Ni katamakgapuspitnikgolh xalakluku sacerdotes

Artur, chatum superintendente de circuito xalak Armenia, xlakgapaxialhnama akgtum congregación xla xtatayananin Jehová. Katsilh pi uma congregación nina xmaklakaskinkgonit carritos xlakata nalichuwinankgo Dios niku titaxtukgo lhuwa latamanin. Xlakata nakamakgpuwantinikgo namaklakaskinkgo carritos xlakata nalichuwinankgo Dios, Artur, chu xpuskat, Ana, chu atanu tala tiku wanikan Yiraír linkgolh carritos kʼakgtum aktsu kachikin. Wilikgolh niku xtitaxtukgo lhuwa latamanin.

Makgapitsi latamanin tiku anta xtitaxtumakgo, lakgatikgolh chu tsukukgolh linkgo likgalhtawakga. Pero uma ni putum lakgatikgolh. Chatiy sacerdotes talakatsuwikgolh niku xwi carrito, chu chatum laktayamakgalh. Alistalh lakalasli Artur, chu asta malakgaxtulh xlentes. Artur, Ana chu Yiraír xakakswa o lakatsuku tsukukgolh katachuwinankgo sacerdotes xlakata nialh ksitsikgolh, pero ni matlanikgolh. Sacerdotes laktayamikgolh carrito chu likgalhtawakga makgat tamakgocha. Akxni xkawanikgonita laklixkajnit tachuwin umakgolh natalan, sacerdotes ankgolh.

Artur, Ana chu Yiraír ankgolh talakgsiyakgo kpuchiwin. Wankgolh tuku xtitaxtukgonit chu kalitachuwinankgolh Biblia makgapitsi policías chu amakgapitsi tiku skujkgo kpuchiwin. Alistalh kalinka kxʼoficina xapuxku policía, tiku xkatsiputun putum tuku xlanit. Akxni katsilh pi Artur, chatum tliwakga chixku, nitu tamakgapuspitli akxni xwilinimaka, uma policía nialh kgalhskininalh tuku xlanit chu tsukulh kgalhskininan tuku xkanajlakgo xtatayananin Jehová. Akgtati hora kgalhchuwinankgolh, uma policía lu kaks lilakawa chu alistalh wa: «¡Uma lu tlan religión, akit na kmakgtapakgsiputun anta!».

Lichali, Artur ampa lichuwinan Dios kcarrito. Talakatsuwinilh chatum chixku tiku xʼakxilhnit tuku xlanit chu wanilh pi lu tlan tuku tlawalh xlakata ni katalatlawalh sacerdotes. Na wa pi tuku xʼakxilhnit xtlawanit pi nialh xkalipawa sacerdotes.

Uma katsisni, xpuxkukan policía tasanilh Artur xlakata xtaspitli kpuchiwin. Pero ni wa litachuwinalh tuku xlanit, wata tlakg kgalhskilh xlakata Biblia. Anta na xwilakgo chatiy policías tiku xkgaxmatmakgo tuku xlichuwinamakgo.

Lichali, Artur lakgapaxialhnampa xapuxku policía xlakata namasiyani makgapitsi videos nema lichuwinankgo xlakata Biblia, chu uma chixku katasanilh makgapitsi policías xlakata na xʼakxilhkgolh umakgolh videos.

Tuku nitlan tlawakgolh umakgolh sacerdotes tlawalh pi policías xkgaxmatputunkgolh tuku masiya Biblia chu tlan tuku xkalakpuwanikgolh xtatayananin Jehová.