Lichuwinankan Dios niku katatanokglhkan latamanin, la uku tlakg lilakgatit
1. Tuku kawanikanit pi tlan natlawakgo congregaciones xlakata nalichuwinankgo Dios niku titaxtukgo lhuwa latamanin?
1 Komo makgapitsi congregaciones niku lichuwinankgo Dios, kgalhikgo niku titaxtukgo lhuwa latamanin, kawanikan pi kalakkaxwilikgolh la nalichuwinankgo Dios, kawilikgolh mesas o niku kawilikan likgalhtawakga nema ni tuwa namatsuwikgo. Komo namaklakaskinkgo niku kawilikan likgalhtawakga, talakaskin anta nataya chatum tala o natawila kxpaxtun. Komo natamaklakaskin mesas, chatiy natalan. Putum xatapaxuwan namakgamakglhtinankgo chu tlan nakalikatsinikgo latamanin. Akxni natalakatsuwi chatum lataman niku wilakgolh likgalhtawakga, chatum tala tlan nawan: «¿Minit kilhtamaku kgalhskinkanita tuku wan Biblia xlakata uma tema?». Na tlan chatum o chatiy natalan ni makgat natayakgo, chu nalitachuwinankgo Dios latamanin tiku natitaxtukgo.
2. Kawanti tuku tlan kitaxtunit akxni maklakaskinkanit mesa o niku kawilikan likgalhtawakga niku titaxtukgo lhuwa latamanin.
2 Xlakata chuna tsukukanit lichuwinankan Dios, lhuwa latamanin tsukukgonit kgalhtawakgakgo. Akgtum liʼakxilhtit, chatum tsumat tiku xkgalhtawakgama kʼuniversidad lakpuwa natsokga xlakata xtatayananin Jehová, pero nila tekgsli kimpukgalhtawakgakan. Titaxtulh akgtum semana akxilhli lakatsu kʼuniversidad akgtum mesa niku xwilikanit kilikgalhtawakgakan. Tsukulh kgalhtawakga, tamunulh chu la uku na makglichuwinan Dios niku titaxtukgo lhuwa latamanin.
3. ¿Tuku lakpuwankgo tiku makgtayanankgonit kʼuma taskujut?
3 Chatum tala tiku na makgtayananit xlakata la lichuwinankan Dios niku titaxtukgo lhuwa latamanin wa: «Makgapitsi talakatsuwikgo xlakata nalinkgo revistas xla ama papaʼ. Makgapitsi ni katsikgo tiku xtatayananin Jehová. Xlakata chuna tlawamaka, tlawanit pi tlan nakatachuwinanaw lhuwa latamanin. Atanu tala wa: Talakgpali la lichuwinankan Dios chu lu lilakgatit, xlakata wa latamanin tiku talakatsuwikgo, kaj xlakata katsiputunkgo tuku wi».
4. ¿Tuku xlakata tlan nakitaxtu komo watiya kilhtamaku chu hora nawilikan mesa niku titaxtukgo lhuwa latamanin?
4 Tlan kitaxtu komo lakatum nawilikan mesa o niku kawilikan likgalhtawakga, watiya kilhtamaku chu watiya hora. Latamanin nalismanikgo naʼakxilhkgo, uma natlawa pi natalakatsuwikgo xlakata natlawakgo takgalhskinin o naskinkgo likgalhtawakga. ¿Lakkaxwilinita mincongregación xlakata natalichuwinan Dios niku tlakg titaxtukgo latamanin? Kamakgtayananti kʼuma taskujut nema lu lilakgatit nema tamakatsininanama chu talichuwinama xtamapakgsin Dios (Luc. 9:60).