KILATAMATKAN LA KSTALANINANIN CRISTO

¿Katsiya tuku natlawaya akxni ni nakgalhiya tumin?

¿Tuku xlakata ni kaks kinkamalakawaniyan pi kxlikalanka katiyatni tlakg tapalaxlanama chu nialh akchan tumin? Xlakata lamaw kxlikgalhsputni xaʼawatiya kilhtamaku, chu Biblia kinkawaniyan pi ni kalipawaw tuku «lhuwa xtapalh nema nalakgsputkgo» (1Ti 6:17; 2Ti 3:1). ¿La nakinkamakgtayayan xliʼakxilhtit mapakgsina Jehosafat xlakata nalakkaxwiliyaw tuku natlawayaw akxni natitaxtuyaw tuku tuwa xlakata tumin?

Akxni xtalamakgasitsin Jehosafat ankgolh talatlawakgo, xla lipawa Jehová (2Cr 20:9-12). Nachuna, wi tuku xtlawanita xlakata nakuentajtlawa kachikin: xkamatliwakglhnit xpatsaps kachikin chu xkalakkaxwilinit ksoldados (2Cr 17:1, 2, 12, 13). Na tlan nakinkakitaxtuniyan komo nalipawanaw Jehová chu wi tuku natlawayaw akxni nina kinkalakgchinan tuku tlakg tuwa.

¿TUKU TLAN NATLAWAYAW LA UKU XLAKATA NATAYANIYAW AKXNI NI NAʼANAN TUMIN?

Kamakaxti tuku namatliwakglha mintakanajla. Kalipaxuwa tuku kgalhiya la uku chu kalipawanti pi Jehová tlan namaxkiyan tuku namaklakaskina chali chali (Mt 6:26; 1Ti 6:8). Akxni naputsaya tuku maklakaskina chali chali, kuenta katlawa ni nalakatsalaya xtastakyaw Biblia (Ro 2:21). Kalakkaxwili tuku natlawaya xlakata nakgalhiya tuku namatliwakglha mintakanajla komo ni naʼanan luz o internet. Akgtum liʼakxilhtit, tlan namakiya likgalhtawakga kxakapsnat o na tlan namaktiya likgalhtawakga kxaʼelectrónico.

Kamakaxti tuku namaklakaskina. Kaliskujti xlakata niti nalaklipiniya tumin chu ni kalilaktlawa mintumin tuku ni maklakaskina. Uma namakgtayayan akxni natitaxtuya tuku tuwa xlakata tumin (Pr 22:7). Komo matlaniya, kamaki liwat nema ni lakapala lakxla chu atanu tuku namaklakaskina. Kmakgapitsi kachikinin tlan kitaxtu chananankan, xlakata uma makgtayanan ni lu nalaktlawakan tumin.

AKXNI AKXILHNITATA NAWAN VIDEO ¿LA NATAKAXAW AKXNI NINA MIN TUKU MASPUTUNAN?, KAKGALHTI UMAKGOLH TAKGALHSKININ:

Tuku tasiya kvideo «¿La natakaxaw akxni nina min tuku masputunan?». Dibujos niku tasiya Biblia, akgtum mochila de emergencia chu akgtum celular, chu tiku makgtayanamakgo niku kaxtlawamaka chiki.

¿Tuku tlan natlawaya la uku nema namakgtayayan akxni wi tuku kaj lakapala nala?

Mintakgalhtin

Tuku tasiya kvideo «¿La natakaxaw akxni nina min tuku masputunan?». Dibujos niku tasiyakgo natalan tiku makgtayanamakgo klabores de socorro. Makgapitsi makgtayanamakgo niku kakaxtlawamaka chiki chu makgapitsi maktimakgo cajas kʼakgtum putlaw.

¿Tuku tlan natlawaya la uku xlakata tlan nakamakgtayaya amakgapitsin?

Mintakgalhtin