¿Xlikana kgalhti Jehová kiʼoraciones?

1, 2. ¿Tuku xlakata max nalakpuwanaw pi Jehová ni kgalhti kiʼoracioneskan?

«KALIPAXUWA naskujnaniya Jehová, chu xla namaxkiyan tuku lakaskin minaku» (Sal. 37:4). ¡Lu lilakgatit uma tamalaknun! Pero ¿kilhchanima uma pi Jehová tunkun nakinkamaxkiyan putum tuku skiniyaw? Lu tlan komo nalilakpuwanaw uma takgalhskinin. ¿Tuku xlakata? Kalilakpuwanti uma. Chatum tala tsumat wani Jehová pi amputun kʼEscuela xla Tiku lichuwinankgo xTamapakgsin Dios, pero titaxtu makgapitsi kata chu ni malakgachanikan invitación xlakata naʼan. Chatum tala kgawasa tiku tatatla skini Jehová pi kamapaksalh xlakata tlakg namakgtayanan kcongregación, pero uma tala ni tatlani. Akgtum tamakgaxtokgat tlawani oración Jehová xlakata xkgawasakan ni namakgxtakga xkachikin, pero xkgawasakan laksaka namakgxtakga xkachikin Jehová.

² Max wi tuku wix skininita Jehová nema ni makglhtinanita. Uma max natlawa pi nalakpuwana pi Jehová kakgalhti xʼoracioneskan amakgapitsin pero ni kgalhti miʼoraciones, o max nalakpuwana pi max wi tuku nitlan tlawanita chu wa xlakata ni kgalhti miʼoraciones. Chatum tala puskat tiku wanikan Janiceb chuna xmakgkatsi. Xla chu xchixku xwanikgonit Jehová pi xʼamputunkgo skujkgo kBetel. Janice wan: «Xaklakpuwan pi tunkun xʼamaka kinkatasanikanan». Pero titaxtulh makgapitsi papaʼ chu asta makgapitsi kata, chu ni kamalakgachanika invitación xlakata tlan xʼankgolh. Xla wan: «Lu xaklipuwan chu ni xakkatsi tuku naktlawa. Xaklakpuwan pi max wi tuku nitlan xaktlawanit. Liwana xakwaninit Jehová tuku xaklakaskin chu ni xakʼakgatekgsa tuku xlakata ni xkgalhtinit kiʼoraciones».

3. ¿Tuku nalichuwinanaw kʼuma artículo?

³ Max asta namin kilhtamaku nalakpuwanaw pi Jehová ni kgaxmata kiʼoracioneskan. Makgapitsi xlakskujnin Dios xalamakgasa nachuna lakpuwankgolh (Job 30:20; Sal. 22:2; Hab. 1:2). ¿Tuku namakgtayayan nakanajlaya pi Jehová kgalhti miʼoraciones? (Sal. 65:2). Xlakata tlan nakgalhtiyaw uma takgalhskinin, pulana kaʼakxilhwi umakgolh pulaktutu: 1) tuku tlan tlawa Jehová, 2) tuku lakaskin Jehová pi katlawaw akinin chu 3) ¿tuku xlakata max kililakgpalitkan tuku skinaw kkiʼoracioneskan?

TUKU TLAN TLAWA JEHOVÁ

4. Chuna la wan Jeremías 29:​12, ¿tuku kinkamalaknuninitan Jehová?

⁴ Jehová kinkamalaknuniyan pi nakgaxmata putum kiʼoracioneskan (kalikgalhtawakga Jeremías 29:12). KiDioskan lu kapaxki xlakskujnin chu ankgalhin kgaxmata putum xʼoracioneskan (Sal. 10:17; 37:28). Pero uma ni wamputun pi nakinkamaxkiyan putum tuku skiniyaw. Max natalakaskin pi nakgalhkgalhiyaw asta akxni nachin xasasti kakilhtamaku xlakata Jehová nakinkamaxkiyan putum tuku skiniyaw kkiʼoracioneskan.

5. ¿La kgalhti Jehová kiʼoracioneskan?

