LA NAMACHOKGOYAW TASITSI
3 | Kamaxtu Tasitsi Kmintalakapastakni
Biblia wan:
«Kamasastitit chuna la lakpuwanatit, xlakata tlan liwana nalakgapasatit xtalakaskin Dios, nema xatlan, nema xaʼakgstitum, chu nema xla tlan akxilha» (ROMANOS 12:2).
¿Tuku wamputun?
Dios xlakaskinka akxilha tuku lakpuwanaw (Jeremías 17:10). Xlikana pi kuenta kilitlawatkan tuku wanaw chu tuku tlawayaw, pero ni kajwatiya uma talakaskin. Xlakata tasitsi anta lakatsuku kkintalakapastaknikan chu kkinakujkan, kilitamakxtukkan kaxatukawa tasitsi nema anan kkintalakapastaknikan chu tuku makgkatsiyaw. Kajwatiya chuna tlan nalakgpaliyaw kintayatkan chu namakgatlawajaw tasitsi.
Kalitsakgsa uma:
Kalilakpuwanti tuku makgkatsiya chu tuku lakpuwana xpalakata amakgapitsin, liwaka tiku tanu xcolorkan o tanu xpaiskan. Kalilakpuwanti: «¿La kkaʼakxilha? ¿Chuna klakpuwan kaj xlakata tuku kkatsi xpalakatakan o klaksakpaxkinan?». Ni kaʼakxilhti redes sociales, películas o atanu lilakgastan nema masiya tasitsi chu tatalatlaw.
Biblia, xTachuwin Dios tlan nakinkamakgtayayan namaxtuyaw tasitsi kkintalakapastaknikan chu kkinakujkan
Min kilhtamaku tuwa makgkatsiyaw nalitayayaw tuku lakpuwanaw chu tuku makgkatsiyaw. Pero xTachuwin Dios kinkamakgtayayan nakatsiyaw “tuku lakpuwan chu tuku tlawaputun kinakujkan” (Hebreos 4:12). Wa xlakata kakatsi tuku wan Biblia chu katamalakxtupi xtamasiy tuku wix lakpuwana. Chu alistalh kaliskujti xlakata tamasiy xalak Biblia nalakgpali mintalakapastakni. Biblia, xTachuwin Dios tlan namapanu «tuku tliwakglh wilakgo» kkintalakapastaknikan chu kkinakujkan, chuna la tasitsi (2 Corintios 10:4, 5).