Tuku katsiputunkgo tiku likgalhtawakgakgo

¿Tuku xwamputun tiku tsokgwililh Proverbios 30:​18, 19 akxni wa pi nila x’akgatekgsa «xtiji chatum chixku tiku lakgapasma chatum tsumat»?

Lhuwa latamanin, asta tiku lu lakputsananikgo tuku wan Biblia, katsiputunkgonit tuku wamputun umakgolh tachuwin. Biblia Traducción del Nuevo Mundo (TNM), wan: «Anan pulaktutu tuku ni k’akgatekgsa [o «tuku lu kaks kimalakawani», nota], pulaktati tuku nila liwana k’akgatekgsa: la kgosa tantum águila k’akgapun, la tlawan tantum luwa kchiwix, la titaxtu akgtum barco klanka pupunu chu xtiji chatum chixku tiku lakgapasma chatum tsumat» (Prov. 30:​18, 19).

Xapulana xlakpuwanaw pi akxni Biblia wan, «xtiji chatum chixku tiku lakgapasma chatum tsumat» wi tuku nitlan xkilhchanima. ¿Tuku xlakata? Xlakata versículos 15 chu 16 lichuwinankgo makgapitsi tuku anan nema nikxni lipaxuwakgo tuku kgalhikgoya chu nikxni wankgo: «¡Aya tlan!» (Prov. 30:​15, 16, TNM). Chu versículo 20 lichuwinan «puskat tiku akgskgawi xchixku», chu xla wan pi ni tlawanit tuku nitlan. Xlakpuwanaw pi xtachuna la ni tasiya niku titaxtunit águila akxni kgosa k’akgapun, ni tasiya niku laktlawanit luwa kchiwix chu ni tasiya niku barco titaxtunit kpupunu, chatum chixku tlan wi tuku xtlawalh chu niti xkatsilh tuku xtlawanit. Wa xlakata xlakpuwanaw pi tachuwin «xtiji chatum chixku tiku lakgapasma chatum tsumat» xkilhchanima chatum chixku tiku x’akgskgawi chatum tsumat xlakata xtatalakgxtumilh chu uma tsumat nipara tsinu xkatsilh pi kaj x’akgskgawimaka.

Pero anan tuku limasiya pi uma versículo, wi tuku tlan kilhchanima. Tiku tsokgwililh uma versículo kajwatiya xlichuwinama tuku xla lu kaks xmalakawani.

Xamakgan tatsokgni xa’hebreo limasiyakgo pi tuku wan Proverbios 30:18 tlan tuku kilhchanima. Maktum diccionario bíblico wan pi tachuwin xa’hebreo nema unu matitaxtikanit «ni k’akgatekgsa», kilhchanima «tuku lu kaks malakawaninan, nila takanajla o lu stlan» (Theological Lexicon of the Old Testament, de Ernst Jenni y Claus Westermann).

Makgalhtawakgena Crawford Howell Toy, xalak Universidad xalak Harvard (Estados Unidos), na wan pi uma versículo ni lichuwinama tuku nitlan. Xla wan pi tiku tsokgwililh uma versículo kajwatiya xlichuwinama tuku lu kaks xmalakawani.

Wa xlakata tlan nawanaw pi Proverbios 30:​18, 19 lichuwinama tuku kaks kinkamalakawaniyan nema nila akgatekgsaw. Xtachuna la tiku tsokgwililh uma proverbio, akinin lu kaks lilakawanaw la kgoskgo águilas k’akgapun, la tlawankgo luwa kxkgalhni chiwix maski ni kgalhikgo xtantunkan, la titaxtukgo laklanka chu laktsinka barcos kpupunu chu la chatum kgawasa chu tsumat lalakgati chu xatapaxuwan latamakgo.