⁵ Jehová kgalhti kiʼoracioneskan chuna la namakgtayanan nakgantaxtu xtalakaskin (Is. 55:​8, 9). Chu pulaktum xtalakaskin wa pi Katiyatni nalitatsama lakchixkuwin chu lakpuskatin tiku makgamakglhtinankgo xTamapakgsin, chu xatapaxuwan chu makxtum naskujnanikgo. Pero Satanás wa pi latamanin tlakg tlan xʼama kakitaxtuni komo xʼakstukan xtapakgsikgolh (Gén. 3:​1-5). Xlakata Jehová xlimasiyalh pi tuku wanit Akgskgawini ni xaxlikana, mastalh talakaskin pi latamanin xʼakstukan xtapakgsikgolh, chu uma liminit lhuwa taʼakglhuwit kkakilhtamaku (Ecl. 8:9). Katsiyaw pi Jehová ni katilakkaxtlawalh putum umakgolh taʼakglhuwit la uku. Komo chuna xtlawalh, max wi tiku xlakpuwa pi latamanin tlan xʼakstukan tapakgsikgo chu tlan lakkaxtlawakgo taʼakglhuwit nema anan kkakilhtamaku.

6. ¿Tuku xlakata lu xlakaskinka nalipawanaw pi Jehová ankgalhin tlawa tuku xaʼakgstitum chu limasiya tapaxkit?

⁶ Jehová ni lakxtum kinkakgalhtiyan kiʼoracioneskan maski watiya tuku skiniyaw. Akgtum liʼakxilhtit, akxni mapakgsina Ezequías tatatlalh, tasaskinilh Jehová pi xmapaksalh chu Jehová chuna tlawalh (2 Rey. 20:​1-6). Pero akxni apóstol Pablo tasaskinilh pi xmapanunilh «lhtukun» nema xkgalhi kxmakni, nema max akgtum tajatat xwanit, Jehová nichuna tlawalh (2 Cor. 12:​7-9). Kalilakpuwaw tuku titaxtulh apóstol Santiago chu apóstol Pedro. Mapakgsina Herodes xchatiykan xkamakgniputun. Maski natalan tlawakgolh oración xpalakata Pedro chu nachuna xpalakata Santiago, Santiago makgnika, pero Jehová tlawalh akgtum milagro xlakata xlakgmaxtulh Pedro (Hech. 12:​1-11). Max nalilakpuwanaw tuku xlakata Jehová lakgmaxtulh Pedro, pero ni lakgmaxtulh Santiago. Maski Biblia ni wan tuku xlakata, liwana katsiyaw pi Jehová «nikxni tlawa tuku ni xaʼakgstitum» chu pi xpaxki Santiago chuna la xpaxki Pedro (Deut. 32:4; Apoc. 21:14).c Max namin kilhtamaku Jehová ni kintikakgalhtin kiʼoracioneskan chuna la xlakpuwanitaw. Pero nikxni litaʼakglhuwiyaw chuna la Jehová kinkakgalhtiyan, xlakata liwana katsiyaw pi putum tuku xla tlawa ankgalhin xaʼakgstitum chu ankgalhin limasiya tapaxkit (Job 33:13).

7. ¿Tuku ni kilitlawatkan, chu tuku xlakata?

⁷ Ni katamalakxtumiw tuku titaxtuyaw akinin chu tuku titaxtukgo amakgapitsin. Akgtum liʼakxilhtit, max liwana waninitaw Jehová kkiʼoracionkan tuku lakaskinaw pero xla ni kinkakgalhtinitan. Alistalh, katsiyaw pi chatum tala na watiya tuku skinilh Jehová chu Jehová kgalhtilh xʼoración. Wa uma tuku titaxtulh chatum tala tiku wanikan Anna. Xchixku, Matthew, xkgalhi cáncer, chu xla xtlawa oración xlakata xchixku xtatlanilh. Uma kilhtamaku, atanu chatiy natalan lakpuskatin tiku xlinkgoya kata na xkgalhikgo cáncer. Wa xlakata, Anna xtlawa oración xpalakata xchixku chu xpalakatakan umakgolh chatiy natalan. Umakgolh natalan tatlanikgolh, pero Matthew nilh. Xapulana, Anna xlakpuwan pi max Jehová wa tiku xkamakgtayanit natatlanikgo umakgolh natalan, chu komo wa Jehová tiku xkamakgtayanit, xlilakpuwan tuku xlakata ni xmakgtayanit xchixku. Ni liwana katsiyaw tuku xlakata umakgolh natalan tatlanikgolh, pero wi tuku liwana katsiyaw: pi Jehová makgtuminika namapanu putum tuku kinkamakgapatinanan chu pi lu kamalakastakwaniputun xlakskujnin (Job 14:15).

