Takilhtlin nema tlawa natalakatsuwiniyaw Dios

Tatlakgni akgtum tamaskiwin nema kinkamaxkinitan Jehová. Tlan natlawa pi nalakpuwanaw tuku tlan, nakinkamakgapaxuwayan chu asta wi tuku nakinkamatlawiyan. Wa uma tuku la akxni kgaxmataw kintakilhtlinkan, chuna la tuku min kJW Broadcasting^®. Umakgolh takilhtlin tlawa pi natalakatsuwiniyaw Jehová.

Lata kkata 2014, tlawakanit liwaka 70 takilhtlin, chu akgtum uma takilhtlin tlawakanit liwaka 500 ktanu tanu tachuwin. Pero max mi’akstu nakgalhskinkana: «¿La katlawakan umakgolh takilhtlin? ¿Chu tiku kaxtlawa?».

Taskujut nema ni tasiya

Comité de Enseñanza xla Lakgkgolotsin tiku pulalinankgo, kawani Equipo de Música xla Servicios de Audio y Video xlakata la natlawakgo takilhtlin, uma Equipo wa tlawa takilhtlin JW Broadcasting chu amakgapitsi takilhtlin. Kʼuma Equipo litakgatsi 13 natalan, umakgolh natalan wa tlawakgo takilhtlin, tatlakgni chu atanu taskujut nema tamaklakaskin xlakata nagrabarlikan takilhtlin. Comité de Enseñanza mastanit talakaskin pi natalan kxlikalanka katiyatni namakgtayanankgo xlakata natlawakgo uma taskujut lata kxchikkan. Makgapitsi umakgolh natalan lakkaxtlawakgo xaletra takilhtlin, lakkaxtlawakgo tatlakgni chu tlan kilhtlikgo. Umakgolh natalan xatapaxuwan limaklakaskinkgo tuku katsinikgo tlawakgo chu ni kgalhkgalhikgo nakamalankikan.

¿La katlawakan takilhtlin? Pulana, Comité de Enseñanza lakkaxwili tukuya ktextos natakilhtiya akgatunu takilhtlin chu tuku lakaskinkgo pi kamakgkatsikgolh tiku nakgaxmatkgo. Alistalh, Equipo de Música laksaka tiku natlawa tatlakgni chu tiku natsokgwili xaletra. Tlawakan xapulana grabación xlakata nataʼakxilha la takgaxmata takilhtlin, chu Comité de Enseñanza akxilha komo wi tuku xlitalakgpalinit. Equipo de Música lakgpali tuku talakaskin chu tlawakan xa’awatiya grabación nema natamakgxtakga. Takilhtlin lakatum lakatum niku kagrabarlikan, ksucursales o k’akgtum chiki.

Xlakata nakatlawakan kintakilhtlinkan, natalan maklakaskinkgo akgtum programa niku tlan naeditarlikan tuku tagrabarlinit, programas nema tsokgwilitilha la takgaxmata tatlakgni chu niku namakikan audios nema tagrabarlinit. Na tamaklakaskin tipalhuwa tuku litlakgnankan, mezcladoras de sonido, amplificadores, altavoces chu micrófonos. Akgatunu micrófono 100 chu 1,000 dólares o max liwaka la xlitapalaxla. Kkata 2020 laktlawaka 116,000 dólares xlakata natamawakan tuku naligrabarlinankan.

¿Tuku tlawakan xlakata ni lu lhuwa tumin nalaktlawakan? Ni lhuwa natalan kaskinikanit pi ka’ankgolh kBetel xlakata namakgtayanankgo k’Equipo de Música, wata kaskinikan natalan pi lata kxchikkan kaskujkgolh. Nachuna ni talakaskin namamakxtumikan akgtum lanka orquesta xlakata nagrabarlikan akgtum tatlakgni, wata kaskinikan chatunu chatunu natalan pi kagrabarlikgolh tuku kalakgchan chu alistalh makxtum tlawakan.

«Umakgolh takilhtlin matliwakglha kintakanajla»

¡Natalan lu lakgatikgo kgaxmatkgo umakgolh takilhtlin! Akgtum liʼakxilhtit, Tara, xalak Alemania, wan: «Akxni lu klakgaputsama, takilhtlin tlan kimamakgkatsini. Akxni kkgaxmata kkintachuwin, kmakgkatsi pi Jehová kiʼakgpixtiyama». Dimitri, tiku lama kKazajistán, kinkawaniyan: «Klakgati kgaxmata takilhtlin chu ni klilakgaputsa xaletra, xlakata kkatsi pi putum tuku wan anta takilhtinit kBiblia. Umakgolh takilhtlin kimakgtaya naklilakpuwan tuku xla kintakanajla».

Delia, xalak Sudáfrica, kinkalitachuwinanan la makgkatsi akxni kgaxmata takilhtlin: «Umakgolh takilhtlin matliwakglha kintakanajla. Akxni klipuwan o kkgalhi akgtum taʼakglhuwit, ankgalhin anan akgtum takilhtlin nema lichuwinan taʼakglhuwit nema ktitaxtuma. Min kilhtamaku, asta maski kaj xatatlakgni kgaxmata tlan tsuku kimamakgkatsini».

Lhuwa natalan lu lakgatikgo umakgolh takilhtlin. Lerato, tiku na lama kSudáfrica, kinkawaniyan: «Takilhtlin Talakatsuwima xastlan kakilhtamaku chu Latamat xaxlipan kimalakpuwani kilhtamaku akxni nakakxilhpara kintse tiku ninita. Makgatunu akxni kkgaxmata, kakxilhlakachan akxni kintse tokgosun nakilakgmin chu nakiʼakgpixtiya».

Wi akgtum takilhtlin nema lu makgtayalh chatum tala xalak Sri Lanka. Xla kinkawaniyan: «Kimakgalhtawakgena kiwanilh laklixkajnit tachuwin kxlakatinkan amakgapitsin kaj xlakata xtatayana Jehová akit. Lu kpekualh chu ni kkatsilh la nakkgalhti. Akxni kchalh kkinchik, kintse kiwanilh pi xakkgaxmatli takilhtlin Fuerte tú serás. Uma takilhtlin kimasiyanilh pi lu xlakaskinka xwanit xaklakputsanalh xlakata xakkatsilh tuku nakkgalhtinan. Lichali ktachuwinalh kimakgalhtawakgena. Xla kinkgaxmatnilh chu kiwanilh pi la uku xʼakgatekgsa tuku xakkanajla. Kmaxki paxtikatsinit xkachikin Jehová xlakata tlawa takilhtlin nema lu makgpuwantininan».

¿Niku tiyakan tumin xlakata nakatlawakan umakgolh takilhtlin? Tlawakan uma taskujut xlakata tumin nema xatapaxuwan mastayatit. Tlan namastayatit mintuminkan chuna la wan donate.jw.org. Paxtikatsinilh mintalakgalhamankan.