¿Tuku nalakgpali milatamat?

TUKU LHUWA KANAJLAKGO

ASTROLOGÍA. Lhuwa latamanin lakpuwankgo pi chuna la xwilakgolh staku akxni lakachinkgolh wa tuku tlawa pi tlan nakakitaxtuni kxlatamatkan. Wa xlakata, likgalhtawakgakgo horóscopo xlakata nakatsikgo tuku nakaʼakgspula, chu wi tuku tlawakgo xlakata ni nakgalhikgo taʼakglhuwit chu tlan nakakitaxtuni.

FENG SHUI. Amakgapitsi lakpuwankgo pi chuna la nalakkaxtlawakgo xchikkan wa tuku nakamakgtaya xlakata tlan nakakitaxtuni. Chatum chixku tiku lama Hong Kong, tiku wanikan Lo Wing,a wan: «Chatum makgalhtawakgema xla feng shui kiwanilh pi komo wi niku xakwililh akgtum cristal anta kkimpustan, xakama tlaja lhuwa tumin».

KAKAKNINANIKAN XALAK FAMILIA TIKU NIKGONITA. Amakgapitsi lakpuwankgo pi xlikakninanitkan tiku nikgonita o atanu dioses xlakata xlakan nakakuentajtlawakgo o nakasikulunatlawakgo. Van, chatum puskat xalak Vietnam, wan: «Xaklakpuwan pi komo xakkakakninanilh tiku nikgonita, akit chu kinkaman tlakg tlan xaklatamaw».

REENCARNACIÓN. Lhuwa kanajlakgo pi akxni niyaw lakachimparayaw chu pi uma makglhuwa chuna la. Wankgo pi tuku titaxtukgo la uku wa xlakata tuku tlawakgolh makgasa akxni xlamakgo.

Maski lhuwa tiku wankgo pi ni kanajlanikgo putum uma, chuntiya likgalhtawakgakgo horóscopo, tabla ouija^®, cartas del tarot, chu kalikgalhtawakganikan xmakankan..., lakpuwankgo pi max umakgolh nakamakgtaya nakatsikgo tuku nakaʼakgspula kkilhtamaku nema aku mima.

TUKU KITAXTUNIT

Tiku kanajlanikgo putum uma, ¿tlakg tlan latamat kgalhikgo la uku chu kkilhtamaku nema aku mima?

Kaʼakxilhwi tuku titaxtulh Hào, tiku lama kVietnam. Xla mastalh talakaskin pi astrología, feng shui chu kakakninanikan familia tiku nikgonita wa xpulalilh xlatamat. Pero ¿tlan kitaxtunilh? Hào wan: «Nitlan kinkitaxtunilh kkinegocio, lhuwa tumin klaklilh, kkgalhilh taʼakglhuwit kfamilia chu lu klilipuwa».

Qiuming, xalak Taiwán, xkanajlani astrología, reencarnación, pi laklhkawilikanit tuku nakinkaʼakgspulayan, feng shui chu kakakninanikan xalak familia tiku nikgonita. Pero akxni xlakputsananinita putum uma, wa: «Kakxilhli pi putum uma takanajla chu talismanin ni liwana taʼakgatekgsa chu ni lakxtum tuku wankgo. Astrología makglhuwa akgtsankga. Chu xlakata reencarnación..., komo ni lakapastaka tuku tlawa kmilatamat nema titaxtulh, ¿la nalakgpaliya mintayat chu tlakg tlan nalipina milatamat komo nalakachimparaya?».

Hào, Qiuming chu lhuwa latamanin akxilhkgonit pi astrología, reencarnación, kakakninanikan xalak familia tiku nikgonita chu pi laklhkawilikanit tuku nakinkaʼakgspulayan ni tlawakgo pi tlakg tlan nawan kilatamatkan kkilhtamaku nema aku mima. Pero ¿wamputun uma pi nila lakgpaliyaw kilatamatkan kkilhtamaku nema aku mima?

Lhuwa kanajlakgo pi komo nakgalhikgo akgtum tlan takgalhtawakga chu nakgalhikgo lhuwa tumin, tlan nakakitaxtuni kxlatamatkan kkilhtamaku nema aku mima. Pero ¿la makgkatsikgo tiku chuna tlawakgonit?