Lakkaxwilika la na nalichuwinankan Dios ktiji

1. ¿La xlichuwinankgo Dios kstalaninanin Cristo xapulana siglo?

¹ Kxapulana siglo, kstalaninanin Cristo kʼakgatunu chiki xlichuwinankgo Dios, pero na xlichuwinankgo niku xʼanan latamanin (Hech. 20:20). Akgtum liʼakxilhtit, xʼankgo ktemplo, niku xkatsikgo pi xʼama tekgskgo latamanin (Hech. 5:42). Anta kʼAtenas, apóstol Pablo chali chali xlichuwinan Dios kplaza niku stanankan (Hech. 17:17). Asta la uku, chuna lichuwinanaw xalakwan xalaksasti kʼakgatunu chiki. Pero na lichuwinanaw Dios kʼestacionamientos, niku stanankan, kparques chu ktiji niku titaxtukgo lhuwa latamanin, lata niku anan. Maski kinkawanikanitan pi tlan kalichuwinaw Dios lata niku, kilhuwakan tlan namakgtayananaw uma pulaktiy xasasti la lichuwinankan Dios ktiji. Kaʼakxilhwi.

2. ¿Tuku matsukika la lichuwinankan Dios noviembre 2011?

² Lakkaxwilika la na nalichuwinankan Dios niku lhuwa titaxtukgo latamanin. Chuna la lichuwinan kAnuario páginas 16 chu 17 xla kata 2013, noviembre kata 2011 tsukuka litsakgsakan la lichuwinankan Dios Nueva York (Estados Unidos). Klaklanka kchikinin niku titaxtukgo lhuwa latamanin wilikan mesa chu niku yawakan letreros xla maktum revista nema lu stlan tasiya chu ktanu tanu tachuwin. Lhuwa latamanin chali chali xkaʼakxilhkgo, asta tiku wilakgolh kchiki niku ni mastakan talakaskin tanukan o asta tiku ni lu tawilakgo kxchikkan. Lu tlan tuku kitaxtulh. Akgtum papaʼ mastaka 3,797 revistas chu 7,986 libros. Chu nachuna lhuwa tiku xtitaxtukgo kskinkgolh pi xkalimakgalhtawakgeka Biblia. Chuna tlawaka, xlakata xmatsukika takgalhtawakga, tiku xkatsiputunkgo xlakata Dios, kamalakgachanika xdirecciónkan congregaciones niku xkalakgchan xlakata tiku lichuwinan Dios naʼan lakgapaxialhnan.

3. ¿La natsukukan lichuwinankan Dios lakalhuwa chuna la lakaxwilika?

³ Xlakata lu tlan la kitaxtuma, lakaxwilika pi natlan chuna nalichuwinankan Dios kputum kachikinin niku lhuwa lamaka. Pulana, akgatunu sucursal nawan tukuya kachikin niku tlan namakgtayanan uma. Chuna natlawakan anta klaklanka kachikinin niku lhuwa titaxtukgo latamanin, max xlakata anta wilakgolh putlaw o lhuwa anan edificios niku skujkan o wilaka. Wa xlakata sucursal liwana namakatsini la xlitatlawat congregaciones nema namakgtayanankgo. Maski kalaksakan precursores regulares chu precursores especiales, pero min kilhtamaku na tlan namakgtayanankgo precursores auxiliares.

4. ¿La lichuwinankgo Dios tiku makgtayanankgo kʼuma tuku lakkaxwilika?

⁴ La tlawakan akxni lichuwinankan Dios. Precursores tiku makgtayanankgo kʼuma tuku lakkaxwilika, kgalhkgalhikgo pi kaminkgolh akxilhkgo tuku wi kʼmesa o niku kawilikanit likgalhtawakga, chu alistalh wanikgo pi kalinkgolh likgalhtawakga o tuku xlakan lakgatikgo. Nachuna, komo wi tuku katsiputunkgo, likgalhtikgo tuku wan Biblia. Komo wi tiku lin likgalhtawakga, ni wanikgo pi tlan xatapaxuwan namasta tumin komo lakaskin. Pero komo nakgalhskininan la taxokgo uma taskujut, wanikgo pi tlan malakgachakan tumin kdirección nema wi anta klikgalhtawakga. Akxni tlan kgalhskinkan, wanikgo: «¿Xlakgati wi tiku xlakgan kminchik?» o «¿Tsokgwiliputuna midirección xlakata namakglhtinana takgalhtawakga nema ni taxokgo?».

