Xlimaktum Samuel

27 Pero David lakpuwa: «Namin kilhtamaku Saúl nakimakgni. Tlakg tlan nawan nakkan kxtiyatkan filisteos. Chuna Saúl nialh kintiputsalh putum kxtiyat Israel chu naklakgtaxtuni». 2 Wa xlakata David chu akgchaxan ciento ksoldados ankgolh niku xwi Akís xkgawasa Maoc, mapakgsina xalak Gat. 3 David chu ksoldados tatamakgxtakgkgolh Akís anta kʼGat, chatunu chatunu tatamakgxtakgli xfamilia. David xkataʼan chatiy xlakpuskatin: Ahinoam tiku xalak Jezreel xwanit chu Abigaíl tiku xalak Carmelo, tiku xpuskat Nabal xwanit. 4 Akxni Saúl wanika pi David xtsalanit kʼGat, nialh putsastalanilh.

5 Alistalh David wanilh Akís: «Komo wix tlan kiʼakxilha, katlawa litlan kimaxki niku tlan naktawila, kʼakgtum kachikin niku ni lhuwa wilaka. ¿Tuku xlakata miskujni natatawilayan kxkachikin mapakgsina?». 6 Ama kilhtamaku Akís maxkilh Ziclag. Wa xlakata Ziclag katapakgsini mapakgsinanin xalak Judá asta la uku.

7 David latamalh akgtum kata aʼakgtati papaʼ klaktsu xkachikinkan filisteos. 8 Chu David xkataʼan ksoldados xlakata nakatalachipakgo guesuritas, guirzitas chu amalequitas, xlakata xlamakgolh ktiyat nema xʼan lata kTelam asta kSur chu asta kxtiyatkan egipcios. 9 Akxni David xʼan katalatlawa kachikin, putum xkamakgni, lakchixkuwin chu lakpuskatin. Pero xkalin borregos, wakax, burros chu camellos, nachuna lhakgat. Alistalh xtaspita niku xwi Akís. 10 Alistalh Akís xkgalhskin: «¿Tuku kachikin katalachipa la uku?». Chu David xkgalhtinan: «Ksur* Judá» o «Ksur xtiyatkan jerahmeelitas» o «Ksur xtiyatkan quenitas». 11 David xkamakgni putum lakchixkuwin chu lakpuskatin xlakata niti xlinka kʼGat, xlakata xwan: «Max nakinkamakgesikgoyan chu nawankgo “David tlawalh uma chu ama”». (Putum kilhtamaku akxni xkatawi filisteos klaktsu xkachikinkan wa uma tuku tlawalh). 12 Akís xkanajlani David chu xlakpuwan: «Max la uku xkachikin Israel lu xkajni, wa xlakata ankgalhin kiskujni nalitaxtu».