtakgalhtin takgalhaskinin nema wi niku litsuku párrafo.
Kakgalhskinti komo likgalhtawakgaputun xapulana párrafo. Alistalh katlawani takgalhskinin xla uma párrafo chu kalichuwinantit xatakgalhtin. Kalikgalhtawakga chu kalichuwinanti tuku tlakg xlakaskinka kgalhi texto. Kawani la tlawa xlakata natekgsa xtakgalhtin kmilibro.
Kalikgalhtawakga párrafo nema stala. Kawani tiku tachuwinampat pi kamastalh xtakgalhtin tuku akgatekgsa pero ni kaj kalikgalhtawakgalh.
Kawani pi lu tlan la mastalh xtakgalhtin chu katalakkaxla pi namakgalhsputuyatit uma capítulo atanu kilhtamaku.
Komo namaxkiyan talakaskin, kamasiyani video ¿Tuku tatlawa kʼakgtum takgalhtawakga xalak Biblia?, nema wi ksitio jw.org/jw-tot.

Chuna kalitsakgsa putum papaʼ:

Kaskini Jehová pi kasikulunatlawalh mintaskujut xlakata namatsukiya akgtum takgalhtawakga xalak Biblia (Filip. 2:13).
Akxni namakglichuwinana Dios, kalitsakgsa maski kaj makgtum la limakgalhtawakgenankan Biblia, wa kalimaklakaskinti libro ¿Tuku xlikana masiyay Biblia? o ¿Tuku tatlawa kʼakgtum takgalhtawakga xalak Biblia?