8. 1) Chuna la wan Isaías 43:​2, ¿tuku tlawa Jehová xlakata nakinkamakgtayayan? 2) ¿La kinkamakgtayayan oración akxni titaxtuyaw tuku tuwa? (Kaʼakxilhti video Oración kinkamakgtayayan chuntiya natayaniyaw).

⁸ Jehová ankgalhin nakinkamakgtayayan. KinTlatkan Jehová, lu kinkapaxkiyan chu lu nitlan limakgkatsi akxni patinanaw (Is. 63:9). Pero ni mapanu putum taʼakglhuwit nema titaxtuyaw, nema Biblia tamalakxtumi chuna la lhuwa kgalhtuchokgo chu lhkuyat (kalikgalhtawakga Isaías 43:2). Tuku xla kinkamalaknuniyan wa pi nakinkamakgtayayan akxni “natitaxtuyaw” tuku tuwa, chu ni katimastalh talakaskin pi wi tuku nakinkaʼakgspulayan nema putum kilhtamaku namakgapala. Nachuna, Jehová kinkamaxkiyan xʼespíritu santo xlakata nakinkamakgtayayan natayaniyaw (Luc. 11:13; Filip. 4:13). Wa xlakata, tlan nalipawanaw pi Jehová ankgalhin nakinkamaxkiyan tuku namaklakaskinaw xlakata tlan natayaniyaw chu nikxni namakgxtakgaw.d

TUKU LAKASKIN JEHOVÁ PI KATLAWAW

9. Chuna la wan Santiago 1:​6, 7, ¿tuku xlakata lu xlakaskinka nalipawanaw pi Jehová nakinkamakgtayayan?

⁹ Jehová lakaskin pi kalipawaw (Heb. 11:6). Max namin kilhtamaku nalakpuwanaw pi tuku titaxtumaw lu tuwa chu asta nalakpuwanaw pi Jehová ni kintikamakgtayan. Pero Biblia liwana kinkawaniyan pi xlakata Jehová nakinkamaxkiyan xlitliwakga, asta tlan natawakayaw «kʼakgtum patsaps» (Sal. 18:29). Wa xlakata ni kalakpuwaw pi Jehová ni kintikamakgtayan. Wata xliputum kinakujkan katlawaniw oración chu kalipawaw pi Jehová nakgalhti kiʼoracioneskan (kalikgalhtawakga Santiago 1:​6, 7).

10. Kalichuwinanti akgtum liʼakxilhtit nema limasiya la naliskujaw tuku skinaw kkiʼoracioneskan.

¹⁰ Jehová lakaskin pi kaliskujwi tuku skiw kkiʼoracionkan. Kalilakpuwaw pi chatum tala amputun kʼakgtum asamblea regional chu skini Jehová pi kamakgtayalh namaxkikan talakaskin kxtaskujut xlakata naʼan. ¿Tuku max natlawa Jehová xlakata nakgalhti xʼoración? Max namakgtaya ni napekuan akxni natachuwinan xmalana. Pero natalakaskin pi wa tala naʼan tachuwinan xmalana chu max makglhuwa chuna natlawa. Chu asta max nawani pi wi tiku natalalakgpali kilhtamaku akxni skuja xlakata nalakgxokgowili kilhtamaku nema xla ni katiskujli. Chu komo natalakaskin, max tlan nawani pi maski ni kaxokgonika kilhtamaku akxni naʼan kʼasamblea.

11. ¿Tuku xlakata xlakaskinka makglhuwa natlawayaw oración?