5. ¿Tuku lu tlan wa chatum tamakgaxtokgat xlakata kʼuma tuku lakkaxwilika la lichuwinankan Dios?

⁵ Makgtayanankan kʼuma tuku lakkaxwilika lu tlan limakgkatsikan. Chatum tamakgaxtokgat wa: «Akxni anta yat xpaxtum niku kawilikanit likgalhtawakga, kaʼakxilha lhuwa tiku titaxtumakgolh, akxilha pi lu liskujmaka xlakata tlan nakalitachuwinankan Dios putum latamanin xlikalanka katiyatni. Akxni nalakpuwana pi Jehová lu kalakgkatsan chatunu umakgolh latamanin, liwana kinkamalakpuwaniyan pi lichuwinankan Dios wa tuku pulana nawiliyaw kilatamatkan. Akxni latamanin tilakatsalakgo niku wilikanit likgalhtawakga, klakpuwanaw la Jehová max lakputsananima xnakujkan, komo kalakgchan nakgaxmatkgo xlakata Dios. Akxni tlawayaw uma taskujut akxilhaw la ángeles kinkataskujan».

6. 1) ¿Tuku lakkaxwilika la na nalichuwinankan Dios klakalhuwa congregaciones, chu tuku ni xtachuna la nema sucursal laksaka? 2) ¿La nalamakgtaya congregaciones xlakata tlan nalichuwinankan Dios ktiji?

⁶ Congregación lakkaxwili la nalichuwinankan Dios ktiji. Atanu nema xtachuna la lichuwinawa, lakgkgolotsin xalak congregación na lakkaxwilikgo la nalichuwinankan Dios ktiji. Akxni chuna tlawakgo, anta niku lakgchan congregación la lichuwinankgo Dios, natalan tiku anta tapakgsikgo wilikgo mesa o niku kawilikan likgalhtawakga niku lhuwa titaxtukgo latamanin. Wa uma tuku ni xtachuna la tlawakan akxni sucursal laksaka, niku natalan tiku makgtayanankgo tanu tanu congregación tapakgsikgo chu na antiya niku laksaka sucursal nalichuwinankgo Dios (kaʼakxilhti recuadro «Talakaskin nalamakgtayayaw»).

7. Komo lakgkgolotsin naʼakxilhkgo pi lu tlan nakitaxtu na chuna nalichuwinankgo Dios ktiji, ¿la nalakkaxwilikgo?

⁷ Lakgkgolotsin naʼakxilhkgo komo kcongregación anan niku lhuwa titaxtukgo latamanin chu komo makgtayanan nalakaxwilikan anta nalichuwinankan Dios. Max tlan nawilikan mesas o niku kawilikan likgalhtawakga anta niku chankgo putlaw, kplazas, kparque, ktiji niku lhuwa tlawankan, kxalaklanka pustan, klaklanka pukgalhtawakga, niku taxtukgo aviones chu niku kata kata tlawakgokan tamakxtumit. Tlakg tlan pi niku kawilikan likgalhtawakga watiya kilhtamaku chu antiya niku nawilakan chu watiya hora. Xlakata tuku tlan kitaxtunita, masiya pi tlakg tlan anta xpulakni laklanka pustan nawilikan mesas, nixawa xlakatin niku ni kaj ankgo tamawanankgo chu ankgo. Makgapitsi la ktiji niku lhuwa tlawankgokan tlakg tlan maklakaskinkan niku kamawakakan likgalhtawakga nema tlan malakxijkan, o malaksijkan chu ni wa mesa. Lakkaxtlawakanit archivos xlakata natlawakan letreros akxni chuna lichuwinankan Dios. Umakgolh letreros limin xadibujo Makatsinina chu ¡Despertad! chu libro ¿Tuku xlikana masiyay Biblia?, wa lakgkgolotsin tlan namaktikgo umakgolh archivos kisitiojkan kʼInternet. Tiku namakgtayanankgo nachuna natlawakgo la tiku makgtayanankgo nema sucursal laksaka niku lhuwa titaxtukgo latamanin, liwana namakgantaxtikgo tuku nakawani kgolotsin tiku pulalin la nalichuwinankan Dios. Akxni kgalhikgo xdirección tiku katsiputun xlakata Dios chu ni anta lakgchan congregación nalichuwinan Dios, lakapala malakgatsamakgo formulario Sírvase visitar (S-43-S) chu namaxkikgo secretario xla congregación.