¹¹ Jehová lakaskin pi makglhuwa kawaniw tuku lilakgaputsamaw (1 Tes. 5:17). Jesús lichuwinalh pi ni tunkun xʼamaw makglhtinanaw tuku kskiw kkiʼoracioneskan (Luc. 11:9). ¡Wa xlakata ni kataxlajwaniw! Lu katasaskiniw Jehová kʼoración chu makglhuwa chuna katlawaw (Luc. 18:​1-7). Akxni makglhuwa waniyaw Jehová tuku lilakgaputsamaw, limasiyaniyaw pi xlikana maklakaskinaw tuku skinimaw chu pi lipawanaw pi xla tlan nakinkamakgtayayan.

¿TUKU XLAKATA MAX KILILAKGPALITKAN TUKU SKINAW?

12. 1) ¿Tuku takgalhskinin tlan nalilakpuwanaw, chu tuku xlakata? 2) ¿La kilitlawatkan kiʼoracioneskan xlakata nalimasiyayaw pi maxkiyaw kakni Jehová? (Kaʼakxilhti recuadro «¿Limasiya kiʼoraciones pi kmaxki kakni Jehová?»).

¹² Komo ni tunkun kgantaxtu tuku skiniw Jehová, tlan nalilakpuwanaw umakgolh akgtutu takgalhskinin. Xapulana, «¿Xlilat tuku kskinima?». Ankgalhin lakpuwanaw pi liwana katsiyaw tuku tlakg tlan kimpalakatakan, pero max tuku skimaw kkiʼoracioneskan ni wa tuku tlakg tlan nakitaxtu chuna la natitaxtu kilhtamaku. Max skinimaw Jehová pi kalakkaxtlawalh akgtum taʼakglhuwit, pero max chuna la lakaskinaw pi kalakkaxlalh nitlan katikitaxtulh alistalh. Chu max makgapitsi tuku skinaw kkiʼoracioneskan ni wa tuku Jehová lakaskin (1 Juan 5:14). Akgtum liʼakxilhtit, kalilakpuwaw tamakgaxtokgat nema kalichuwinaw kpárrafo 1, xlakan skinikgolh Jehová pi xkgawasakan ni xmakgxtakgli xaxlikana. Tlan xlakpuwaw pi uma tuku kskimakgo tlan xwanit. Pero kalakapastakwi pi Jehová niti mafuerzajlini naskujnani. Xla lakaskin pi putum akinin, asta kamanan, kaskujniw xlakata chuna tlawaputunaw (Deut. 10:​12, 13; 30:​19, 20). Wa xlakata, ¿tuku tlan xtiskinkgolh uma tamakgaxtokgat? Tlan kskinikgolh Jehová pi kakamakgtayalh tlan namasiyanikgo xkgawasakan xlakata xla napaxki Jehová chu xʼamigo nawamputun (Prov. 22:6; Efes. 6:4).

13. Chuna la wan Hebreos 4:​16, ¿tuku kilhtamaku kinkamakgtayayan Jehová?

¹³ Xliʼakgtiy takgalhskinin wa uma, «¿Lakpuwan Jehová pi xkilhtamaku xlakata nakimaxki tuku kskinima?». Max lakpuwanaw pi maklakaskinaw tunkun kakinkakgalhtikan kiʼoracioneskan. Pero Jehová liwana katsi tuku kilhtamaku tlakg tlan nakinkamakgtayayan (kalikgalhtawakga Hebreos 4:16). Akxni Jehová ni tunkun kinkakgalhtiyan tuku skiniyaw kkiʼoracionkan, max nalakpuwanaw pi «ni» katitlawalh tuku skiniw. Pero Jehová max wata lakpuwan pi «nina» xkilhtamaku chuna natlawa. Kalichuwinamparaw kgawasa tiku skinilh Jehová pi xmapaksalh xlakata xtatatla. Komo Jehová xtlawalh akgtum milagro xlakata xmapaksalh, max Satanás tlan xlilakawanilh Jehová pi uma kgawasa kskujnanima kaj xlakata xmapaksanit (Job 1:​9-11; 2:4). Kalakapastakwi pi Jehová laklhkawilinit kilhtamaku akxni namasputu putum tajatat (Is. 33:24; Apoc. 21:​3, 4). Wa xlakata, ni kakgalhkgalhiw pi Jehová natlawa akgtum milagro la uku xlakata nakinkamapaksayan komo kgalhiyaw akgtum tajatat. Wa xlakata, ¿tuku tlan kskinilh Jehová uma kgawasa? Tlan kskinilh pi kamaxkilh litliwakga chu takaksni xlakata chuntiya naskujnani maski tatatla (Sal. 29:11).

14. ¿Tuku masiyaniyan xliʼakxilhtit Janice?

¹⁴ ¿Lakapastaka Janice, tala tiku tlawanilh oración Jehová xlakata kskujli kBetel? Titaxtulh akgkitsis kata xlakata xʼakgatekgsli pi Jehová xkgalhtinit xʼoraciones. Xla wan: «Uma kilhtamaku, Jehová lu kimakgtayalh nakkgalhi laktlan tayat. Akgtum liʼakxilhtit, xtalakaskin pi akit tlakg xaklipawa Jehová, tlakg liwana kiʼakstu xakkgalhtawakgalh chu xakpaxuwalh maski xaktitaxtulh tuku tuwa». Alistalh, xchixku Janice lakgayawaka taskujut xlakata Superintendente de circuito nalitaxtu. Xla wan: «Jehová kgalhtilh kiʼoraciones pero nichuna la akit xaklakpuwanit. Lhuwa kilhtamaku titaxtulh xlakata tlan xakakxilhli pi chuna la Jehová xkinkakgalhtinitan tlakg tlan xwanit. Lu kpaxtikatsini Jehová pi kimaxkinit talakaskin nakakxilha la xlilhuwa kinkapaxkiyan chu kinkalakgalhamanan».

15. ¿Tuku xlakata namin kilhtamaku tlakg tlan nawan ni kaj pulaktum tuku naskinaw kkiʼoracioneskan? (Na kaʼakxilhti dibujos).

¹⁵ Xlipulaktutu takgalhskinin wa uma, «¿Tlan atanu tuku xakskilh chu ni kajwatiya uma?». Maski lu xlakaskinka liwana nawaniyaw Jehová tuku lakaskinaw, tlan ni kajwatiya pulaktum tuku naskiniyaw xlakata naʼakxilhaw tuku lakaskin Jehová kimpalakatakan. Kalilakpuwaw tala tsumat tiku xtlawani oración Jehová xlakata xʼamputun kʼEscuela xla Tiku lichuwinankgo xTamapakgsin Dios. Xla xʼamputun kʼescuela xlakata tlakg naskujnani Jehová niku tlakg talakaskin tamakgtay. Maski tlan chuntiya natlawani oración Jehová xlakata naʼan kʼescuela, ¿tuku atanu tlan kskinilh? Pi kamakgtayalh nalilakpuwan tuku atanu tlan natlawa xlakata tlakg naskujnani (Hech. 16:​9, 10). Akxni tlawakgonita nawan xʼoración, max tlan xkgalhskilh Superintendente de circuito komo kʼakgtum congregación nema lakatsu wi tlakg talakaskin precursores tiku namakgtayanankgo. Na tlan xmalakgachalh maktum tatsokgni ksucursal xlakata nakatsi niku tlakg talakaskin tamakgtay xlakata nalichuwinankan Dios.e

16. ¿Tuku liwana kilikatsitkan?

¹⁶ Chuna la akxilhwi, liwana kakatsiw pi Jehová nakgalhti kiʼoracioneskan chuna la xlilat chu nakinkalimasiyaniyan tapaxkit (Sal. 4:3; Is. 30:18). Max namin kilhtamaku nichuna kintikakgalhtin kiʼoracioneskan chuna la akinin lakaskinaw, pero xla ankgalhin nakgalhti kiʼoracioneskan. Lu kinkapaxkiyan chu nikxni kintikaʼakgxtakgmakgan (Sal. 9:10). Wa xlakata chuntiya kalipawaw Jehová «putum kilhtamaku» chu kawaniw putum tuku wi kkinakujkan akxni tlawaniyaw oración (Sal. 62:8).