8. Komo mincongregación ni lakaxwilikan xlakata nalichuwinankan Dios niku tsamakan, ¿tuku tlan natlawaya xlakata nalichuwinana Dios niku tsamakan?

⁸ La tlan na nalichuwinana Dios niku tsamakan. ¿Chu komo mincongregación ni anan niku lhuwa titaxtukgo latamanin xlakata tlan nawilikan mesa o niku kawilikan likgalhtawakga? Maski chuna wix tlan nalichuwinana Dios ktiji. ¿Anan anta niku lichuwinana Dios lhuwa pustan, maski ni lu lanka o niku lhuwa tamawanankan? ¿Latamanin tastokgkgo nakparque, kplaza o atanu? ¿Min kilhtamaku wi niku tastokgkgo latamanin? Komo chuna, tlan nalichuwinana Dios niku tsamakan.

9. ¿Tuku xlakata lu naliskujaw nakalitachuwinanaw Dios latamanin lata niku wilakgolh?

⁹ Xtalakaskin Jehová pi «paks naʼakgaputaxtukgoy, chu nalakgapaskgoy wa ntalulokgtat», o xaxlikana (1 Tim. 2:4). Wa xlakata kalitachuwinanaw latamanin xla xtamapakgsin Dios, xlakata nina min xlisputni (Mat. 24:14). Makglhuwa nila katekgsaw latamanin kxchikka, pero max tlan nakatachuwinanaw ktiji. Xlikana pi max kaj chuna tlan na nakgaxmatkgo xalakwan xalaksasti. Wa xlakata, kakalitachuwinaw Dios latamanin lata niku wilakgolh chu liwana kamakgantaxtiw kintaskujutkan (2 Tim. 4:5).

[Recuadro xla página 5]

Talakaskin nalamakgtayayaw

Makatsininankanit pi tiku lichuwinankgo Dios xala tanu tanu congregación, minkilhtamaku na antiya ktiji o estacionamientos chu xlakatin laklanka pustan o niku chankgo putlaw. Nachuna wankan pi tiku lichuwinankgo Dios xala tanu tanu congregación na antiya makgxtakgkgo revistas niku laktanukan chu niku kgalhkgalhikan, chu na watiya tiku stanamakgolh litachuwinankgo Dios. Maski ni watiya kilhtamaku minkgo, pero latamanin makgkatsikgo pi lu kamakglhuwikan. Wa xlakata, akxni makgtayananaw lichuwinanaw Dios niku anan latamanin, tlakg tlan kaj watiya anta na lichuwinanaw Dios niku lakgchan congregación.

Komo tiku lichuwinankgo Dios amputunkgo niku anan latamanin, pero uma lakgchan atanu congregación, pulana nawanikgo tiku pulalin la lichuwinankan Dios xala kxcongregación. Chu xla naskini talakaskin tiku pulalin la lichuwinankan Dios xla uma congregación. Akxni atanu congregaciones xaʼatanu tachuwin antiya lichuwinankgo Dios, lakgkgolotsin tiku pulalinkgo la lichuwinankan Dios nalamakatsini xlakata latamanin ni namakgkatsikgo pi kamakglhuwimaka. Akxni akxtum lamakgtayakan tlawa pi «lakatitum natatlawa xlipaks, chu na wa ntu aktanks» (1 Cor. 14:40).

[Dibujo xla página 6]

[Dibujo xla página 6]